ގެއްލޭ މީހުން ހޯދުން ހަރުދަނާކުރުމަށް ގޮވާލި ކުއްލި މައްސަލަ ބޭރުކޮށްލައިފި

ވީނުވީއެއް ނޭނގި ގެއްލޭ މީހުން ހޯދުމުގެ މަސައްކަތް ހަރުދަނާކުރުމަށް ގޮވާލާ ރައްޔިތުންގެ މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފި އެވެ.

މަޖިލީހަށް އެ މައްސަލަ ހުށައެޅުއްވީ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ.

ފެބްރުއަރީ މަހު އއ. މަތިވެރި ރިވެލި، ހަސަން އަލީ (ހަސަންފުޅުބެ) އާއި، ސ. މަރަދޫ ގަސްކަރަ، މުހައްމަދު އާސިރު އިސްމާއީލް ވީނުވީއެއް ނޭނގި ގެއްލިގެން ރިޕޯޓުކުރިތާ ގިނަ ދުވަސްތަކެއް ފާއިތުވެގެން ދާއިރު އެ މީހުން ހޯދުމަށް ސަރުކާރުން އެކަށީގެންވާ ގޮތެއްގައި މަސައްކަތް ނުކުރާކަމަށް، އެ މީހުން ހޯދުމުގެ މަސައްކަތަށް ފަރުވާކުޑަ ކުރާކަން އާދަމް ޝަރީފުގެ ކުއްލި މައްސަލައިގައި ފާހަގަކޮށްފައި ވެއެވެ.

އެ ކުއްލި މައްސަލަ ހުށައަޅުއްވަމުން އާދަމް ޝަރީފު ވިދާޅުވީ އާސިރު ގެއްލުނުތާ 10 ދުވަހަށް ވުރެ ގިނަ ދުވަސްވެފައިވާ އިރު، އޭނާ އެންމެ ފަހުން ފެނުނު، ވެލާނާ އިންޓަނޭޝަނަލް އެއާޕޯޓުގެ ބައެއް ޑިޕާޓްމަންޓް ތަކުގެ ސީސީޓީވީ ފުޓޭޖް ހޯދިފައި ނުވާއިރު، އެފަދަ މައްސަލަތައް ތަހުގީގު ކުރުމަށް އެކަށީގެންވާ މަސައްކަތްތަކެއް، ކަމާގުޅުންހުރި މުއައްސަސާތަކުން ކުރަމުން ނުދާކަމަށެވެ.

އާދަމް ޝަރީފު ހުށައެޅުއްވި ކުއްލި މައްސަލަ މަޖިލީހުން ފާހެއް ނުކުރިއެވެ. އެ މައްސަލަ ބަލައިގަތުމަށް ވޯޓުދެއްވީ ވޯޓުގައި ބައިވެރިވި47 މެންބަރުންގެ ތެރެއިން 18 މެންބަރުންނެވެ. ނުފެންނަ ކަމަށް 29 މެމްބަރުން ވަނީ ވޯޓު ދީފައެވެ. އެއާއެކު އެ މައްސަލަ ވަނީ ބޭރުކޮށްލާފަ އެވެ.

އއ. މަތިވެރިން ހަސަންފުޅުބެ ގެއްލުނީ މި މަހުގެ ފުރަތަމަ ދުވަހު އެވެ. އޭނާ ހޯދުމަށް ރަށުގެ ރައްޔިތުން ގިނަ މަސައްކަތްތަކެއް ކުރި ނަމަވެސް، މިހާތަނަށް އޭނާ ފެނިފައެއް ނުވެ އެވެ.

އެފަހުގެ މި މަހުގެ 4 ވަނަ ދުވަހު އައްޑޫ ސިޓީއަށް ނިސްބަތްވާ ދުވާނެއް ގެއްލިގެން ވަނީ ރިޕޯޓުކޮށްފަ އެވެ. އެ ޒުވާނާ އެންމެ ފަހުން ފެނުނީ ވެލާނާ އިންޓަނޭޝަލް އެއާޕޯޓުގެ ޓާމިނަލަށް ވަންތަން ކަމަށް ފުލުހުން ވަނީ ބުނެފައެވެ.

އެހެން ނަމަވެސް އޭނާ ރާއްޖެއިން ބޭރަށް އަދި ރާއްޖޭގެ އެއްވެސް ރަށަކަށް ފުރާފައި ނުވާކަމަށް ފުލުހުން ވަނީ ބުނެފައެވެ.