ބައްސާމްގެ އިތުބާރު ނެތްކަމުގެ މައްސަލަ ހުށައަޅަން ސޮއި ހަމަ ކުރަނީ

ފުޓްބޯޅަ އެސޯސީއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލްގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުމަށް ސޮއި ހޯދުމުގެ މަސައްކަތް ފަށްޓަވާފައިވާ ކަމަށް މަހިބަދޫ ދާއިރާގެ މެންބަރު އަހުމަދު ތާރިގް (ޓޮމް) ވިދާޅުވެއްޖެއެވެ.

މިކަމާއި ގުޅިގެން ޓޮމް އެކްސް ގައި ކުރެއްްވި ޕޯސްޓެއްގައި ވިދާޅުވީ، ބައްސާމުގެ އިތުބާރުނެތްކަމުގެ މައްސަލަ ހުށަހެޅުމަށް ކުލަބުތަކުގެ ސޮއި ހޯދުމުގެ މަސައްކަތް ފެށިފައިވާ ކަމަށެވެ.

އަދި ބައްސާމްގެ ހިތުގައި ފުޓްބޯޅައަށް ކިރިޔާވެސް ކުލުނެއް ހުރިނަމަ ރީތިގޮތަކީ އިސްތިއުފާ ދެއްވުން ކަމަށްވެސް ޓޮމް ވިދާޅުވި އެވެ.

ބައްސާމުގެ އިތުބާރު ނެތް ކަމުގެ މައްސަލަ ހުށަހަޅަން ނިންމާފައިވާއިރު، އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާ މައްސަލައިގައި ދައުވާ ކުރަން ފޮނުވަން ޕީޖީ އޮފީހުން ވަނީ ނިންމާފައެވެ.

އަދި އެ މައްސަލައިގައި ބައްސާމް އަދީލް ޖަލީލަކީ އެންމެ އިސްކޮށް ތުހުމަތުކުރެވޭ ފަރާތް ކަމަށްވެސް ޕީޖީން ބުނެފައިވެއެވެ.

މިކަން ކަމުގެ އިތުރުން, އެފްއޭއެމްއިން، މެނޭޖަރުންނާއި ކޯޗުން އަަދި ކުޅުންތެރިންނަށް މުސާރަ ނުދޭ މައްސަލަ ވެސް ވަނީ ބޮޑުވެފައެވެ.

އަދި ގައުމީ ޓީމު މޮޅުވި މެޗަކުން، ކުޅުންތެރިންނަށް ދޭން ޖެހޭ ފައިސާ ނުދޭ މައްސަލަ އާއި، ކްލަބްތަކާއި، ވިޔަފާރި ކުންފުނިތަކަށް އެފްއޭއެމް އިން ދޭން ޖެހޭ ފައިސާވެސް ނުދޭ މައްސަލަ ފެންމަތިވެފައިވެއެވެ.

މީގެ އިތުރުން އެފްއޭއެމް އިން އޭޑީކޭ ހޮސްޕިޓަލަށް ދައްކަންޖެހޭ 1.7 މިލިއަން ރުފިޔާ އެއްމަސްދުވަހުގެ ތެރޭގައި ދެއްކުމަށް ސިވިލް ކޯޓުން ހުކުމް ކޮށްފައިވާއިރު ބީހައިވް ހޮޓެލްސްއަށް ނުދައްކާ އޮތް ފަސް ލައްކަ ރުފިޔާގެ ދަރަންޏަށް ފައިސާ ދެއްކުމަށްވެސް އެ ކޯޓުން ދާދިފަހުން ހުކުމް ކޮށްފައި ވެއެވެ.

ދަރަނީގެ މައްސަލައެއްގައި ޕަބްލިކް ސާވިސް މީޑިއާ (ޕީއެސްއެމް) އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިންވެސް އެފްއޭއެމަށް ދައުވާކޮށްފައިވެއެވެ.