މެޑަމް ސާޖި އަކީ މަސައްކަތްތެރި ކަނބަލެއް؛ އެމްޑީޕީ މެންބަރުން އުޅެނީ އެކަމަނާއާ ފޮށެން : އިބްރާޙީމް ރަޝީދު

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ އަނބިކަނބަލުން ސާޖިދާ މުހައްމަދަކީ މަސައްކަތްތެތި ކަނބަލެއް ކަމަށާ، އެކަމަނާއާއި މެދު ޒާތީ ވެވަޑައިގަންނަވާ ކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.

ސިވިލް ސާވިސްގެ ވަޒީފާގައި މެޑަމް ސާޖިދާ ހުންނަވަނީ ގާނޫނާއި ހިލާފަށްކަމަށް ބުނެ، އެކަމަނާއާއި ސިވިލްސާވިސް ކޮމިޝަނުން ހަދާފައިވާ ކޮންޓްރެކްޓް ބާތިލް ކުރުމަށް އެމްޑީޕީން މަޖިލީހަށް ހުށަހެޅި ކުއްލި މައްސަލައަށް ބަހުސް ކުރައްވަމުން ބޮންޑެ ވިދާޅުވީ ސިވިލް ސަރވިސްގެ ގަވާއީދާއި ޚިލާފަށް ކަމެއް ކޮށްފައިވާނަމަ އެ މައްސަލަ މަޖިލީހަށް ވަރަށް ފަސޭހައިން ނިންމޭނެ ގޮތްތައް އޮތް ކަމަށެވެ.

އެހެންނަމަވެސް، މެޑަމް ސާޖިދާގެ މައްސަލައިގައި އެމްޑީޕީ މެންބަރުން ކަން ކުރައްވާ ގޮތުން އެކަން ސިފަވަނީ ސިޔާސީކަމެއްގެ ގޮތުގައިކަމަށް އޭނާ ވިދާޅުވި އެވެ.

ބޮންޑެ ވިދާޅުވީ ނިމިދިޔަ އެމްޑީޕީގެ ވެރިކަމުގެ ފަސް އަހަރު، އެމްޑީޕީން ކުރި މަސައްކަތަކީ ކުރީގެ ރައީސް މުހައްމަދު ނަޝީދާއި ފުރައްސާރަކުރުމާއި، ދިމާކުރުންކަމަށެވެ. އަދި މިހާރު އެމަނިކުފާނު ނެތުމުން އެމްޑީޕީއިން އުޅެނީ މެޑަމް ސާޖިދާ އާ "އަޅައިގަނެގެން" ކަމަށް އޭނާ ވިދާޅުވި އެވެ.

ކޮންމެސް އަންހެނަކާއި އަޅައިގަނެގެން އަނެއްކާވެސް މިއުޅެނީ، ފަސްޓް ލޭޑީއާއި އަޅައިގަނެގެން. އަޅުގަނޑުމެން އެބަހުރި މި ގައުމުގައި ވަރަށް މުހިންމު މައްސަލަތައް، މި ގައުމުގައި ހުރި މައްސަލަތައް ހައްލުނުކޮށް، އެކަމާއި ވާހަކަ ނުދައްކާ، މިއަދު ނޮޅިވަރަމް ދާއިރާގެ މެންބަރުވެސް އެ ފާހަގަކުރެއްވީ ޕްރޮސެކިއުޓާ ޖެނެރަލްގެ އޮފީހުގައި، ދައުލަތުގެ، ރައްޔިތުންގެ މައްޗަށް ދައުވާ ކުރަން ހުރި މީހާކޮށްގެން އުޅޭކަމުގެ ވާހަކަ. މިފަދަ ކަންކަން ނުބަލާ، އަންހެނަކާ ފޮށެން، ހެނދުނު ދަޅާގައި، ހަމަ އިރުއިރު ތަނާ މިތަނަށް ލުމަކީ ހަގީގަތުގައި ވަރަށް ހަޑި ހުތުރު ކަމެއް.

އިބްރާހީމް ރަޝީދު (ބޮންޑެ)

މިއާއެކު ބޮންޑެ ވިދާޅުވީ ސާޖިދާއަކީ މީގެ ކުރިންވެސް އެމްއެފްޑީއޭ ގައި ވަރަށް ބުރަކޮށް މަސައްކަތް ކުރައްވަމުން އަންނަ ބޭފުޅެއް ކަމަށެވެ. އަދި، އެމްޑީޕީން އެކަމަނާގެ ކޮންޓްރެކްޓް ބާތިލް ކުރަން އުޅެނީ އެކަމަނާއާއި ޒާތީ ގޮތުން ޖައްސާލުމަށް ކަމަށް ވެސް އޭނާ ވިދާޅުވި އެވެ.

ފަސްޓް ލޭޑީގެ މަގާމުގައި އެހުންނެވި ސާޖިދާ، ފުޑް އެންޑް ޑްރަގް އާއި ގުޅޭ ބިލެއް މިތަނަށް ފޮނުއްްވައިގެން ވަރަށް މަސައްކަތް ކުރެއްވި. އަޅުގަނޑުމެން ދެނަހުރިން. ވަރަށް މަސައްކަތް ކުރައްވާ. މިހާރުވެސް މާލޭގައި ހަމައެއް ލަމައެއް ނެތި ކާބޯތަކެތި ވިއްކާ މައްސަލާގައި، ކާބޯތަކެއްޗަށް ރައްކާތެރިކަމެއް ހޯދުމަށްޓަކައި ބިލެއް ފޮނުވައިގެން ލޮބީ ކޮށްގެން މިހާރު ތިން އަހަރު ވެއްޖެ އެ މަސައްކަތް ވެސް ކުރައްވާތާ. އެހެންވީމާ ވަރަށް މަސައްކަތް ކުރައްވަމުންދާ ބޭފުޅެއް.

އިބްރާހީމް ރަޝީދު (ބޮންޑެ)

މީގެ އިތުރުން ބޮންޑެ ވިދާޅުވީ މިހާރު އެމްޑީޕީ ވެފައިވަނީ ފަސާދަ ޕާޓީއަކަށް ކަމަށާ، އެފަދައިން އެޕާޓީން ކަންކަން ކޮށްގެން ކުރިއަށް އޮތް މަޖިލީހުގެ އިންތިޙާބުގައިވެސް އެންމެ ގޮނޑިއެއްވެސް ކާމިޔާބު ނުވާނެ ކަމަށެވެ.