ޝަރުއީ ދާއިރާގެ މުވައްޒަފުންގެ މުސާރަ ބޮޑުކުރުމާ އެމްޑީޕީން ދެކޮޅު

ޝަރުއީ ދާއިރާގެ މުވައްޒަފުންގެ މުސާރަ ބޮޑުކުރުމަށް ހުށަހެޅި އިސްލާހު އެމްޑީޕީގެ ޕާލަމަންޓަރީ ގްރޫޕުން ބަލައި ނުގަނެ ބޭރުކޮށްލައިފިއެވެ.

ޖުޑިޝަލް ސާވިސް ކޮމިޝަންގެ ރައީސް އަދި ތުޅާދޫ ދާއިރާގެ މެންބަރު ހިސާން ހުސެއިން ހުށަހެޅުއްވި މި އިސްލާހުގައި ވަނީ، ޝަރުއީ ދާއިރާގެ މުވައްޒަފުންގެ މުސާރަ ބޮޑު ކުރުމަށްޓަކައި އަންނަ އަހަރުގެ ބަޖެޓަށް 49 މިލިއަން ރުފިޔާ އިތުރު ކުރުމަށް ހިމަނައިފައެވެ.

އެގޮތުން އިއްޔެގެ މަޖިލީހުގެ ތަޅުމަށް މި ބިލު ހުށަހަޅުއްވައި ހިޝާން ވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ ދަށުން މަސައްކަތް ކުރާ 1،900 މުވައްޒަފުން ތިބި ކަން ފާހަގަ ކުރައްވައިފައެވެ.

މީގެ އިތުރުން އެ އިސްލާހުގައި ވާގޮތުން ޖުޑީޝަރީގެ މުވައްޒަފުންގެ މުސާރައިގެ އޮނިގަނޑު މުރާޖައާ ކުރުމަށް އަންނަ އަހަރަށް 43 މިލިއަން ރުފިޔާގެ ބަޖެޓެއް އިތުރު ކުރުމަށް ހިމަނައިފައި ވާއިރު މުވައްޒަފުންގެ އިންޝުއަރަންސް ހަމަޖެއްސުމަށް ބޮލަކަށް އަހަރަކު 3،500 ރުފިޔާ ހަމަޖެއްސުމަށް ހަ މިލިއަން ރުފިޔާ ބަޖެޓަށް އިތުރުކުރުމަށްވެސް ވަނީ ހިމަނައިފައެވެ.

އެހެންނަމަވެސް، އެމްޑީޕީގެ ޕާލިމަންޓްރީ ގްރޫޕުން ވަނީ ކޮމެޓީ މަރުހަލާގައި އެ އިސްލާހު އުނިކުރުމަށް ނިންމާފައެވެ.

މިކަން ހާމަކޮށް ހިސާން ވަނީ، 2009 ވަނަ އަހަރުން ފެށިގެން ޖުޑިޝަރީގެ މުވައްޒަފުންގެ މުސާރައަށް ކުރިއެރުމެއް އައިސްފައި ނުވާކަން ފާހަގަކޮށް އެމްއެންޕީގެ ޕާލިމަންޓްރީ ގުރޫޕްގެ މި ނިންމުމާމެދު ޓުވިޓާގައި ކަންބޮޑުވުން ފާޅުކުރައްވައިފައެވެ.

އެހެންކަމުން ޕާލަމެންޓަރީ ގުރޫޕުގެ ނިންމުމާ ހިލާފު ނުވުމަށް، ބަޖެޓަށް ހުށަހެޅި އިސްލާހުތައް އަނބުރާ ގެންދެވުމަށް ހިސާން ވަނީ ނިންމަވާފަ އެވެ.
ޝަރުއީ ދާއިރާގެ މުވައްޒަފުންގެ މުސާރަ ބޮޑު ކުރުމަށާއި ޑީޖޭއޭގެ ބަޖެޓު އިތުރުކޮށް ދިނުމަށް އެދި 2019 ވަނަ އަހަރުން ފެށިގެން އެ ވާހަކަ އައީ ދެކެވެމުންނެވެ. އެހެންނަމަވެސް ކޮވިޑާއެކު އައި މާލީ ގޮންޖެހުންތަކާ އެކު އެކަން އޭރު މަޑު ޖެހިގެން ދިޔައީ އެވެ.