މި ސަރުކާރު ވައްކަން ކުރަނީ ގުޅިގެން ރާވައިގެން، މުލުގައި ހުންނެވީ ރައީސް ޞާލިހު: އަބްދުއްރަހީމް
މި ސަރުކާރުން ވައްކަން ކުރަމުންދަނީ، ސަރުކާރުގެ އިސްވެރިން ގުޅިގެން ރޭވުންތެރިކަމާއެކުގައި ކަމާއި، ވައްކަމުގެ މުލުގައި ހުންނެވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.
އަބްދުއްރަހީމް މިފަދައިން ވިދާޅުވެފައިވަނީ ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.
އެ ޖަލްސާގައި ވާހަކަދައްކަވަމުން އަބްދުއްރަހީމް ވަނީ ސަރުކާރުގެ އިސް ސަފުގައި ތިއްބެވި ބައެއް ބޭފުޅުންނަށް ވައްކަމުގެ ތުހުމަތު ކުރައްވާފައެވެ.
އަބްދުއްރަހީމް ވިދާޅުވި ގޮތުގައި ސަރުކާރުގެ ފޮރިން މިނިސްޓަރު ޝާހިދަކީ ދައުލަތުގެ މުދަލުން ވައްކަން ކުރުމުގެ ދިގު ތާރީހެއް އޮތް ބޭފުޅެކެވެ. އެގޮތުން ރައީސް މައުމޫނު ދައުރުއްސުރެ، ޝާހިދު ދައުލަތުގެ މާލިއްޔާއިން ވައްކަން ކުރަމުންދާކަމީ ފެންނަން އޮތް ހަގީގަތެއްކަމަށް އަބްދުއްރަހީމް ވިދާޅުވިއެވެ.
"ކުޑަ ވަގެއް ނޫން ޝާހިދު އަކީ. ޒަމާނުއްސުރެ ވައްކަން ކުރާ މީހެއް. ޑރ ޖަމީލުމެންނަށް އެނގިވަޑައިގަންނަވާނެ ރައީސް މައުމޫނުގެ ޒަމާނުގައި ކުރި ވައްކަން. ރައީސް އޮފީހުގައި ހުރެގެން ރައީސް އޮފީހަށްވުރެ ކުރިން އިބްރާހިމް މިސްކިތް ކުރިމަތީގައި ބޮޑު ސިންގާ ބިލްޑިންގއެއް އަޅާ ނިންމާލީ. މިވާހަކަ އަޅުގަނޑުމެން ދެއްކީމާ ޝާހިދު މި ރުޅި އަންނަނީ"
ޕީއެންސީގެ ރައީސް އަބްދުއްރަހީމް
ޝާހިދުގެ އިތުރުންވެސް ސަރުކާރުގެ ކެބިނެޓުގައި ތިއްބެވި ބައެއް ވަޒީރުންނަށް ވައްކަމާއި ޚިޔާނާތުގެ ތުހުމަތު އަބްދުއްރަހީމް ކުރެއްވިއެވެ.
އެއާއެކު އަބްދުއްރަހީމް ވިދާޅުވީ، މި ސަރުކާރުގައި އޮތީ ހުސް ވައްކަން ކަމަށެވެ. އަދި ސަރުކާރުން ކުރާ ވައްކަންތަކުގެ އެންމެ އަޑީގައި ހުންނެވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުކަމަށްވެސް ވިދާޅުވިއެވެ.
"މި ސަރުކާރުގައި ހައްތަހާ ތިބީ ވަގުން. ހައްތަހާ ތިބީ ވަގުން... އެޭޣެ ތެރޭގައި މުލު ވަގު އިބްރާހިމް މުހައްމަދު ސޯލިހު އެއީ"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ މި ގައުމު ބޮޑު އަދަވަޅުގަނޑަކަށް ވެއްޓެން ދިމާވި މައިގަނޑު ސަބަބަކީ ނާގާބިލް ބަޔަކާއި ގައުމުގެ ހިންގުން ހަވާލު ކުރެވުންކަމަށެވެ. އަދި ބަދުނަސީބުން މިއަދު ގައުމު ހިންގަން ހަވާލުވެ ތިބީ ގައުމަށް ޣައްދާރުވުމުގެ ތާރީޚު އޮތް ބަޔަކާއި ކަމަށް އަބްދުއްރަހީމް ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
