ގިނަ ފަހަރަށް ނުބައި ކަންކަމުގެ އަވާގައި ޖެހެނީ ރަހުމަތްތެރިންގެ ސަބަބުން: ޚުތުބާ

ރަހުމަތްތެރިކަންގެ ފަރާތުން ކުރާ ހެޔޮ ކަންތައްތަކުގެ އަސަރަށްވުރެ ނުބައި ކަންތައްތަކުގެ އަސަރު ޢާއްމު ގޮތެއްގައި މާ ވަރުގަދަ ކަމަށާ، ގިނަ ފަހަރަށް ނުބައި އަމަލުތަކުގެ އަވާގައި ޖެހެނީ ރަހުމަތްތެރިންގެ ސަބަބުން ކަމަށް މިއަދުގެ ޚުތުބާގައި ބުނެފިއެވެ.

ހެޔޮލަފާ ރަހުމަތްތެރިން ޚިޔާރު ކުރުމުގެ މުހިއްމުކަމަށް އަލި އަޅުވާލައި މިއަދު އިއްވި ޚުތުބާގައި ބުނީ، ތެދުވެރި ރަހުމަތްތެރިން ޚިޔާރު ކުރުމަކީ އިސްލާމްދީން އެކަމަކަށް ގޮވާލައި އަދި ބާރު އަޅުއްވާކަމެއް ކަމަށެވެ. އަދި އެފަދަ ރަހުމަތްތެރިކަން ގާއިމްކޮށް މާތް ﷲ އަށްޓަކައި އެކަން ދެމެހެއްޓުމަށް އިސްލާމްދީން ގޮވާލާކަމަށްވެސް ޚުތުބާގައި ބުނެފައިވެއެވެ.

"މާތް ﷲ ގެ ހިޔާވަހިކަން ނޫން ހިޔާވަހިކަމެއް ނުވާނެ ދުވަހުގައި، ހަތް ބައެއްގެ މީހުންނަށް އެކަލާނގެ އެކަލާނގެ ޢަރުޝީގެ ހިޔާވަހިކަން ދެއްވާނެއެވެ. މި ހަތް ބައިގެ ތެރޭގައި ހިމެނޭ އެއް ބަޔަކީ މާތް ﷲ އަށްޓަކައި އެކަކު އަނެކަކު ދެކެ ލޯބިވާ މީހުންނެވެ." ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ، މާތް ﷲ ގެ ވަޖުހުފުޅައްޓަކައި ލޯބިވާ މީހާއަކީ އެކަލާނގެ އަމުރުފުޅުތަކަށް ކިޔަމަންގަންނަ މީހަކަށް ވާންޖެހޭ ކަމަށެވެ. އަދި މީހަކު ދެކެ ލޯބިވާ ނަމަ ލޯބިވާން ޖެހޭނީ މާތް ﷲ ގެ ވަޖުހުފުޅައްޓަކައި ކަމަށާ، އަދި ނަފްރަތު ކުރާނަމަ ނަފްރަތު ވެސް ކުރަންވާނީ އެކަލާނގެ ވަޖުހުފުޅައްޓަކައި ކަމަށް ޚުތުބާގައި ބުންޏެވެ.

"މީހެއްގެ ފަރާތުން ލިބިދާނެ ފައިދާއަށްޓަކައި، ނުވަތަ މީހެއްގެ ކިބައިގައި ހުރި މޮޅުކަމަކަށްޓަކައި އެމީހެއްގެ ދެކެ ލޯބިވުމަކީ އެހެން ބާވަތެއްގެ ރަހުމަތްތެރި ކަމެކެވެ. މާތް ﷲ ގެ ވަޖުހުފުޅައްޓަކައި މީހަކު ލޯބިވާ ލޯބިވުމުގެ ނަތީޖާ ފެންނާނީ އެކަމުގައި ހުރި އިޚްލާޞްތެރި ކަމުގެ ސަބަބުންނެވެ. މާތް ﷲ އަށްޓަކައި ލޯބިވާ ދެ އެކުވެރިން ތިބޭނީ، މާތް ﷲ ހިމާޔަތާއި ރައްކާތެރިކަމުގައެވެ." ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ، ރަޙްމަތްތެރިކަމުގެ ގުޅުމަކީ ވަރަށް ވަރުގަދަ، ވަރަށް ނުފޫޒުގަދަ ގުޅުމެއް ކަމަށެވެ. އެހެންކަމުން ރަޙްމަތްތެރީން އިޚްތިޔާރު ކުރާއިރު، ޚުލްޤު ހެޔޮ ރަނގަޅު މީހުން ނޫނީ އިޚްތިޔާރުކޮށްގެން ނުވާނެ ކަމަށެވެ. އަދި މިޒާޖުގައި ރަޙުމަތްތެރިންނާއި، އެކުވެރިން ކޮޕީކުރާގޮތް ހުންނަ ކަމަށާ، އެކަކުގެ ނުބައި އަޚްލާޤުން އަނެކާއަށް ނުބައި އަސަރު ފޯރުވާ ކަމަށް ވެސް ޚުތުބާގައި ބުނެފައިވެއެވެ.

"އަހިވަކާއިޖެހި، އަހިވައް ފާވާ ގޮތަށެވެ. ހެޔޮ ކަންތައްތަކުގެ އަސަރަށްވުރެ ނުބައި ކަންތައްތަކުގެ އަސަރު ޢާއްމު ގޮތެއްގައި މާ ވަރުގަދައެވެ. ވަރަށް ގިނަ ފަހަރަށް ސިނގިރެޓް ބުއިން ފަދަ. ނުބައި ޢަމަލުތައް ދަސްވަނީ ތިމާގެ ރަޙްމަތްތެރިޔާގެ ކިބައިންނެވެ. މަސްތުވާތަކެތީގެ ދަލުގައި ޖެހެނީ، ރަޙްމަތްތެރީންގެ ސަބަބުންނެވެ. އިސްލާމްދީން މަނާކުރާ، ފާޙިޝް ޢަމަލުތަކުގެ އަވައިގާ ޖެހެނީ ރަޙްމަތްތެރީންގެ ސަބަބުންނެވެ." ޚުތުބާގައި ބުނެފައިވެއެވެ.