ޖޭޕީގެ ނިންމުމާއެކު ދެން ރައީސް ޞާލިހަށް އެމްޑީޕީއަށް ވެރިކަން ހޯދައެއް ނުދެވޭނެ: އީވާ
ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވާދަކުރައްވަން ނިންމަވާފައިވާކަން އިއުލާނު ކުރުމުން، އެ އިންތިޚާބު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ކާމިޔާބު ނުކުރެވޭނެކަން ޔަގީން ކުރެވޭކަމަށް މަޖިލީހުގެ ނައިބު ރައީސާ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެ އެވެ.
އީވާ މިފަދައިން ވިދާޅުވެފައިވަނީ މަޖިލީހުގެ ރައީސް މުޙައްމަދު ނަޝީދުގެ ފިކުރެއްގެ ދިރުމުގެ ޕާލަމެންޓްރީ ގުރޫޕުން މިރޭ ބޭއްވި ބައްދަލުވުމުގައި ވާހަކަދައްކަވަމުން ނެވެ.
އީވާ ވިދާޅުވީ ރައީސް ޞާލިހު އެމްޑީޕީގެ ޕްރައިމަރީގައި ވެސް އެންމެ ގަދަޔަށް ދެއްކެވި ވާހަކައަކީ ކޯލިޝަން ހަދާ ވާހަކަ ކަމަށެވެ. ވެރިކަން ހޯދޭނީ ކޯލިޝަން ހަދައިގެން ކަމަށާއި، އެމަނިކުފާނަކީ ކޯލިޝަންގެ ރައީސްކަމަށް އަބަދުވެސް ވަކާލާތު ކުރައްވަމުން ގެންދެވިކަމަށް އީވާ ވިދާޅުވި އެވެ.
އެހެން ނަމަވެސް ޖޭޕީން އެމްޑީޕީ ކޯލިޝަނުން ބޭރުވެ، އެޕާޓީ އިސްވެ އޮވެ ހިންގާ ކޯލިޝަނެއްގެ ތެރެއިން ޕާޓީގެ ލީޑަރު ވާދަކުރައްވަން ނިންމެވުމުން، މި ސަރުކާރު ކޯލިޝަންގައި އޮތް އެންމެ މުހިންމު ހިއްސާދާރު ގެއްލުނީ ކަމަށާއި، އަދި މިހާރު އެމްޑީޕީގެ ރިޔާސީ ކެންޑިޑޭޓުގެ ފަހަތްޕުޅުގައި އޮތް ސިޔާސީ ޕާޓީތަކާއެކު ރިޔާސީ އިންތިޚާބު ކާމިޔާބު ނުކުރެވޭކަން ޔަގީންވެގެންދާ ކަމަށް އީވާ ވިދާޅުވި އެވެ.
"އަޅުގަނޑަށް ހީވަނީ މިހާރު އެމްޑީޕީގެ ހުރިހާ މެމްބަރުންނަށް ވެސް އަދި ރާއްޖޭގައި ވޯޓުލާން ތިބި ހުރިހާ އެންމެނަށް ވެސް ވަރަށް ސާފުވާނެ ދެން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި އެކު ގޮސްގެނެއް އެމްޑީޕީއަކަށް ރިޔާސީ އިންތިޚާބެއް ދެން ކާމިޔާބު ނުވާނެކަން. އެއީ ރައީސް ޞާލިހު ވިދާޅުވަމުން އެ އަންނަނީ ތިމަންނާއަކީ ކޯލިޝަންގެ ކެންޑިޑޭޓޭ. އަދި ފުރަތަމަ ނަންފުޅު އިއުލާނުކުރައްވަމުން ވެސް ވިދާޅުވި ތިމަންނަ ވެރިކަން ކުރައްވާނީ ކޯލިޝަނަކާ އެކުއޭ. އެހެން ނަމަވެސް ކޯލިޝަން ކޯލިޝަނަކަށް ހަދާދިން ޕާޓީ ކަމުގައިވާ ޖުމްހޫރީ ޕާޓީ އަމިއްލައަށް ވާދަކުރަން ނިންމުމާއެކު އަޅުގަނޑުމެން އެންމެނަށްވެސް އެނގޭ ދެން ރައީސް ޞާލިހުގެ އަމިއްލަ ބުރަދަނެއް ނެތްކަން ރިޔާސީ އިންތިޚާބު އެމްޑީޕީއަށް ކާމިޔާބުކޮށް ދިނުމަށް"
މަޖިލީހުގެ ނައިބު ރައީސާ އީވާ އަބްދުﷲ
އީވާ ވިދާޅުވީ ޖުމްހޫރީ ޕާޓީގެ އެ ނިންމުމަށް އެމްޑީޕީގެ ފިކުރެއްގެ ދިރުން ގޮފިން މަރުހަބާ ކިޔާ ކަމަށެވެ.
އަދި ކުރިއަށް ދުވަސްތަކުގައި ފިކުރެއްގެ ދިރުން ޕާލަމެންޓްރީ ގުރޫޕާއި ޖޭޕީގެ ޕީޖީ އާއެކު މަޝްވަރާތައް ފަށައި އެކުގައި ކުރިއަށް ދެވޭނެ ގޮތްތަކާއި މެދު މަޝްވަރާތައް ފައްޓަވާނެކަމަށް އީވާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
