މަޝްވަރާނުކޮށް ވޯޓުލާ ވަގުތު އިތުރުކުރުން ޕީޕީއެމުން ކުށްވެރިކޮށްފި
ގުރައިދޫ ދާއިރާގެ ބައި-އިލެކްޝަނުގެ ވޯޓުލުން އިތުރުކުރިއިރު އެ އިންތިޚާބުގައި ވާދަކުރާ ޕީޕީއެމާއި އެއްވެސް މަޝްވަރާއެއް ކޮށްފައި ނުވާތީ، އެކަން އެ ޕާޓީން ކުށްވެރިކޮށްފި އެވެ.
އެކަން ކުށްވެރިކޮށް އިދިކޮޅުން ނެރުނު ބަޔާނުގައި ބުނެފައިވަނީ މިއަދު ކުރިއަށްދާ ބައި-އިލެކްޝަނުގެ ވޯޓުލާ ގަޑި ހަމަވުމުން އިތުރު އެއް ގަޑިއިރު ދިނުމަށް ވަގުތު އިތުރުކުރީ ޕީޕީއެމާއި އެއްވެސް މަޝްވަރާއެއް ނުކޮށް ކަމަށެވެ.
ޕީޕިއެމުން ބުނީ ވޯޓުލާ ވަގުތު އިތުރުކުރަން ވާނީ ހުރިހާ ސިޔާސީ ޕާޓީތަކާއި މަޝްވަރާކުރުމަށް ފަހުގައެވެ. އިންތިޚާބަށް ވަގުތު އިތުރުކުރީ މި އިންތިޚާބުގައި ވާދަކުރާ ސަރުކާރު ހިންގާ މައި ޕާޓީ އެމްޑީޕީއަށް ވޯޓު މަދުވެދާނެކަމަށް ބާލާ އިންތިޚާބު ނާކާމިޔާބު ވެދާނެތީކަމަށް ޕީޕީއެމުން ނެރުނު ބަޔާނުގައި ވަނީ ފާހަގަކޮށްފަ އެވެ.
އޭގެ އިތުރުން ޕީޕީއެމުން ބުނީ އިންތިޚާބުގެ ވޯޓުލުމުގެ ވަގުތު އިތުރުކުރީ އިލެކްޝަން ކޮމިޝަނަށް ސަރުކާރުން ނުފޫޒު ފޯރުވައިގެން ކަމަށެވެ.
މިއަދު ކުރިއަށް ދިޔަ އިންތިޚާބުގައި ވޯޓުލާ ވަގުތު އިތުރުކުރީ މޫސުން ގޯސްވުމާއި ގުޅިގެން ގިނަ ބަޔަކަށް ވޯޓުލުމުގެ ފުރުސަތު ދިނުމަށްކަމަށް އީސީން ބުނި ނަމަވެސް އެއީ ޤަބޫލު ކުރެވޭ ކަމެއް ނޫންކަމަށް އިދިކޮޅުން ވަނީ ބުނެފައެވެ.
އެގޮތުން ނިމިދިޔަ ވިލިމާލޭ ދާއިރާގެ ބައި-އިލެކްޝަން ކުރިއަށް ދިޔަ ދުވަހު ވެސް ވިއްސާރަވުމުގެ ސަބަބުން ކަނޑު ދަތުރުކޮށްފައި ވޯޓުލުމަށް ދާން ބޭނުންވާ ފަރާތްތަކަށް ދަތިތަކެއް ކުރިމަތިވި ނަމަވެސް ވޯޓުލާ ވަގުތު އީސީން އިތުރުކޮށްފައި ނުވާކަން ޕީޕީއެމުން ފާހަގަކުރިއެވެ. އަދި އެ ދުވަހު ވޯޓުލާން ދިޔަ ގިނަ ބަޔަކަށްވެސް ފުރުސަތު ދީފައި ނުވާކަން އިދިކޮޅުގެ ބަޔާނުގައި ވަނީ ބުނެފައެވެ.
އެކަން ފާހަގަކޮށް އިދިކޮޅުން ބުނީ އިންތިޚާބު ގެންދާނެ އުސޫލުތަކެއް ދުރާލާ ކަނޑައަޅާ އިއުލާނުކުރުމަށްފަހު ކަނޑައެޅިގެން އެ އުސޫލުތަކާއި ޚިލާފަށް އިލެކްޝަން ކޮމިޝަނުން އަމަލުކުރުމަކީ އިންތިޚާބުގެ ސައްހަކަމާއި މިނިވަންކަމާމެދު ސުވާލު އުފެދޭ ކަމެއް ކަމަށެވެ. އަދި އެ އުސޫލުން ކަންކަން ނުކުރުމަށް އިދިކޮޅުން ވަނީ ގޮވާލާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
