ރައީސް ޞާލިހަކީ މީހުން ހަޅޭ ލަވައިގަތީމަ، ގޮޑިން ފުންމާލާފަ ދާ ބޭފުޅެއް ނޫން: ޑރ. ޒާހިރު

އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިހަކީ، މީހުން ހަޅޭލަވައި، އެއްޗެހި ގޮވައި ގަތުމުން، "ގޮނޑިން ފުންމާލާފަ ވަޑައިގަންނަވާ ބޭފުޅެއް ނޫން" ކަމަށް އަދާލަތު ޕާޓީގެ އިލްމުވެރިންގެ މަޖިލީހުގެ މެންބަރު އަދި އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެއެވެ.

ރޭ މާފުށީގައި ބޭއްވި ރައީސް ޞާލިހުގެ ކެންޕެއިން ޖަލްސާގައި ވާހަކަދައްކަވަމުން، ޑރ. އަހްމަދު ޒާހިރު ވިދާޅުވީ ރައީސް ޞާލިހަކީ ރައްޔިތުން ކަންބޮޑުވެ ހާސްވާ ވަގުތު ތަކުގައި، އެއްވެސް ކަމެއް ނުކުރައްވައި، ރަޖާ އަޅުއްވައިގެން ފިއްްލަވައިގެން އޮންނަވާ ބޭފުޅެއް ނޫން ކަމަށެވެ. އެކަން ކޮވިޑްގެ ދަތި އުނދަގޫ ދުވަސްވަރު އެނގިގެން ދިޔަ ކަމަށްވެސް ވިދާޅުވި އެވެ.

"ކޮވިޑްގެ ދަތި އުނދަގޫ ދުވަސްވަރު، ރައީސް ޞާލިހު ކުރިމަތިލެއްވީ، ހިތްވަރާއި އެކީގައި. ކެތްތެރިކަމާއި އެކީގައި. ފަހަރެއްގައިވެސް، އެ ކަންބޮޑުވި ވަގުތު، މީހުން އުޅޭނެ ގޮތަކަށް އުޅެން ދޫކޮށްލައްވާފައި، ވަޑައިގެންނެވީއެއް ނޫން. އެންމެން ގޮވައިގެން، އެންމެނާއި އެކީގައި ސާބިތުވެ ހުންނެވީ. އެއީ ވެރިއެއްގެ ކިބައިގައި ހުންނަންޖެހޭ ސިފައެއް. މީހުން ހަޅޭލަވައި ގަތީމަ، ގޮޑިން ފުންމާލާފަ ދާ ބޭކަލެއް ނޫން. އެކަން ވަނީ ސާބިތުކޮށްދީފައި. ކަންބޮޑުވާ ގަޑީގައި ގޭގައި ރަޖާ އަޅައިގެން އޮންނަ ބޭކަލެއް ނޫން. އެކަން ވަނީ ކޮވިޑްގެ ހާލަތުގައި ރައީސް ސާލިހު ސާބިތުކޮށްދީފައި."

ޑރ. އަހްމަދު ޒާހިރު އަލީ

ޑރ. އަހުމަދު ޒާހިރު ވިދާޅުވީ ކޮވިޑުގެ ކޮވިޑުގެ ދަތި އުނދަގޫ ހާލަތުގައި ވެސް ފެނިގެންދިޔައީ، ރައީސް ޞާލިހު ގެ އަމިއްލަ ނަފްސަށް ވުރެ ރައްޔިތުންނަށް އިސްކަންދެއްވި ތަން ކަމަށެވެ. އެގޮތުން ކޮވިޑްގެ ހާލަތުގައި، އެމަނިކުފާނަށް ރާއްޖެއިން ބޭރަށް ވަޑައިގެން ވެކްސިން ޖެއްސެވުމުގެ ފުރުސަތު ލިބިވަޑައިގެންނެވި ނަމަވެސް އެކަން އެގޮތަށް ނުކުރައްވައި ރައްޔިތުންނަށް ވެސް ވެކްސިން ލިބޭނެ އިންތިޒާމު އެމަނިކުފާނު ހަމަޖެއްސެވި ކަން ފާހަގަކުރެއްވިއެވެ.

އަދާލަތު ޕާޓީން އެމްޑީޕީއާއެކު ކޯލިޝަން ހަދައިގެން އެއްވާނެއްގައި ރައީސް 2ވަނަ ދައުރަކަށް ހޮވުމަށް މަސައްކަތްކުރަނީ އެ ކޮލިޓީ ހުރުމުން ކަމަށް ޑރ.ޒާހިރު ވިދާޅުވިއެވެ.

ޑރ.ޒާހިރު އިތުރަށް ވިދާޅުވީ އުފާވެރި އަމާން ރާއްޖެ ހޯދައިދެވޭނީ ތަސައްވުރެއް އަދި ސިޔާސަތެއް އޮވެގެން ކަމަށާއި އެ ސިޔާސަތުތައް ހިއްޕަވައިގެން ވަޑައިގެންނެވީ ރައީސް ސާލިހު ކަމަށެވެ.