ގެއްލުނު މީހުން ހޯދަން ގޮވާލާ ކުއްލި މައްސަލަ ހުށަހެޅީ ސަރުކާރަށް އެއްޗިހި ކިޔަން: ރޮޒައިނާ

ގެއްލޭ މީހުން ހޯދުމުގެ މަސައްކަތް އަވަސްކުރަން ގޮވާލާ އިދިކޮޅުން މަޖިލީހަށް ހުށައެޅި ކުއްލި މައްސަލަ ބޭރުކޮށްލުމަށްފަހު، އެކަން މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ދިފާއުކުރައްވައިފި އެވެ.

ފެބްރުއަރީ މަހު އއ. މަތިވެރި ރިވެލި، ހަސަން އަލީ (ހަސަންފުޅުބެ) އާއި، ސ. މަރަދޫ ގަސްކަރަ، މުހައްމަދު އާސިރު އިސްމާއީލް ވީނުވީއެއް ނޭނގި ގެއްލިގެން ރިޕޯޓުކުރިތާ ގިނަ ދުވަސްތަކެއް ފާއިތުވެގެން ދާއިރު އެ މީހުން ހޯދުމަށް ސަރުކާރުން އެކަށީގެންވާ ގޮތެއްގައި މަސައްކަތް ނުކުރާކަން ފާހަގަކޮށް، އެ މަސައްކަތް މިހާރަށްވުރެ ހަރުދަނާކޮށް ކުރުމަށް ގޮވާލާ މަޖިލީހަށް ހުށައެޅި ކުއްލި މައްސަލަ ވަނީ ބޭރުކޮށްލާފަ އެވެ.

އެ މައްސަލަ ބަލައިގަތުމަށް ވޯޓުދެއްވީ 18 މެމްބަރުންނެވެ. އަދި މައްސަލަ ބަލައިގަންނަން ނުފެންނަކަމަށް 29 މެމްބަރުން ވޯޓުދެއްވާފައި ވެއެވެ.

އަގުލަބިއްޔަތު ވޯޓު މައްސަލަ ބަލައިނުގަތުމަށް ނިންމުމާއެކު މައްސަލަ ބޭރުކޮށްލާަފައިވާއިރު، މިއީ އިދިކޮޅުން ހުށައެޅި ކުއްލި މައްސަލަތަކުގެ ތެރެއިން މިފަދައިން ބޭރުކޮށްލި ތިންވަނަ މައްސަލައެވެ.

ގެއްލޭ މީހުން ހޯދުމުގެ މަސައްކަތް އަވަސްކުރުމަށް ގޮވާލާ ހުށައެޅި އެ މައްސަލަ ބޭރުކޮށްލުމާއި ގުޅިގެން މަޖިލީހުގެ މައިނޯރިޓީ ޕާޓީއަށް ނިސްބަތްވެ ވަޑައިގަންނަވާ ނައިފަރު ދާއިރާގެ މެމްބަރު އަހުމަދު ޝިޔާމު ވަނީ ކަންބޮޑުވުން ފާޅުކުރައްވާފަ އެވެ. ޝިޔާމު ވިދާޅުވީ އިދިކޮޅު ފަރާތްތަކަށް މަޖިލީހުގައި މަސައްކަތް ކުރުމުގެ ފުރުސަތު މިހާރު ނެތް ކަމަށެވެ.

ޝިޔާމުގެ އެ ވާހަކަތަކަށް ރޮޒައިނާ ވަނީ ރައްދެއްވާފަ އެވެ.

އެގޮތުން އެ މައްސަލަ ބޭރުކޮށްލި ސަބަބާއި ގުޅޭގޮތުން މެމްބަރު ރޮޒައިނާ އާދަމް ވިދާޅުވީ، ދެ ދިވެހިން ގެއްލުނު މައްސަލައިގައި އިދިކޮޅުން މަޖިލީހަށް ކުއްލި މައްސަލައެއް ހުށައެޅީ، ގެއްލުނު މީހުން ހޯދުން އަވަސްކޮށް، ނަތީޖާ ނެރުމަށް ނޫން ކަމަށެވެ.

އިދިކޮޅު މެމްބަރުންގެ މަގްސަދަކީ އެފަދަ މައްސަލަތައް ހުށައަޅައިގެން ސަރުކާރަށް އެއްޗެހި ކިޔުންކަމަށް ރޮޒޭނާ ވިދާޅުވި އެވެ.

"މިތަނަށް ކުއްލި މައްސަލައެއް ކޮންމެ ދުވަހަކު ހެނދުނު ލަނީ، އެ މައްސަލައާއި ގުޅޭގޮތުން ސަރުކާރާއި ދިމާލަށް އެކި ގޮތްގޮތަށް އެއްޗެހި ކިޔާފަ އެކަން އެ ހިސާބުން ނިންމާލާ ކަމެއްގެ ގޮތުގައި، ނިންމާލާ ކަމެއްގެ ގޮތުގައި ކަންކަން ހުށައެޅުމަކުންނެއް އެއަކުންނެއް ނަތީޖާއެއް ނުނިކުމޭ، ނަތީޖާ ނިކުންނަނީ ނަތީޖާ ނިކުންނަ ގޮތަށް ހުށައެޅޭ ކަންކަމުން، ނަތީޖާ ނިކުންނަ ގޮތަށް ކުރެވޭ މަސައްކަތްތަކުން"

އައްޑޫ މީދޫ މެމްބަރު ރޮޒައިނާ އާދަމް

ރޮޒައިނާ ވިދާޅުވީ އިދިކޮޅުން ގެއްލުނު މީހުން ހޯދުމުގެ މަސައްކަތް އަވަސްކޮށް، އެ މައްސަލައަށް ހަގީގީ ހައްލެއް ހޯދަން ބޭނުންފުޅުވާ ނަމަ އެ މައްސަލަ ހުށައަޅުއްވާނީ މަޖިލީހުގެ 241 ކޮމެޓީއަށް ކަމަށެވެ. އޭރުން ކޮމެޓީއަށް އިދާރާތަކުގެ މެމްބަރުން ހާޒިރުކޮށް ޖަވާބުދާރީ ކުރުވޭނެކަމަށް އޭނާ ވިދާޅުވި އެވެ.

މަޖިލީހުގައި މަސައްކަތް ކުރާ އުސޫލުތަކަކީ އެއްވެސް މެމްބަރަކަށް އޮޅިވަޑައިގެންފައި އޮންނަވާނެ ކަމެއް ނޫން ކަމަށާއި، ކުއްލި މައްސަލައެއް ހުށައެޅިޔަސް، އެ މައްސަލަ ކޮމެޓީއަށް ނުދާނެކަމަށް އޭނާ ވިދާޅުވިއެވެ.

ކުއްލި މައްސަލައެއް ހުށައަޅައިގެން ކުރެވޭނެހާވެސް ކަމަކީ އެ މައްސަލައަކާއި ގުޅޭގޮތުން ބަހުސް ކުރުން ކަމަށާއި، އެއީ އެއްވެސް ނަތީޖާއެއް ނެރެވޭނެ ކަމެއް ނޫންކަމަށް އޭނާ ވިދާޅުވިއެވެ.

ކޮންމެ ދުވަހު މަޖިލީހަށް ކުއްލި މައްސަލައެއް ހުށައެޅުމުގެ ހަމައެކަނި ބޭނުމަކީ، ސަރުކާރަށް ފުރައްސާރަކޮށް ސަރުކާރަށް އެއްޗެހި ގޮވުންކަމަށް ތަކުރާރުކޮށް ރޮޒައިނާގެ ވާހަކައިގައި ފާހަގަކުރެއްވި އެވެ.