ކަންނެލި މަސްވެރިންގެ މަސްލަހަތު ގެއްލޭގޮތަަށް ލޭނު މަސްވެރިކަމަށް ފުރުޞަތު ނުދޭނަން: ވަޒީރު ޝިޔާމް
ލިޔުންތެރިޔާ
ޚަދީޖާ އަރުފާ
ކަންނެލި މަސްވެރިންގެ މަސްލަހަތު ގެއްލޭގޮތަަށް ލޭނު މަސްވެރިކަމަށް ފުރުޞަތު ނުދެއްވާނެ ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މަސްވެރިންގެ ފައިސާ ނުލިބި ލަސްވަމުންދާތީއާއި ދާ އަޅައިގެން ލޭނު މަސްވެރިކަން ކުރާނަމަ ބޮޑު ކަންނެލި މަސްވެރިކަން ކުރަމުންދާ ފަރާތްތަކަށް ގެއްލުންތަކެއް ވާނެ ކަމަށް ބުނެ ކަންނެލި މަސްވެރިކަން ކުރާ ބައެއް މަސްވެރިން އިއްޔެ އިހްތިޖާޖު ކުރުމުން، އިހްތިޖާޖުގެ ބައިވެރިންނާއި ބައްދަލު ކުރެއްވުމަށް އެ ސަރަހައްދަށް ވަޑައިގެން އެ މީހުންނާއި ވާހަކަ ދައްކަވަމުން ޝިޔާމް ވަނީ، އެ މަސްވެރިންގެ ކަންބޮޑުވުންތައް އައްސަވައި އެކަމަށް ޖަވާބު ދެއްވާފައެވެ.
އެގޮތުން، ލޭނު އެޅުމުގެ މަސްވެރިކަމަށް ހުއްދަ ދިނުމަށް ސަރުކާރުން ކުރަމުންދާ މަޝްވަރާ ތަކާއި ގުޅިގެން ކަންނެލި މަސްވެރިންގެ ހުރި ކަންބޮޑުވުންތަކަށް ޖަވާބު ދެއްވަމުން ޝިޔާމް ވިދާޅުވީ، ލޭނުގެ މަސްވެރިކަން ކުރަން ހުޅުވާލި ކަމުގައިވިޔަސް މީގެ ކުރީގައި ލޭނުގެ މަސްވެރިކަން ކުރި ގޮތަކަށް ކުރިޔަ ނުދެއްވާނެ ކަމަށެވެ.
އެގޮތުން ލޭނުގެ މަސްވެރިކަމަށް އުނދަގޫ ފިޔަވަޅުތަކެއް އަޅުއްވާނެކަން ފާހަގަކުރައްވައި ޝިޔާމް ވަނީ ކަންނެލި މަސްވެރިންގެ މަސްލަހަތު ހިމާޔަތް ކުރައްވާނެ ކަމުގެ ޔަގީންކަން ދެއްވާފައެވެ.
އަޅުގަނޑެއް ނުފިލާނެ، އަޅުގަނޑެއް ނުފިލާނެ ކަންނެލި މަސްވެރިންނަކަށްވެސް، ކަޅުބިލަ މަސްވެރިންނަކަށްވެސް. އަޅުގަނޑުމިއީ އެކަހަލަ މީހެއް ނޫން. އެހެންވީމާ އަޅިގަނޑުމެން މަޝްވަރާ ކުރާނަން. އެންމެ ބޮޑު ކަންބޮޑުވުމަކަށް ތި އޮތީ، ލޭނުގެ ކަންތަކުގައި އެ އޮތް ކަންބޮޑުވުން. އަޅުގަނޑުމެންނަށްވެސް އެނގޭ. ލޭނު ހުޅުވާލިޔަސް ކުރީގައި ލޭނުގެ މަސްވެރިކަން ކުރި ގޮތަކަށް ކުރިޔަ އަޅުގަނޑުމެން ނުދޭނަން. ލޭނު މަސްވެރިކަމަށް އެއަށްވުރެ މާ އުނދަގޫ މެޝާސްތަކެއް ނަގާފައު، ކަންނެލި މަސްވެރިކަން ކުރާ ފަރާތްތަކަށް އޭގެ އެންމެ ބޮޑު އަސަރެއް ކުރާ ކަމަށް ވަންޏާމުން، ކަންނެލި މަސްވެރިންގެ މަސްލަހަތު އެންމެ ބޮޑަށް ހިމާޔަތް ކުރެވޭ ގޮތަކަށް ނޫނީ އެކަހަލަ އެއްވެސް އެކްޓިވިޓީއެއް އަޅުގަނޑުމެން ސަރުކާރަކުން ނުހިންގާނެ
މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް
މީގެ އިތުރުން ވަޒީރު ވަނީ ސަރުކާރުން ކަންނެލި މަސްވެރިންނަށް ވެފައިވާ ވަޢުދު ވެރިކަމުގެ ކުރީކޮޅުގައި ފުއްދުމަށް މަސައްކަތް ކުރަމުންދާކަމަށް ވިދާޅުވެފައެވެ. އެހެން ނަމަވެސް ފާއިތުވީ ވަރަށް ދަތި 7 މަސް ކަމަށާ، އެކަން ކަމުން އަރައިގަނެ މިފްކޯގެ ހާލަތު ރަނގަޅު ކުރުމަށް މަސައްކަޔް ކުރައްވަމުންދާ ކަމަށް ވަޒީރު ވިދާޅުވިއެވެ.
އެގޮތުން ވަޒީރު ވަނީ ކުންފުނިތަކުން މާލީ ހާލަތު ރަނގަޅު ކުރަން މަސައްކަތް ކުރަމުންދާކަމަށް ވިދާޅުވެފައެވެ.
"މިފްކޯއަށް ސަބްސިޑީ ނުދީ ކަޅުބިލަމަހުގެ މަސްވެރިކަން ކުރެވޭނެ ގޮތަކަށް މަސައްކަތް ކުރަމުން މިދަނީ. ސަރުކާރުގެ އަމާޒަކީ ފުރަތަމަ ތިން އަހަރުގެ ތެރޭގައި. ސަބްސިޑީ ނުދީ ވާނެ ގޮތަކަށް މިފްކޯގެ ހިނގުން ހަރުދަނާ ކުރުން." މަސްވެރިކަމާ ބެހޭ ވަޒީރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
