ބީއެމްއެލްއަށް ފާޑުކިޔާ ނަމަ އިޤްތިޞާދު ފުނޑޭނެ: ޝަރީފު

ދިވެހި ރައްޔިތުންގެ ބޭންކު (ބޭންކް އޮފް މޯލްޑިވްސް) އަށް ފާޑުކިޔުމަކީ ރާއްޖޭގެ އިޤްތިޞާދު ފުނޑޭނެވަރުގެ ނުރައްކާތެރި ކަމެއްކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.

ޝަރީފު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ސައިބާ ކްރައިމްގެ އަމަލުތަކަކީ ކުށެއްކަމަށް ހެދުމަށް ޤާނޫނުލްޢުޤޫބާތަށް ހުށައެޅި އިސްލާހަށް މަޖިލީހުގައި ބަހުސްކުރައްވަމުން ނެވެ.

ޝަރީފު ވިދާޅުވީ އެ އިސްލާހަކީ ސަރުކާރުން ވަރަށް މާތް މަޤްޞަދެއްގައި ހުށައެޅި އިސްލާހެއް ކަމަށެވެ. އަދި އެކަމަށްޓަކައި ސަރުކާރަށް ޝުކުރުދަންނަވާ ކަމަށެވެ.

އެހެން ނަމަވެސް، އެފަދަ ކޮންމެ މައްސަލައެއްގައި ސަރުކާރު ޖަވާބުދާރީ ކުރުވުމުގެ ނަމުގައި ބޭންކް އޮފް މޯލްޑިވްސްއަށް އެއްޗެހި ކިޔަނީ ސިޔާސީ މަޤްސަދެއް އޮތުމުންކަމަށް ޝަރީފު ވިދާޅުވި އެވެ. އަދި ވިދާޅުވީ ބީއެމްއެލްއަށް ފާޑުކިޔައި އެ ބޭންކުގެ އަގު ވައްޓާލުމަށް މަސައްކަތް ކުރާނަމަ އޭގެ ސަބަބުން ރާއްޖޭގެ އިޤްތިޞާދަށް ވަރަށް ނުރަނގަޅު އަސަރުތަކެއް ނުރާނެ ކަމަށެވެ.

އެގޮތުން އެއީ ރާއްޖޭގެ އިޤްތިޞާދު ބަނގުރޫޓުވެދާނެ ކަމެއްގެ ގޮތުގައި ޝަރީފު ވަނީ ސިފަކުރައްވާފަ އެވެ.

"ސަރުކާރު ޖަވާބުދާރީ ކުރުމުގެ ނަމުގައި ދިވެހިރާއްޖޭގެ ރައްޔިތުންގެ ބޭންކު، ދިވެހިރާއްޖޭގެ ގައުމީ ބޭންކު ހުށައެޅޭ ކޮންމެ މައްސަލައަކާއި ވިދިގެން މި މަޖިލީސްގެ ތަޅުމުން ނަހަމަ ގޮތުގައި ބޭނުން ހިފައިގެން އެ ބޭންކު ސުންނާފަތިކޮށްލަން މި ކުރާ މަސައްކަތަކީ އަޅުގަނޑުމެން ހުރިހާ ދިވެހި ރައްޔިތުންވެސް ކަންބޮޑުވާން ޖެހޭ ކަމެއް. އެއީ މި ގައުމުގެ އިޤްތިޞާދު މުޅިން ފުނޑުފުނޑުވެގެން ހިގައިދާނެފަދަ ނުރައްކާތެރި ކަމެއް"

މަރަދޫ ދާއިރާގެ މެމްބަރު އިބްރާހިމް ޝަރީފު

އެމެރިކާގެ ދެ ބޭންކަކަށް ދިމާވި ގޮތުގެ މިސާލު ނަންގަވަމުން ޝަރީފު އިތުރަށް ވިދާޅުވީ އެ ބޭންކުތައް ބަނގުރޫޓުވުމުގެ ސަބަބުން އެމެރިކާގެ ފައިސާއަށް އަސަރުކުރުމުގެ ސަބަބުން އެ ގައުމުން އެކަންކަން ހައްލު ކުރުމަށް މަސައްކަތް ފަށާފައިވާކަމަށެވެ.

އެހެންކަމުން ރާއްޖޭގެ ރައްޔިތުންގެ ބޭންކެއްގެ ގޮތުގައި ހުރި ހަމައެކަނި ބޭންކު ބަދުނާމުވާ ގޮތަށް ވާހަކަ ދެއްކުމަކީ ދާދި އަވަހަށް އެ ބޭންކު ބަނގުރޫޓުވާނެ ކަމެއްކަމަށާއި، އެކަމުގެ ސަބަބުން އިޤްތިޞާދީގޮތުން ރާއްޖެއަށް އަރައިގަންނަންނަން އުދަނގޫ އަނދަވަޅަކަށް ވެއްޓިދާނެކަމަށް ޝަރީފު ވިދާޅުވި އެވެ.

ޝަރީފު މިފަދައިން ވިދާޅުވެފައި ވީނަމަވެސް، ބީއެމްއެލްގައި ހުންނަ އާންމު އެކައުންޓަކުގެ ފައިސާ ގެއްލޭ ގިނަ މައްސަލަތަކެއް ފެންމަތިވެ އާންމު ރައްޔިތުން ދަނީ ބޮޑެތި ކަންބޮޑުވުންތަކެއް ފާޅުކުރަމުން ނެވެ.

ފައިސާ ގެއްލޭ މައްސަލައިގައި ބޭންކުން އެހީތެރިކަން ފޯރުކޮށްނުދޭތީ އެތައް ބަޔަކު އެވާހަކަތައް ދައްކަމުންދާއިރު، އެފަދަ މައްސަލަތަކުގެ ޒިންމާ ނަގާނެ މުއައްސަސާއެއް ވެސް ނެތުމުގެ ކަންބޮޑުވުން މަޖިލީސް މެމްބަރުންވެސް ފާޅުކުރައްވާފައިވެ އެވެ.