ބްރޯޑްކޮމްގެ މަޤާމަށް ކުރިމަތިލި ފަރާތްތަކާއިމެދު އާންމުންގެ ޙިޔާލު ހޯދުމަށް ހުޅުވާލައިފި

މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) ގެ މެންބަރެއްގެ މަޤާމް ހުސްވެފައިވާތީ އެމަޤާމަށް އައްޔަނު ކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ނަން ފޮނުއްވާފައިވާ ފަރާތްތަކާ ގުޅޭގޮތުން އާންމުންގެ ޙިޔާލު ހޯދުމަށް ފުރުސަތު ހުޅުވާލައިފިއެވެ.

ބްރޯޑްކޮމްގެ ނައިބު ރައީސްގެ މަޤާމް ހުސްވެފައިވަނީ އެމަޤާމްގައި ހުންނެވި އަޙްމަދު ގައިސް އިސްތިއުފާ ދިނުމާއި ގުޅީގެންނެވެ.

މިކަމާއި ގުޅިގެން މަޤާމަށް ކުރިމަތި ލުމަށް ހުޅުވާލައިފާވަނީ މިދިޔަ މަހުގެ 12 ވަނަ ދުވަހުއެވެ.

އަދި މި މަޤާމަށް ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ ރައްޔިިތުންގެ މަޖިލީހަށް ފޮނުއްވާފައިވާ ނަންފުޅުތައް ދިރާސާކޮށް، ގޮތެއް ނިންމުމަށްޓަކައި، 8 ފެބްރުއަރީގައި ބޭއްވެވި ރައްޔިތުންގެ މަޖިލީހުގެ ޖަލްސާގައި މި ނަންތައް ވަނީި މިނިވަން މުއައްސަސާތަކުގެ ކޮމިޓީއަށް ފޮނުއްވާފައެވެ.

އަދި ނަން ފޮނުއްވާފައިވާ ފަރާތްތަކާއި ގުޅޭގޮތުން އާންމުންގެ ޝަކުވާއެއްވޭތޯ ބެލުމަށްޓަކައި ޝަކުވާ ހުށަހެޅުމުގެ ފުރުސަތު ހުޅުވާލައި އިއްޔެ ވަނީ އިއުލާންނެރެފައެވެ.

މި ނަންތަކުގެ ތެރޭގައި ހިމެނެނީ :

1.އާމިނަތު ނުޒުހާ، ރިވޯޑް / ހއ.ހޯރަފުށި.

2.ޙުސައިން އަމްރު، ވ.ރޯޝަން.

3.ޝާން ޞާލިޙް މުޙައްމަދު، ފިނިވާދީ/ދ.ކުޑަހުވަދޫ.

4.މަރިޔަމް ނަރީމާން ޝަރީފް، މުޝްތަރީގެ/ގދ.ތިނަދޫ.

5.މަރިޔަމް މުނާ، ބޯގަންވިލާ/ސ.ފޭދޫ.

މިފަރާތްތަކާއި ގުޅޭގޮތުން އެއްވެސް ޝަކުވާއެއްވާނަމަ 19 ފެބްރުއަރީ 2023 ވާ އާދިއްތަ ދުވަހުގެ 14:00 ގެ ކުރިން، ޝަކުވާ ހުށަހެޅުމަށް ވަނީ ހުޅުވާލައިފައެވެ.

އަދި ޝަކުވާ ހުށަހަޅާ ފަރާތުގެ ފުރިހަމަ ނަމާއި، ދާއިމީ އެޑްރެސް އަދި ގުޅޭނެ ޕޯން ނަންބަރު އެނގޭނެ ގޮތަށް އެ ޝަކުވާއެއް ކޮމިޓީގެ އީމެއިލް އެޑްރެސް [email protected] އަށް ނުވަތަ ރައްޔިތުންގެ މަޖްލީހުގެ އިދާރާއަށް ލިޔުމުން ފޮނުއްވުމަށް ވަނީ އިއުލާން ކޮށްފައެވެ.