ވަކި ރަށަކަށްވީތީ ތަފާތުކުރުންތައް ނުގެންގުޅޭނަށް: ޑރ މުއިއްޒު
ޕީޕީއެމް ޕީއެންސީގެ ސަރުކާރެއްގައި ވަކި ރަށަކަށްވީތީ ތަފާތު ކުރުމުގެ އުސޫލެއް ނުގެންގުޅޭނެ ކަމަށާއި ހުރިހާ ރަށަކަށްވެސް އެ ރަށެއްގެ އާބާދީއާއި، އެރަށެއްގެ ޖާގައިގެ އިތުރުން ތަރައްގީއާއި ގުޅުންހުރި ކަންކަމަށް ވިސްނައިގެން ހުރިހާ ރަށްތަކަށްވެސް ކަންކަން ކޮށްދެއްވާނެ ކަމުގައި އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
ދެވަނަބުރުގެ ކެމްޕެއިންގައި އަރިއަތޮޅަށް ކުރައްވާ ދަތުރުފުޅުގައި އެ އއ ފެރިދުއަށް މިއަދު ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ، ފެރިދުއަށް ބޭނުންވާ ގިނަ ކަންކަމުގައި އެ ރަށުގެ ރައްޔިތުންގެ އުއްމީދުތަކެއް އެބަ ހުރިކަމަށާއި އެކަންކަން ހާސިލްކޮށްދީ އެ އުއްމީދުތަކުގައި ކުލަ ޖައްސައިދިނުމަށް ޕީޕީއެމް ޕީއެންސީގެ ސަރުކާރެއްގައި މަސައްކަތް ކުރާނެ ކަމަށެވެ.
މުއިއްޒުގެ ވާހަކަފުޅުގައި ވިދާޅުވީ، ފެރިދޫގެ ރައްޔިތުން އެދޭފަދަ އިން އެ ރަށުގައި ޒަމާނީ އިންޑޯރ ކުޅިވަރުތައް ކުޅެވޭނެ ޔޫތް ސެންޓަރެއް ޖިމެއް ހިމެނޭހެން ގާއިމްކޮށްދެއްވާނެ ކަމަށެވެ. އަދި ފެރިދޫގެ ތައުލީމީ ނިޒާމު ވަރުގަދަކުރުމަށްތަކައި އެ ރަށުގެ ގިނަ ރައްޔިތެއްގެ އެދުމެއް ކަމަށްވާ މަތި ސާނަވީއަށް ކިޔެވޭ އިންތިޒާމުތައް އެރަށުގައި ގާއިމްކޮށްދެވިގެން ދާނެ ކަމުގައި ޑރ މުއިއްޒު ވަނީ ވިދާޅުވެފައެވެ.
ހަމަ އެޔާއެކު ފެރިދޫ ރަށްގިރުމުގެ މައްސަލަ ހައްލުކުރުމުގެ މައްޗަށް އަލި އަޅުވާލައި ޑރ މުއިއްޒު ވިދާޅުވީ، ޕީޕީއެމް ޕީއެންސީގެ ތަސައްވުރަކީ އެ މަސައްކަތްތައް ކައުންސިލްމެދުވެރިޖޮށް ފަތުރުވެރިކަމުގެ ގްރީން ޓެކްސް އިން ލިބޭ ފައިސާއިން ކުރުން ކަމުގައިކަމަށެވެ.
އަޅުގަނޑުމެން ވިސްނާފައި މިއޮތީ ލާމަރުކަޒީ ނިޒާމުގެ ތެރެއިން އެކަން ކުރާ ގޮތަށް، އެއީ ޓުއަރިޒަމް އިން މި ނެގޭ ގްރީން ޓެކްސް ފައިސާ ކައުންސިލްތަކަށް ލިބޭ ގޮތަށް ނިޒާމު މިއޮތީ، އެހެންވީމަ އެ ފައިސާއިން ރަށްރަށުގެ ރަށްގިރުމުގެ މައްސަލަތަކާއި ކުނި މެނޭޖުކުރުމުގެ މައްސަލަތައް ހައްލުކުރުމަށް އަޅުގަނޑުމެން ވިސްނާފައި މިއޮތީ
ޑރ މުހައްމަދު މުއިއްޒު
އެހެންކަމުން ފެރިދޫގެވެސް ރަށްގިރުމުގެ މައްސަލަ ހައްލުކޮށްދެއްވާނެކަމަށް ޑރ މުހައްމަދު މުއިއްޒު ވަނީ ވިދާޅުވެފައެވެ.
އަރިއަތޮޅަަށް މިއަދު ކުރައްވާ ދަތުރުފުޅުގައި އެ އަތޮޅުގެ 9 ރަށަކަށް ޑރ މުއިއްޒު އާއި ކެމްޕެއިން ޓީމުން ޒިޔާރަތްކުރުމަށް ވަނީ ހަމަޖެހިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
