ނޭޕާލްގައި ބަހެއް ކޯރަކަށް ވެއްޓި 12 މީހުން މަރުވެއްޖެ

ނޭޕާލްގެ ކަތުމަންޑޫއިން އޮޚަލްދުންގާއަށް ދަތުރުކުރި ފަސިންޖަރުން އުފުލާ ބަހެއް، ރަމެޗަޕް ޑިސްޓްރިކްޓްގެ ތަމަކޯޝީ ކޯރަށް ވެއްޓި ހިނގި ހިތާމަވެރި ހާދިސާގައި 12 މީހުން މަރުވެ، 8 މީހަކަށް އެކިވަރުގެ އަނިޔާތައް ވެއްޖެއެވެ.

މިއަދު ހެނދުނު އެގައުމުގެ ގަޑިންނު 11:00 ހާއިރު ހިނގި މި ހާދިސާގައި، މި ބަސް ވަނީ މަންތާލީ މުނިސިޕަލިޓީ ކައިރީގައި އޮންނަ ފަރުބަދަމަތީ މަގަކުން ކަހާލައިގެން ގޮސް، ކޯރަކަށް ވެއްޓި، ގާތްގަނޑަކަށް 100 މީޓަރު އަޑިއަށް ގޮއްސައެވެ. މި ހާދިސާއާ ގުޅިގެން އެގައުމުގެ ސަލާމަތީ ބާރުތަކާއި، އާންމު ރައްޔިތުން ގުޅިގެން ވަނީ މީހުން ސަލާމަތްކުރުމުގެ މަސައްކަތް ކުރިއަށް ގެންގޮސްފައެވެ.

ކަމާބެހޭ ފަރާތްތަކުން ހާމަކޮށްފައިވާ ގޮތުގައި، މި 12 މީހުންގެ ތެރެއިން 6 މީހަކު މަރުވީ ހާދިސާ ހިނގި ތަނުގައެވެ. އަދި ބާކީ 6 މީހުން މަރުވީ ހޮސްޕިޓަލުގައި ފަރުވާ ދެމުންދަނިކޮށްށެވެ.

އެ ގައުމުގެ ފުލުހުން ބުނި ގޮތުގައި، މި ބަހަކީ އެ ސަރަހައްދުގެ ދަތުރުފަތުރުގެ ހިދުމަތްދޭ ކުންފުންޏަކަށް ނިސްބަތްވާ ބަހެކެވެ. އަދި މި ހާދިސާ ހިނގާފައިވަނީ ހަނި އަދި އުސް ފަރުބަދަމަތީގެ ނުރައްކާތެރި މަގަކުން ދަތުރުކުރަނިކޮށެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމަށް މިހާރުވެސް ތަހުގީގުތައް ކުރިއަށްދާކަމަށާއި، ބަހުގެ ޑްރައިވަރު މިހާރު ހުރީ ފުލުހުންގެ ބެލުމުގެ ދަށުގައި ކަމަށް ރިޕޯޓުކޮށްފައިވެއެވެ.

ރިޕޯޓްތަކުން އެނގޭ ގޮތުގައި، ބަސް ކޯރަށް ވެއްޓުނީ ކޮންޓްރޯލުން ނެއްޓިގެންނެވެ. އަދި މަރުވި މީހުންގެ ތެރެއިން ގިނަ ބައެއްގެ އާއިލާތަކަށް އެކަން އަންގާފައިވީ ނަމަވެސް، ބައެއް މީހުން ދެނެގަތުމުގެ މަސައްކަތް އަދިވެސް ދަނީ ކުރަމުންނެވެ.

ހާދިސާ ހިނގިތާ ކުޑަވަގުތުކޮޅެއްގެ ތެރޭގައި ސަލާމަތީ ބާރުތަކާއި ކުއްލި ހާލަތްތަކުގައި ހަރަކާތްތެރިވާ ފަރާތްތަކުން ވަނީ އެ ސަރަހައްދަށް ގޮސް، ބަހުގެ ތެރޭގައި ތިބި މީހުން ސަލާމަތްކޮށް ހޮސްޕިޓަލްތަކަށް ގެންގޮސްފައެވެ. އިއަދި ތުރު ބަޔަކު އުޅޭތޯ ބެލުމުގެ މަސައްކަތް އަދިވެސް ކުރިއަށްދެއެވެ.

މިފަދަ ހާދިސާތަކަކީ އެ ގައުމުގައި އާންމުކޮށް ހިނގާ ހާދިދާތަކެކެވެ. އެހެންކަމުން، ނޭޕާލްގެ ސަރުކާރުން ވަނީ ފަރުބަދަމަތީގެ ނުރައްކާތެރި މަގުތަކުގައި ދަތުރުކުރުމުގައި ސަމާލުވުމަށް އިލްތިމާސްކޮށްފައެވެ.