ކުރެވޭ ތުހުމަތުތަކުގެ ޖަވާބު އަޅުގަނޑުގެ މާޒީން ލިބޭނެ: ޑރ މުއިއްޒު
ރިޔާސީ އިންތިހާބުގެ ދެވަނަބުރަށް ކުރިއަށް މި އޮތް 16 ވަރަކަށް ދުވަހުގެ ތެރޭގައި އެމަނިކުފާނާއި ބެހޭގޮތުން ތަފާތު ވާހަކަތައް ފަތުރާނެކަމަށާއި އެހެން ނަމަވެސް އެމަނިކުފާނާއި ގުޅޭގޮތުން ކުރެވޭ ހުރިހާ ތުހުމަތުތަކެއްގެ ޖަވާބު އެމަނިކުފާނުގެ މާޒިން ލިބިގެންދާނެ ކަމުގައި ޑރ މުއިއްޒު ވިދާޅުވެއްޖެއެވެ.
ރޭ މާލޭގައި ބޭއްވި ރިޔާސީ އިންތިހާބުގެ ދެވަނަބުރުގެ ކެމްޕެއިންގައި ޖަލްސާއެއްގައި ވާހަކަ ދައްކަވަމުން ޑރ މުއިއްޒު ވިދާޅުވީ، ވަރަށް ގިނަ ފަރާތްތަކުން ޕީޕީއެމް ޕީއެންސީގެ ވެރިކަމެއްގައި މި ސަރުކާރުުން ދީފައި ވަޒީފާތައް އަތުލާނެ ކަމުގެ ވާހަކަތައް ދެކެވެމުންދާތީ އެކަމާމެދު ގިނަ ބަޔަކު ސުވާލު ކުރަމުންދާކަމުގައެވެ.
މިގޮތުން އިންތިހާބާއި ކައިރިކޮށް ސަރުކާރުން މިނެއް ނުބަލައި ވަޒީފާތައް ބަހާލަމުންދާ ދިއުމަށް އިޝާރާތްކުރައްވައި މުއިއްޒު ވިދާޅުވީ އެމަނިކުފާނުގެ ސަރުކާރެއްގައި ސިޔާސީ މަގާމެއް ފިޔަވައި އެއްވެސް މީހެއްގެ ވަޒީފާއެއް އަތު ނުލައްވާނެ ކަމުގެ ޔަގީންކަން އަރުވާކަމަށެވެ.
ހަމަ އެޔާއެކު ސަރުކާރުގެ ބިންވެރިޔާ ސްކީމުގެ ދަށުން ދީފައިވާ ގޯތިތަކަށް ޕީޕީއެމް ޕީއެންސީގެ ސަރުކާރެއްގައި ހަދާނީ ކިހިނެތްތޯވެސް މީހުން ސުވާލު ކުރަމުން އަންނަ ކަމުގައެވެ.
ގޭގެއަށް ދިޔައީމަ މި ސުވާލު ކުރަނީ ތިމަންނަ މެންނަށް ލިބިފައިހުރި ގޯތިތައް، އަދި ދޭނެ ކަމަށް ލިސްޓެއްގައި ޖަހާފައިހުރި ގޯތިތައް އަދި ބިމުން މައްޗަށް ނާރައިހުރި ގޯތިތައް އަދި ލިބިފައިހުރި ފްލެޓްތައް އަޅުގަނޑުމެން އައިއްސިޔާ ހަމަ ދޭނިހޭ ނުވަތަ އަތުލާނީހޭ
ޑރ މުހައްމަދު މުއިއްޒު
މިފަދަ ސުވާލުތައް އުފެދެނީ އެކަންކަމާއި ގުޅިގެން ރައްޔިތުންގެ ތެރޭގައި ދޮގޮ ވާހަކަތައް ތަކުރާރު ކުރަމުންދާތީ ކަމުގައި ވިދާޅުވެ ޑރ މުއިއްޒު ވިދާޅުވީ އެމަނިކުފާނުގެ ސަރުކާރެއްގައި ރައްޔިތުންނަށް ލިބިފައި އޮތް އެއްޗެއްވެސް އަދި ލިބެން އޮތް އެއްޗެއްވެސް އަތުނުލާނެ ކަމަށެވެ.
ރިޔާސީ އިންތިހާބުގެ ދެވަނަބުރުގެ ވޯޓުލުން މިމަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު އިންތިހާބުގެ ދެވަނަބުރުގައި އެކުގައި މަސައްކަތް ކުރުމަށް އެމްއެންޕީން މިހާރު ވަނީ އިދިކޮޅު ޕީޕީއެމް ޕީއެންސީ ކޯލިޝަނާއެކު އެއްބަސްވެފައެވެ.
އިންތިހާބުގެ ފުރަތަމަ ބުރުގައި ވާދަކުރާ ނާކާމިޔާބުވެ ވަޑައިގެން އިތުރު އެއްވެސް ކެންޑިޑޭޓެއް ދެވަނަ ބުރުގައި މަސައްކަތް ކުރާނެ ޕާޓީއެއް އަދި އިއުލާންކޮށްފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
