އެމްޑީޕީގެ މައި ރަށްރަށުން ޑރ. މުޢިއްޒު އަށް ހޫނު މަރުހަބާއެއް!

ރިޔާސީ އިންތިޚާބާއި މަޖިލިސް އިންތިޚާބުގައިވެސް އެމްޑީޕީގެ ބޮޑު އަގުލަބިއްޔަތު އޮތް ބޮޑު ތިލަދުންމަތީގެ ރަށްރަށުން، އިދިކޮޅު ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުޢިއްޒު އަށް ހޫނު މަރުހަބާއެއް ކިޔައިފި އެވެ.

ރިޔާސީ އިންތިހާބުގެ ކެމްޕެއިނަށް ޑރ. މުޢިއްޒު ބޮޑު ތިލަދުންމައްޗަށް ކުރައްވަމުން ގެންދަވާ ދަތުރުފުޅުތަކުގެ ތެރެއިން ރޭ އެމްޑީޕީގެ މެޖޯރިޓީ އޮންނާ އިހަވަންދޫ އަށް ވަޑައިގެންފައި ވާއިރު، މިއަދު ވަނީ ހޯރަފުށްޓަށް ވަޑައިގެންފައެވެ.

މުއިއްޒު ރޭ އިހަވަންދޫ އަށް ވަޑައިގެންނެވިއިރު އޭނާއަށް މަރުހަބާ ކިޔަން އިހަވަންދޫ ބަނދަރުން ފެށި ސަފުތައް ރަށުތެރެއާއި ހަމައަށް ވަނީ ދަމާލާފައެވެ.

އިހަވަންދޫގެ ދަތުރުފުޅަށްފަހު މިއަދު ހޯރަފުށްޓަށް ވަޑައިގެންނެވިއިރު އެރަށް ވެސް ވަނީ މުޢިއްޒުއަށް މަރުހަބާ ދެންނެވުމަށް ވަރަށް ބޮޑަށް ތައްޔާރުކޮށްލާފައެވެ.

އެގޮތުން މުއިއްޒު އަށް މަރުހަބާ ދެންނެވުމަށް ހޯރަފުށީ ބަނދަރު މައްޗަށް ގިނަ ބަޔަކު ޖަމާވެ ސަފުތައް ފުރާލާފައިވާއިރު،  ހޯރަފުށީ ބަނދަރު ސަރަހައްދު އޮތީ ޕީޕީއެމްގެ ދިދަ ޖަހައި ޖަރީކޮށްލާފައެވެ.

ހޯރަފުއްޓާއި އިހަވަންދޫ އަކީވެސް މިދިޔަ 2018 ވަނަ އަހަރުގެ ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިހް އަޣުލަބިއްޔަތު ހޯދި ދެ ރަށެކެވެ. އަދި 2019 ވަނަ އަހަރުގެ ރައްޔިތުން މަޖިލިސް އިންތިހާބުގައިވެސް އިހަވަންދޫ އާއި ހޯރަފުށީ ދާއިރާގެ މެންބަރުކަން ވެސް ހޯދީ އެމްޑީޕީ އަށް ނިސްބަތްވާ ބޭފުޅުންނެވެ.

ނަމަވެސް ކައުންސިލް އިންތިހާބާއި ހަމައަށް ދިޔައިރު އިހަވަންދޫގެ ރީދޫ ކުލަ އޮތީ ޕީޕީއެމްގެ ފިޔާތޮށިކުލަ އަށް ބަދަލުވެފަ އެވެ. އެގޮތުން އިހަވަންދޫ ކައުންސިލްގެ ފަސްގޮނޑިވެސް ކާމިޔާބު ކުރެއްވީ އިދިކޮޅު ޕީޕީއެމް އިންކަން ފާހަގަކޮށްލަން ޖެހެއެވެ.

މި ދެރަށުންވެސް އިދިކޮޅު ކެންޑިޑޭޓަށް މިހާ ބޮޑު ތާއީދެއް ލިބިގެން ގޮސްފައި މިވަނީ މިސަރުކާރުން އެ ދެރަށަށް ވެފައިވާ ވައުދުތައް ނުފުއްދުން ކަމަށް ރަށުގެ ރައްޔިތުން ބުނެއެވެ.

އެގޮތުން އިހަވަންދޫ ގައި އާހޮސްޕިޓަލެއް އަޅައި، މަސް ފެކްޓްރީއެއް އަޅަން ވީވައުދުތައް ނުފުއްދި އިހަވަންދޫ މަސްވެރިންނަށް ވަމުންދާ ގެއްލުން ތަކަކީ ސަރުކާރަށް އޮތް ތާއީދު ދަށްވެގެން ދިޔަ ސަބަބެއް ކަމުގައި ބެލެވެއެވެ.

އަދި ހޯރަފުއްޓަށް މިސަރުކާރުންވި ވައުދު ތަކުގެ ތެރެއިން އެ ރަށުގައި އަޅަން ވައުދުވި ހޮސްޕިޓަލާއި، ކައުންސިލްގެ އިމާރާތާއި، މަގު ހެދުމުގެ މަސައްކަތް ނުނިމި ދިގުލައިގެން ދިއުމަކީ ރަށު ރައްޔިތުން ފާހަގަ ކުރާ ކަންކަމެވެ.

އޭގެ އިތުރުން ޕޮލިސް ސްޓޭޝަނާއި، ބޯޓު ޔާޑާއި، ސްކޫލްގައި އަޅަން ވައުދުވި ހަތަރު ބުރީގެ އިމާރާތުގެ މަސައްކަތް ވެސް ނުފެށެއެވެ.