އާސަންދަ ސްކީމްގެ ދަށުން އިތުރު ޚިދުމަތް ފޯރުކޮށްދިނުމުގައި އަމަލުކުރާނެ އުސޫލުތައް އާއްމުކޮށްފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަމުގެ ފުރަތަމަ 14 ހަފްތާގައި ހިމެނޭ ހުސްނުވާ އާސަންދަ ސްކީމްގެ ދަށުން އިތުރު ޚިދުމަތްތައް ފޯރުކޮށްދިނުމާއި ގުޅޭ ވައުދުތައް ތަންފީޒުކުރުމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންއެސްޕީއޭ) އިން އުސޫލުތަކެއް ކަނޑައަޅައިފިއެވެ.

މި އުސޫލަށް ކިޔާނީ "ހުސްނުވާ އާސަންދަ ސްކީމްގެ ދަށުން އިތުރު ޚިދުމަތްތައް ފޯރުކޮށްދިނުމާގުޅޭ އުސޫލު" ކަމަށް މިކަމާއި ބެހޭގޮތުން އެންސްޕާ އިން ނެރުނު ބަޔާނުގައި ބުނެފައިވެއެވެ.

މި އުސޫލުތަކުގެ މަޤްސަދަކީ ދިވެހި ކޮންމެ ރައްޔިތަކަށް އާސަންދަ ސްކީމްގެ ދަށުން އަހަރަކު ދެފަހަރު މެޑިކަލް ޗެކަޕްގެ ހިދުމަތް ފޯރުކޮށްދިނުމުގައި އަމަލުކުރާނެ އުސޫލުތައް ކަނޑައަޅައި ބަޔާންކޮށްދިނުމާއި އާސަންދަ ސްކީމްގެ ދަށުން ބޭސްފަރުވާކުރުމަށް ހަމަޖެހިފައިވާ ހޮސްޕިޓަލު ބަދަލުކުރުމަށް ހިނގާ ހަރަދު ހަމަޖައްސައިދިނުމުގައި އަމަލުކުރާނެ އުސޫލުތައް ބަޔާންކޮށްދިނުމުގެ އިތުރުން، އަންހެނުންނަށް ދިމާވާ ސިއްހީ މައްސަލަތަކަށް ހާއްސަ ފަރުވާ، ހަމަޖައްސައިދިނުމުގައި އަމަލު ކުރާނެ އުސޫލުތައް ބަޔާންކޮށްދިނުން ކަމަށް އެންސްޕާއިން ބުނެއެވެ.

އެގޮތުން ހުސްނުވާ އާސަންދަ ސްކީމުގެ ދަށުން އިތުރު ޚިދުމަތްތައް ފޯރުކޮށްދިނުމާގުޅޭ އުސޫލުގެ ދަށުން ވަކިވަކި އުމުރުފުރާތަކަކަށް އާސަންދައިން ކަނޑައަޅާ މެޑިކަލް ޕެކޭޖްތައް އެ އުމުރުފުރާގެ ކޮންމެ މީހަކަށް އަހަރަކު އެއްފަހަރު ބޭނުން ކުރެވޭނެ ކަމަށް ބުނެފައިވެއެވެ. އަދި ޑޮކްޓަރުންގެ ލަފައާއެކު އެއްފަހަރު ޗެކްއަޕް ހެދި ފަރާތްތަކަށް އާސަންދައިގެ ދަށުން ދެވަނަ ފަހަރަށް ވެސް މެޑިކަލް ޗެކަޕް ހެދުމުގެ ފުރުސަތު އޮންނާނެ ކަމަށް ވެސް ބަޔާންކޮށްފައިވެއެވެ.

އަދި މެޑިކަލް ޗެކްއަޕްގެ ގޮތުގައި ފޯރުކޮށްދޭ ހިދުމަތުގެ ނަތީޖާ އާސަންދައިގެ ހިދުމަތް ދޭ މަރުކަޒުތަކުން އެކުންފުންޏާއި ހިއްސާކުރަން ޖެހޭނެކަމަށް ވެސް ވެއެވެ.

މީގެ އިތުރުން މި އުސޫލުތަކުގައި އާސަންދަ ސްކީމްގެ ދަށުން ރާއްޖެއިން ބޭރުގައި ބޭސްފަރުވާކުރުމަށް ހަމަޖެހިފައިވާ ހޮސްޕިޓަލް ބަދަލުކުރުމަށް ހިނގާ ހަރަދު ސްކީމް މެދުވެރިކޮށް އެކަމަށް ހުއްދަ ލިބިފައިވާ ފަރާތްތަކަށް ހަމަޖައްސައިދެވޭނެ އުސޫލުތަކެއް ވެސް ވަނީ ކަނޑައަޅާފައެވެ. މީގެ ތެރޭގައި ހޮސްޕިޓަލް ބަދަލުކުރުމަށް އެދޭ ހާލަތްތަކުގައި އަގަށް އަންނަ ބަދަލު %10 އަށް ވުރެ ކުޑަނަމަ ޚަރަދަކާއި ނުލައި މި އިންތިޒާމް ހަމަޖައްސައިދެވޭނެ ކަަމަށާއި އެ އިންސައްތައަށް ވުރެ އަގަށް އަންނަ ބަދަލު އިތުރުވާނަމަ އަގު ހަމަޖައްސަންޖެހޭނީ ޚިދުމަތް ލިބިގަންނަ ފަރާތުންކަމަށް ވެސް ވަނީ ކަނޑައަޅާފައެވެ.

އަންހެނުންނަށް ދިމާވާ މައްސަލަތަކަށް ފަރުވާކުރުމަށް މިއުސޫލުގެ ދަށުން އާސަންދަ ލިބޭނީ ސަރުކާރުގެ ހޮސްޕިޓަލްތައް އަދި ސިއްހީ މަރުކަޒުތަކުން ކަމަށާއި ރާއްޖެއިން ބޭރުން ފަރުވާކުރާނަމަ މި ހިދުމަތް ލިބޭނީ އާސަންދަ ސްކީމް ހިމަނާފައިވާ ހޮސްޕިޓަލްތަަކަށް އެކަނި ކަަމަށް ވެސް އެންސްޕާއިން ވަނީ ބަޔާންކޮށްފައެވެ.

މި ކަމާގުޅޭގޮތުން އެއްވެސް ޝަކުވާއެއްވާނަމަ އެންސްޕާ ނުވަތަ އާސަންދަ ކޮމްޕެނީ ލިމިޓެޑަށް ހުށަހެޅޭނެ ކަމަށާއި ޝަކުވާ ހުށަހަޅާތާ 24 ގަޑިއިރުތެރޭ އެކަމުގެ ތަފްސީލު ވެސް ހުށަހަޅަން ޖެހޭނެ ކަމަށް އެ އިދާރާއިން ބުނެއެވެ.