ރ. ފުޓްސަލްގެ ހަމަނުޖެހުން؛ ޖުމުލަ 16 މީހުންނަށް ފަރުވާ ދިފައިވޭ: ފުލުހުން

އިއްޔެ ހަވީރު ރ. އިނގުރައިދޫގައި ކުޅުނު ރ އަތޮޅު ފުޓްސެލް ފިއެސްޓާ ފައިނަލް މެޗު ހޫނުވެ އެ މެޗުގައި ވާދަކުރި ދުވާފަރާއި އިނގުރައިދޫގެ ސަޕޯޓަރުންގެ މެދުގައި ހިނގި ހަމަނުޖެހުންތަކާ ގުޅިގެން ޖުމުލަ 16 މީހަކަށް ފަރުވާދީފައިވާ ކަމަށް ފުލުހުން ބުނެފިއެވެ.

ފުލުހުން މިއަދު ބުނީ، އިއްޔެގެ ހަމަނުޖެހުުމުގައި ޖިސްމާނީ އަނިޔާތައް ވެގެން 14 އަހަރުގެ ފިރިހެން ކުއްޖަކާއި 39 އަހަރުގެ އަންހެނަކަށް ފަރުވާ ދީފައިވާ ކަމަށެވެ.

އަދި 18 އަރުން ދަށާއި އެއަށްވުރެ ދޮށީ މީހުން ހިމެނޭ ގޮތަށް އިތުރު 14 މީހަށް ފަރުވާން ދޭން ޖެހުނު ކަމަށާ، އެމީހުންނަށް ފަރުވާ ދޭންޖެހުނީ ހަމަނުޖެހުމުގެ ސަބަބުން ވަރަށް ބޮޑަށް ބިރުގަނެ ބޮލަށް އެނބުރުން އެރުން ފަދަ ކަންކަން ދިމާވެގެން ކަމަށްވެސް ފުލުހުން ބުނެފައިވެއެވެ.

މީގެ އިތުރުން، އިއްޔެގެ އެ ހަމަނުޖެހުންތަކާ ގުޅޭ މައްސަލަ ބަލައި ތަހުގީގު ކުރަމުން ދިޔަ ނަމަވެސް މިހާތަނަށް މީހަކު ހައްޔަރު ކޮށްފައި ނުވާ ކަމަށް ވެސް ފުލުސް އިދާރާއިން ބުންޏެވެ.

ސަޕޯޓަރުންގެ މެދުގައި ހަމަނުޖެހުން ބޮޑުވާން މެދުވެރިވި ސަބަބާއި ގުޅޭގޮތުން "ވޮއިސް" އަށް މައުލޫމާތު ދެއްވަމުން އިނގުރައިދޫ ކައުންސިލްގެ ނައިބުރައީސް ފާތުމަތު އިޝްމާ ވިދާޅުވީ މަޝްރަހު ގޯސްވީ ދުވާފަރު ސަޕޯޓަރަކު އެއްލި ފުޅިއަކުން އިނގުރައިދޫ ސަޕޯޓަރެއްގެ(އަންހެނެއް) ބޮލުގައި ޖެހި އޭނާގެ ބޯ ފަޅައިގެން ދިޔަ ހިސާބުންކަމަށެވެ.

"ހޫނުވީ ދުވާފަރަށް ލަނޑެއް ޖެހުމުން، އެއައި ފޯރީގައި ވެލި އަޅާފައި އޮތް ފުޅިއެއް އެއްލީ. އެ ފުޅި ޖެހުނީ އިނގުރައިދޫ ޓީމުގެ އަންހެން ސަޕޯޓަރެއްގެ ބޮލުގައި، ޖެހި ބޯ ފަޅައިގެން ދިޔައީ" އިނގުރައިދޫ ކައުންސިލްގެ ނައިބުރައީސް ފާތުމަތު އިޝްމާ ވިދާޅުވިއެވެ.

އެފަހުން، ސަޕޯޓަރުން ގަލާއި ލަކުޑި ބުރިއާއި، ދަނގަޑާއި އުކަމުން ދިޔަކަމާއި، އެގޮތަށް އަމަލުކުރަމުން ދިޔައީ އެތަނުގައި ތިބި ކުޑަކުދިންނަށްވެސް ބެލުމެއް ނެތިކަމަށް އޭނާ ވިދާޅުވިއެވެ.

އިޝްމާ ވިދާޅުވީ މަޝްރަހު ހޫނުވެދާނެތީ، އެ ސަރަހައްދުގެ ސެކިއުރީ ކަންކަން ބެލެހެއްޓުމަށް ދުރާލާ ފުލުހުންނަށް އަންގާފައިވާކަމަށެވެ. އެހެން ނަމަވެސް އެ މެޗުގެ ސެކިއުރީ ބެލެހެއްޓުމަށް އެކަށީގެންވާ ވަރަށް އެ އިންތިޒާމުތައް ހަމަޖައްސާފައި ނުވާކަމަށް އޭނާ ވިދާޅުވިއެވެ.