ޖޭޕީގެ ނިންމުމާއެކު ވަޒީރުން އިސްތިއުފާ ދެއްވަން ޖެހެންޏާ ރައީސް ޞާލިހުވެސް އިސްތިއުފާދެއްވަން ޖެހޭ: ޤާސިމް
ޖުމްހޫރީ ޕާޓީން ރިޔާސީ ކެންޑިޑޭޓެއް ނެރެގެން ކުރިއަށް އޮތް ރިޔާސީ އިންތިޚާބުގައި ވާދަކުރައްވަން ނިންމި ނިންމުމާއެކު މިހާރު ސަރުކާރުގެ މަޤާމުގައި ތިއްބެވި ޖޭޕީގެ ވަޒީރުންނާއި އެހެން ބޭފުޅުން އިސްތިއުފާ ދެއްވަން ޖެހިވަޑައިގަންނަވާނަމަ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުވެސް އިސްތިއުފާދެއްވަން ޖެހިވަޑައިގަންނަވާނެ ކަމަށް މަޖިލީހުގެ މާމިގިލީ ދާއިރާގެ މެމްބަރު އަދި ޖޭޕީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ.
ޤާސިމް މިފަދައިން ވިދާޅުވެފައިވަނީ ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރަން ނިންމުމާއެކު، މިހާރު ސަރުކާރުގެ އެކި މަޤާމުތަކުގައި ތިއްބަވާ ޖޭޕީގެ ބޭފުޅުން އިސްތިއުފާދެއްވަން ޖެހިވަޑައިގަންނަވާނެކަމަށް އެމްޑީޕީގެ ބައެއް މެމްބަރުން ދައްކަވަމުންދާ ވާހަކަތަކަށް މިއަދު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި ރައްދުދެއްވާ ވާހަކަދައްކަވަމުން ނެވެ.
ޤާސިމް ވިދާޅުވީ އެންމެ ފުރަތަަމަ އެ މެމްބަރުން 2018 ވަނަ އަހަރު ހެދި ކޯލިޝަން އެއްބަސްވުމާއި އެއްގޮތަށް ސަރުކާރުން އަމަލުކޮށްފައިވޭތޯ ބައްލަވަންޖެހޭ ކަމަށެވެ.
2018 ވަނަ އަހަރު ހެދި ކޯލިޝަން މިއަހަރުގެ ނޮވެމްބަރާއި ހަމަޔަށް ނިމޭނެ ކަމަށާއި، ދެން އަންނަ އިންތިޚާބެއްގައި ޖޭޕީން ވާދަކުރާނެ ގޮތަކީ މިހާރު އޮތް ކޯލިޝަން އެއްބަސްވުމާއި އެއްވެސް ގުޅުމެއް އޮތް ކަމެއް ނޫން ކަމަށް ޤާސިމް ވިދާޅުވި އެވެ.
އަދި މިއަހަރުގެ ރިޔާސީ އިންތިޚާބުގައި ޖޭޕީން ވަކިން ނިކުންނަން ނިންމި ނިންމުމާއި ގުޅިގެން ޖޭޕީގެ ވަޒީރުންނާއި ސަރުކާރުގެ އެކި މަގާމުތަކުގައި ތިއްބެވި ބޭބޭފުޅުން އިސްތިއުފާ ދެއްވަން ޖެހިވަޑައިގަންނަވާނަމަ 2018 ވަނަ އަހަރު ވެރިކަމަށް އަންނަން ޖޭޕީއާއެކު ކޯލިޝަން ހެއްދެވި އެމްޑީޕީގެ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެސް އިސްތިއުފާދެއްވަން ޖެހިވަޑައިގަންނަވާނެ ކަމަށް ޤާސިމް ވިދާޅުވި އެވެ.
"މިއަހަރުގެ ނޮވެމްބަރު މަހުގެ 18 ވަނަ ދުވަހަށް ދެމިގެންދާ އެއްބަސްވުމެއްގައި އަޅުގަނޑުމެން ސޮއިކޮށްގެން މި ސަރުކާރުގައި މި ތިބީ. އެހެންކަމަށް ވަންޏާ އިއްޒަތްތެރި ރައީސުލްޖުމްހޫރިއްޔާ ވެސް ޖެހިވަޑައިގަންނަވާނީ އިސްތިއުފާދެއްވަން. އެހެން ނޫން ކަމަށް ވަންޏާ އަޅުގަނޑު ދަންނަވަން، އެހެން ނޫން ކަމަށްވަންޏާ އަޅުގަނޑު ދަންނަވާލަން ޖުމްހޫރީ ޕާޓީއަށް ދެއްވާފައިވާ މަޤާމުތަކެއް ދެއްވާފައިވަނީ އެއްވެސް މީހެއްގެ އަމިއްލަ ތަރިކަ މުދަލަކުން ނޫން. އެެހެން ނަމަވެސް އަޅުގަނޑުމެން އެއްބަސްވެ އެކަށައަޅާފައިވާ ގޮތެއްގެ މަތިން ކުރައްވަން ބޭނުންފުޅުވާ ކަންތައްތަކެއްގެ ތެރެއިން ބައިކުޅަ ބައެއްވެސް ދެވުނުތޯ އަމިއްލަފުޅަށް ވިސްނާވަޑައިގަތީމަ އެނގުވަޑައިގަންނަވާނެ"
ޖުމްހޫރީ ޕާޓީގެ ލީޑަރު ޤާސިމް އިބްރާހިމް
ޤާސިމް ވިދާޅުވީ ޖުމްހޫރީ ޕާޓީގެ ސްލޮޓުތަކުގައި ވެސް ތިއްބެވީ ދިވެހި ރައްޔިތުންތަކެއް ކަމަށެވެ.
ސަރުކާރުގައި ތިބެގެންވެސް ޖޭޕީގެ މެމްބަރުން ގެންދަވަނީ ދައުލަތަށް ޚިދުމަތް ކުރައްވަމުން ކަމަށާއި، އަންނަ ރިޔާސީ އިންތިޚާބުގައި ޖޭޕީން ސަރުކާރުން ބޭނުން ނުވާގޮތަކަށް ނިންމުމެއް ނިންމާފައިވާތީ، ދައުލަތަށް ޚިދުމަތް ކުރުން ހުއްޓާލާ އިސްތިއުފާދެއްވުމަކީ ކޮށްގެންވާނެ ކަމެއް ނޫން ކަމަށް ޤާސިމް ވިދާޅުވި އެވެ.
އެހެންކަމުން ކޯލިޝަން އެއްބަސްވުން ހަމަވުމުގެ ކުރިން ޖޭޕީގެ އެއްވެސް މެމްބަރެއް ސަރުކާރުގެ ވަޒީފާއިން އިސްތިއުފާ ނުދެއްވުމަށް ޤާސިމްވަނީ އެ މެމްބަރުންނަށް އެދިވަޑައިގެންފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
