"ލައިލަތުލް ޤަދްރީގެ އިޙްތިފާލް ތަކުގައި މަލާއިކަތްބޭކަލުން ބައިވެރިވެވަޑައިގަންނަވާ"

ލައިލަތުލް ޤަދްރީގެ އިޙްތިފާލް ތަކުގައި މަލާއިކަތްބޭކަލުން ބައިވެރިވެ ވަޑައިގަންނަވާ ކަމަށް މިއަދުގެ ޚުޠުބާގައި ބުނެފިއެވެ.

ޚުޠުބާގައި ބުނީ ލައިލަތުލް ޤަދްރީގެ އިޙްތިފާލް ތަކުގައި މަލާއިކަތްބޭކަލުން ބައިވެރިވެ ވަޑައިގަންނަވާ ކަމަށެވެ. އަދި އެބޭކަލުން ބިމަށް ފައިބާވަޑައިގެން، މުއުމިނުންނަށް މާތްالله ލައްވާފައިވާ ހެޔޮކަންތައް ދެކެވަޑައިގަންނަވާނެ ކަމަށެވެ.

ޚުޠްބާގައި ބުނީ ލައިލަތުލް ޤަދްރި ވަނީ ވަންހަނާކުރައްވާ ފައި ކަމަށެވެ. ނަމަވެސް އެކަމަށް ޝައުޤުވެރި ކުރުވުމަށްޓަކައި އެއީ ރަމަޟާން މަހުގެ ރެއެއްކަން ކަށަވަރުކޮށްދެއްވި ކަމަށާއި، އެ ރޭ ވަނީ ރަމަޟާންމަހުގެ ފަހުދިހައިގެ އޮނަހިރި ރެއެއްގައި ކަމަށްވެސް އިޝާރާތްކުރައްވާފައިވާކަމަށެވެ. އަދި މާތް الله މިފަދަ ވަގުތުތައް ވަންހަނާ ކުރައްވަނީ އެކަމަށް އަހަރެމެން ޝައުޤުވެރި ކުރެއްވުމަށް ޓަކައި ކަމަށެވެ.

"އަޅުގަނޑުމެން ފާއިތު ކުރަމުންމިދާ ދުވަސްތަކަކީ މަތިވެރި ދުވަސްތަކެއް، ބަރަކާތްތެރި ރޭތަކެއް، ރަމަޟާން މަހުގެ ފަހުދިހައިގެ ދުވަސްތަކާއި ރޭތައް، ކީރިތ ރަސޫލާ ޞައްލައްﷲ ޢަލައިހި ވަސައްލަމް އެކަލޭގެފާނުގެ އަނބިއަނބިކަނބަލުން ފަހު ދިހައިގެ ރޭތައް އިޙްޔާ ކުރެއްވުމަށްޓަކައި އަވަހާރަފުޅުން ނެންގެވި، އަދި އެކަލޭގެފާނުވެސް ފަހު ދިހައިގައި އަޅުކަން ކުރެއްވުމުގައި، އެހެންދުވަސްތަކަށްވުރެ ބޮޑަށް ހީވާގިވެވަޑައިގެން ގަދައަޅައި ހިއްމަތްކުރެއްވެވި" ޚުތުބާގައި ބުނެފައިވެއެވެ.

ފަހުދިހައިގައި މާތް الله މަތިވެރި ކުރައްވާފައިވާ ޤަދަރުވެރި ރެއެއް ވާކަމަށް ނަބިއްޔާ ޞައްލައްالله ޢަލައިހި ވަސައްލަމް ބަޔާންކުރައްވާފައިވާ ކަމަށާއި، އަދި އެރޭ ހޯދުމަށް، ފަހު ދިހައިގައި ގަދައަޅައި މަސައްކަތް ކުރުމަށް ލޮބުވެތި ރަސޫލާ ޞައްލައްالله ޢަލައިހި ވަސައްލަމް އިރުޝާދު ދެއްވާފައިވާ ކަމަށް މިއަދު ހުކުރު ޚުޠުބާގައި ބުނެފައިވެއެވެ. އެއީ ލައިލަތުލް ޤަދްރީގެ ނަމުން ނަންދެވިފައިވާ ބަރަކާތްތެރި، ޝަރަފުވެރި ރެއެއް ކަމަށާއި، އެރޭ ޝަރަފުވެރި ރެއަކަށްވީ އެރޭގައި ކީރިތި ޤުރުއާން ބާއްވައިލެއްވިފައިވާތީ ކަމަށް ޚުޠުބާގައި ބުނެފައިވެއެވެ.

ލައިލަތުލް ޤަދްރީގެ މާތްކަން ބަޔާން ކޮށްދެމުން ކީރިތި ޤުރުއާނުން ދަލީލް ގެނެސްދެއްވައި ޚުޠުބާގައި ބުނީ އެރޭގެ އަޅުކަން ކުރުން އެއްހަށް މަހުގެ އަޅުކަން ކުރުމާއި އެއްވަރުކަމަށެވެ. އަދި އެއީ ޘަވާބާއި ދަރުމައިގެ ގޮތުން ކަމަށް ޚުޠުބާގައި ބުނެފައިވެއެވެ.

"ލައިލަތުލްޤަދްރި އަކީ އަމާންކަމުގެ ރެއެއް، އެއީ ސުލްޙަ މަސަލަސްކަމުގެ ރެއެއް، އެރޭގައި ކޯފާ ލެއްވުމެއް ނެތް، ޢަޒާބު ދެއްވުމެއް ނެތް، މި އަމާންކަން ފަތިސްވެއްޖެއުމަށް ދާންދެން މި ބިމުގައި އޮންނާނެ" ޚުޠުބާގައި ބުނެފައިވެއެވެ.

މިފަދަ ރެއަކަށްޓަކައި އަޅުގަނޑުމެން ތައްޔާރުވާން ޖެހޭނީ ސާފުޠާހިރު ކަމާއި އެކުގައި ކަަމަށާއި، އިޚްލާސްތެރިކަމާއި ތެދު ނިޔަތާއި އެކުގައި ކަމަށާއި، އެއްވެސް މީހަކަށް ހަސަދަވެރިކަމެއް، ޢަދާވަތްތެރިވުމެއް ނެތި ކަމަށާއި، ބަދަލު ހިފުމުގެ ރޫޙާއި ދުރުހެލިވެތިބެ، މާތްالله ގެ ވަޖުހުފުޅު އަދައިގެން ކަމަށެވެ.