ޖޭޕީން ކެނޑިޑޭޓަކު ނެރެން ނިންމީ ބައެއް ޕާޓީތަކުގެ އިސްވެރިންގެ އިލްތިމާސްއާއެކު: އަމީން

ޖޭޕީން ކެނޑިޑޭޓަކު ނެރެން ނިންމީ ބައެއް ޕާޓީތަކުގެ އިސްވެރިންގެ އިލްތިމާސްއާއެކު ކަމަށް ޖުމްހޫރީ ޕާޓީގެ ޑެޕިޔުޓީ ލީޑަރު އަމީން އިބްރާހިމް ވިދާޅުވެއްޖެއެވެ.

ޖޭޕީން ކެންޑިޑޭޓެއް ނެރުމަށް ނިންމުމާއި ގުޅިގެން ބައެއް ފަރާތްތަކުން ފާޑުކިޔަމުން ދިޔުމާއި ގުޅިގެން އެ ވާހަކަތަކަށް ރައްދު ދެއްވައި އަމީން ކުރެއްވި ޓްވީޓެއްގައި ވިދާޅުވީ ޖޭޕީން ކެނޑިޑޭޓަކު ނެރެން ނިންމީ އެތައް ރައްޔިތުންނެއް އެކަަމަށް އެދެމުންދާތީ ކަމަށެވެ.

"ޖޭޕީން ކެންޑިޑޭޓަކު ނެރެން ނިންމީ ބައެއް ޕާޓިތަކުގެ އިސްވެރިންނާ ޖޭޕީގެ ގިނަ މެންބަރުންނާ އެތައް ރައްޔިތެއް ކެނޑިނޭޅި ލީޑަރ ގާސިމް އިބްރާހީމްއަށާއި ޕާޓިގެ އެކި ބޭފުޅުންނަށް ކުރެއްވި އިލްތިމާސާ އެކު. އިރާދަކުރެއްވިއްޔާ މި ނިންމުމުން ރައްޔިތުންނަށް ހަމަޖެހުމާއި ފާގަތިކަން ލިބޭނެ،" އަމީން ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީ އިން ވާދަ ކުރާނެ ކަމަށް އެޕާޓީއިން އިއުލާނު ކުރުމާ ގުޅިގެން މިހާރު އެންމެ މަގުބޫލުވެފައި ވަނީ ޖުމްހޫރީ ޕާޓީގެ މަސްލަތަހު އޮތް ކަންކަމަށެވެ.

ޖޭޕީގެ ނިންމުމާއެކު ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ގާސިމަށް މަރުހަބާ ދަންނަވާފައެެވެ. އަދި އެމްޑީޕީގެ ރައީސް މުޙައްމަދު ނަޝީދު ޕާޓީގެ ތެރެއިން އުފައްދާފައިވާ ފިކުރެއްގެ ދިރުމާއި ޖުމްހޫރީ ޕާޓީ ގުޅިގެން ޖޮއިންޓު ޕާލަމެންޓްރީ ގުރޫޕެއް އުފެއްދުމަށް މަޝްވަރާތައް ފައްޓާނެކަމަށް ފިކުރެއްގެ ދިރުމުގެ ޕީޖީގައި ހިމެނިވަޑައިގަންނަވާ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެފައިވެއެވެ.

މިހާރުގެ ސަރުކާރުގެ ކޯލިޝަން ޕާޓީއެއް ކަމުގައިވާ ޖުމްހޫރީ ޕާޓީން ރިޔާސީ އިންތިހާބުގައި ވާދަކުރަން ނިންމުނުން، ސަރުކާރުގައި ތިބި ޖޭޕީ މެމްބަރުން ވަކިކުރުމަށް މިއަދުގެ މަޖިލީހުގެ ތަޅުމުގައި ބައެއް މެމްބަރުން ގޮވާލިއެވެ. ނަމަވެސް އޭގެ ރައްދަކަށް ގާސިމް ވިދާޅުވެފައި ވަނީ، 2018 ވަނަ އަހަރު ހެދި ކޯލިޝަން މިއަހަރުގެ ނޮވެމްބަރާއި ހަމަޔަށް ނިމޭނެ ކަމަށާއި، ދެން އަންނަ އިންތިޚާބެއްގައި ޖޭޕީން ވާދަކުރާނެ ގޮތަކީ މިހާރު އޮތް ކޯލިޝަން އެއްބަސްވުމާއި އެއްވެސް ގުޅުމެއް އޮތް ކަމެއް ނޫން ކަމަށެވެ.