"މިހާނުބައި ބަޔަކަށް ދެވަނަ ދައުރެއް ދީފިނަމަ, ރާއްޖޭގައި އިސްލާމް ދީނެއް، އަމާންކަމެއް ނޯންނާނެ"

މިހާ ނުބައި ސަރުކާރަކަށް ދެވަނަ ދައުރެއް ދީފިނަމަ މި ދިވެހި ފަސްގަނޑުގައި އިސްލާމް ދީނެއް، މިނިވަންކަމެއް އަދި އަމާންކަމެއް ނޯންނާނެ ކަމަށް މަޝްހޫރު ދީނީ ޢިލްމުވެރިޔާ އައްޝެއިޚު އަބްދުالله ސައުދާން ވިދާޅުވެއްޖެ އެވެ.

"އުފާވެރި އަމާންރާއްޖެ" ސްލޯގަން ގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މާލެ އާއި އަތޮޅު ތަކުގައި ކެންޕެއިން ފައްޓަވާފައި ވާއިރު، އެކަމަށް އަމާޒު ކުރައްވައި ޝެއިޚް ސައުދާން ކުރެއްވި ޓްވީޓެއްގައި ވިދާޅުވީ، މިއީ ޢަދުލުވެރިކަމެއް އިންސާފެއް އިޚްލާޞްތެރިކަމެއް ނެތް ސަރުކާރެއް ކަމަށެވެ.

"މިހާނުބައި ބަޔަކަށް ދެވަނަ ދައުރެއް ދީފިނަމަ މިދިވެހި ފަސްގަނޑުގައި އިސްލާމް ދީނެއް މިނިވަންކަމެއް އަމާންކަމެއް ނޯންނާނެ." ސައުދާން ވިދާޅުވިއެވެ.

ސައުދާން މިފަދައިން ވިދާޅުވެފައި ވާއިރު، "އުފާވެރި އަމާން ރާއްޖެ" ރިޔާސީ ކެމްޕެއިނުގައި މާފުށީގައި ރޭ ބޭއްވި ކެމްޕެއިނު ޖަލްސާގައި ވާހަކަ ދައްކަވަމުން ރައީސް ޞާލިހް ވަނީ މި ސަރުކާރު ވެރިކަމަށް އައުމަށް ފަހު އެންމެ ފުރަތަމަ ކުރަންޖެހުނު ކަމަކީ ރާއްޖޭގައި އޮތް ހަލަބޮލިކަން ނައްތާލައި ރާއްޖެއަށް ހަމަޖެހުން ގެނައުމުގެ މަސައްކަތް ކަމަށެވެ. އަދި އޭގެ ނަތީޖާ މިހާރު ފެންނަމުންދާ ކަމަށާ މިއަދު ރާއްޖޭގެ ކޮންމެ ކޮޅަކުން ފެންނަމުން އެ ދަނީ ހަމަޖެހުމާއި އެ އަމާންކަން ކަމަށެވެ.

ރައީސް ޞާލިހު ގެ އިތުރުން އެމަނިކުފާނަށް ތާއީދު ކުރައްވާ، އަދާލަތު ޕާޓީއާއި އެމްޑީއޭގެ އިސް ބޭފުޅުންނާއި އެކްޓިވިސްޓުންވެސް އަންނަނީ ރައީސް ޞާލިހަކީ އަދުލުވެރި ކަމަށް ލޯބި ކުރާ، ރާއްޖެއަށް އަމާންކަން ގެނެސްދެއްވި ރައީސް އެއް ކަމަށް ސިފަ ކުރައްވަމުންނެވެ.

އެހެން ނަމަވެސް، އެމަނިކުފާނުގެ މި ވެރިކަމުގައި، އަނިޔާވެރި އެތައް ގަތުލެއް ހިނގާފައިވާއިރު، އެ ގަތުލު ތަކަކީ ރާއްޖޭގެ ތާރީޚުގައި ވެސް މިހާތަނަށް ހިނގައިވާ އެންމެ އަނިޔާވެރި ގަތުލު ތަކުގެ ތެރޭގައި ހިމެނޭކަން ފާހަގަކޮށްލަންޖެހެއެވެ.

އަދި އެމަނިކުފާނަކީ އިންސާފުވެރިކަމަށް ލޯބިކުރާ، އިންސާފުވެރި ރައީސް އެއް ކަމަށް ސިފަ ކުރާއިރު، އެމްއެމްޕީއާރުސީގެ ޚިޔާނާތުގެ މައްސަލަ ސާބިތުވެފައިވާ އެއްބައި މީހުން މިނިވަންކޮށް އަނެއް ބައެއްގެ މައްޗަށް ދައުވާ ހިނގަމުންދާތީ، ގިނަބަޔަކު އަންނަނީ މި ވެރިކަމުގައި އެއްވެސް އަދުލެއް އިންސާފެއް ނެތް ކަމަށް ބުނަމުންނެވެ.