ރައީސް ޔާމީން މިނިވަންކުރަން އެންމެ ބޮޑަށް އެދެނީ އަޅުގަނޑު: ނާޒިމް
ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމު ޖަލުން މިނިވަންކުރުމަށް އެންމެ ބޮޑަށް ބޭނުންވަނީ އެމަނިކުފާނު ކަމަށް މޯލްޑިވްސް ނެޝަނަލް ޕާޓީގެ ރައީސް އަދި މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމް ވިދާޅުވެއްޖެ އެވެ.
ނާޒިމް މިފަދައިން ވިދާޅުވެފައި ވަނީ އއ ފެރިދޫގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަފުޅު ދައްކަވަމުން ނެވެ.
އެ ޖަލްސާގައި ވާހަކަދައްކަވަމުން ނާޒިމް ވިދާޅުވީ ރައީސްކަން ކުރައްވާފައި ތިއްބެވި ބޭފުޅުން، ބަދަލުވާ ވެރިކަމާއެކު ޖަލަށް ލުމަކީ އެމަނިކުފާނު އެއްގޮތަކަށް ވެސް ތާއީދުކުރައްވާ ސިޔާސަތެއް ނޫން ކަމަށެވެ. އަދި ޝަރުއީ ނިޒާމު ވަކިގޮތަކަށް ބައްޓަންކޮށް، ވަކި މީހަކަށް އަނިޔާކުރުމަށް ޝަރުއީ ނިޒާމުގެ ބޭނުން ނަހަމަގޮތުގައި ހިފުމަކީ ނިމުމަކަށް ގެންނަން ޖެހޭ ކަމެއްކަމަށް ޤަބޫލުކުރައްވާ ކަމަށެވެ.
އެކަން ފާހަގަކުރައްވާ ނާޒިމް ވިދާޅުވީ މި ސަރުކާރުން ރައީސް ޔާމިނު ޖަލުގައި ބަހައްޓަވަނީ "ސެލެކްޓިވް ޖަސްޓިސް" ގެ އުސޫލުން ކަމަށެވެ. ރައީސް ޔާމިނު ޖަލުގައި ހުންނަވާ ހުންނެވުމަކީ ހިތާމަ ކުރައްވާ ކަމެއް ކަމަށާއި، އެމަނިކުފާނު ޖަލުން ސަލާމަތްކުރުމަށް އެންމެ ބޮޑަށް ބޭނުންފުޅުވާ ބޭފުޅަކީ އެމަނިކުފާނު ކަމަށް ނާޒިމް ވިދާޅުވި އެވެ.
"އަޅުގަނޑޭ އެންމެ ބޮޑަށް ބޭނުންވަނީ ރައީސް ޔާމީން މިނިވަންކުރަން، އަޅުގަނޑެއް ނޭދެމޭ ރައީސުލްޖުމްހޫރިއްޔާކަން ކުރެއްވި ބޭފުޅެއް ޖަލުގައި އޮންނާކަށް"
އެމްއެންޕީގެ ރައީސް ނާޒިމް
ނާޒިމްގެ ވާހަކައިގައި ވަނީ ރިޔާސީ އިންތިޚާބުގެ ދެވަނަ ބުރުގައި އެމްއެންޕީން ޕީޕީއެމް-ޕީއެންސީގެ ރިޔާސީ ކެންޑިޑޭޓަށް ތާއީދުކުރުމަށް ނިންމާ، ދެ ޕާޓީގެ ދެމެދުގައި ހެދި ކޯލިޝަން އެއްބަސްވުމާއި ގުޅޭގޮތުން ދެކެވެމުންދާ ވާހަކަތަކަށް ވެސް ރައްދުދެއްވާފަ އެވެ.
އެގޮތުން ނާޒިމް ވިދާޅުވީ ރިޔާސީ އިންތިޚާބުގެ ދެވަނަ ބުރުގައި ޑރ މުއިއްޒަށް ތާއީދުކުރައްވަން ނިންމަވާ ހެދި ކޯލިޝަން އެއްބަސްވުމުގައި އެއްވެސް ޝަރުތެއް ހިމަނާފައި ނުވާނެ ކަމަށެވެ. އަދި ވަކި ކަމަކަށް ހުށައަޅާފައި ވެސް ނުވާނެ ކަމަށެވެ.
އެމްއެންޕީން ޑރ މުއިއްޒަށް ތާއީދުކުރަން ނިންމީ ޤައުމީ މަސްލަހަތަށް ވިސްނާ، ގައުމު ސަލާމަތްކުރުމުގެ ބޭނުމުގައި ކަމަށް ނާޒިމް ވިދާޅުވި އެވެ. އަދި އެ މަސައްކަތުގައި ދެމިހުންނަވާނެ ކަމުގެ ޔަގީންކަން ވެސް ނާޒިމް ވަނީ ދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
