ގުންޑޮގާން ގެ ދެލަނޑާއެކު، މެންޗެސްޓާ ސިޓީއަށް ފަސޭހަ މޮޅެއް!

އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ފަސޭހަކަމާއި އެކު 3-0 ގެ ނަތީޖާއަކުން އެވަޓަން ބަލިކޮށް މެންޗެސްޓާ ސިޓީ ލީގު ތާވަލުގެ ކުރީގައި ހަތަރު ޕޮއިންޓުގެ ލީޑެއް ނަގައިފިއެވެ.

މިދިޔަ ހަފްތާގެ އަންގާރަދުވަހުގެ ރޭ ޗެމްޕިއަންސްލީގު ސެމީ ފައިނަލްގެ ފުރަތަމަ ލެގުގައި ރެއާލް މެޑްރިޑާއި ދެކޮޅަށް ކުޅުނު ފުރަތަމަ އެގާރައިގައި ހިމެނުނު މުހިންމު ގިނަ ކުޅުންތެރިންނަށް މިރޭގެ މެޗުގައި ސިޓީގެ ކޯޗު ޕެޕް ގާޑިޔޯލާ ވަނީ ރެސްޓުދީފައެވެ. އޭގެތެރޭގައި ޕޯޗުގަލްގެ މިޑްފީލްޑަރު ބެނާޑޯ ސިލްވާ އާއި ޖެކް ގްރިލިޝް ގެ އިތުރުން ކެވިން ޑިބްރޭނާ ފާހަގަކޮށްލެވެއެވެ.

މިރޭގެ މެޗުގެ ފުރަތަަމަ ހާފުގެ 37 ވަނަ މިނެޓުގައި ސިޓީއަށް ލީޑު ނަގައިދިނީ އެޓީމުގެ ޖަރުމަނު މިޑްފީލްޑަރު ގުންޑޮގާން އެވެ. މިއީ އެޓީމުގެ އަލްޖީރިއާ ފޯވާޑް ރިޔާދް މަހުރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ދެ މިނެޓު ފަހުން ސިޓީގެ ލީޑު ފުޅާކޮށްދިނީ އެޓީމުގެ ނޯވޭ ފޯވާޑް ހާލަންޑް އެވެ. މިއީ ގުންޑޮގާން ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިއީ މިސީޒަނުގައި ޕްރެމިއާ ލީގުގައި މޮޮޅު ކުޅުމެއް ދައްކަމުން އަންނަ ހާލަންޑް ލީގުގައި ކުޅުނު، 33 މެޗުގައި ސިޓީއަށް އޭނާ ކާމިޔާބުކޮށްދިން 36 ވަނަ ލަނޑެވެ. ދެވަަނަ ހާފުގެ 51 ވަނަ މިނެޓުގައި ސިޓީގެ ތިންވަނަ ލަނޑު ކާމިޔާބުކޮށްދިނީ ގުންޑޮގާން އެވެ.

މިއީ ލީގުގައި މެންޗެސްޓާ ސިޓީ އެންމެ ފަހުން ކުޅުނު ދެ މެޗުގައި އޭނާ ކާމިޔާބުކޮށްދިން ހަތަރު ވަނަ ލަނޑެވެ. އަދި މިރޭގެ މެޗުން ލިބުނު ތިން ޕޮއިންޓާއެކު ލީގު ކާމިޔާބުކުރުނަށް ބާކީ އޮތް ތިން މެޗުން ސިޓީއަށް މިހާރު ބޭނުންވަނީ ހަތަރު ޕޮއިންޓެވެ. އަދި މިއީ ލީގުގައި މެންޗެސްޓާ ސިޓީ ޖެހިޖެހިގެން މޮޅުވި 11 ވަނަ މެޗެވެ.

ލީގުގައި ކޮންމެ ޓީމަކަށް ބާކީ ތިން މެޗު އޮތްއިރު، މިރޭގެ މެޗުން ލިބުނު ތިން ޕޮއިންޓާއެކު 35 މެޗު ކުޅެގެން މެންޗެސްޓާ ސިޓީއަށް ވަނީ 85 ޕޮއިންޓް ލިބިފައެވެ. ދެވަނައިގައި އޮތް އާސެނަލް ވެސް 35 މެޗު ކުޅެފައިވާއިރު އެޓީމަށް ލިބިފައިވަނީ 81 ޕޮއިންޓެވެ. މިރޭގެ މެޗުން ބަލިވި އެވަޓަން ލީގުގައި 36 މެޗު ކުޅެގެން އެޓީމަށް ލިބިފައިވަނީ 32 ޕޮއިންޓާއެކު ތާވަލްގެ 17 ވަނައެވެ.