ދެވަނަ ދައުރެއް ދީފިނަމަ ކޮޅުފުށްޓަށް އޮތް ކަންކަން ރައީސް ވިދާޅުވެއްޖެ!

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރިޔާސީ ކެމްޕޭނަށް މ އަތޮަޅަށް ދަތުރުފުޅު ފައްޓަވައިފި އެވެ.

މި ދަތުރުފުޅުގައި އެންމެ ފުރަތަމަ މަންޒިލެއްގެ ގޮތުގައި ވަޑައިގެންފައިވަނީ މ ކޮޅުފުއްޓަށެވެ.

އެ ރަށަށް ވަޑައިގެން ރައީސް ޞާލިހުވަނީ ރައްޔިތުންނާއި ބައްދަލުކުރެއްވުމަށް ޖަގަހަ ޖަލްސާއެއް ވެސް ބާއްވާފަ އެވެ. އަދި އެމަނިކުފާނަށް ދެވަނަ ދައުރެއް ރައްޔިތުން ދެއްވައިފި ނަމަ ކޮޅުފުށީގެ ރައްޔިތުންނަށް ކޮށްދެއްވާނެ ބައެއް ކަންކަން ވެސް ހާމަކުރައްވާފަ އެވެ.

ރައީސް ވިދާޅުވީ ކޮޅުފުއްޓަކީ ސުނާމީ ކާރިސާގައި ވަރަށް ބޮޑަށް ހަލާކުވި ރަށެއް ކަމަށެވެ. އެހެން ނަމަވެސް ރަށުގެ ރައްޔިތުން ރަށް ދޫކޮށް ދާން ބޭނުން ނުވާ ކަމަށާއި، ރައްޔިތުން ބޭނުންވަނީ ރަށުގައި ތިބެގެން އަސާސީ ޚިދުމަތްތައް ލިބޭނެ އިންތިޒާމުތައް ހަމަޖެހިގެން ދިއުންކަމަށް ރައީސް ޞާލިހު ވިދާޅުވި އެވެ.

އެކަން ފާހަގަކުރައްވާ އެމަނިކުފާނު ވިދާޅުވީ ކޮޅުފުށީ ގިރާ ސަރަހައްދު ހިމާޔަތްކުރުމުގެ ފުރަތަމަ ފިޔަވަހި މި ސަރުކާރުން ނިންމާފައިވާނެ ކަމަށެވެ. އަދި ދެވަނަ ދައުރެއް ލިބިވަޑައިގެންފި ނަމަ ދެވަނަ ފިޔަވަހީގެ މަސައްކަތް ފަށާ، މިޅު ރަށް ވަށާ ތޮށި ޖަހާނެކަމަށް ރައީސް ޞާލިހު ވަނީ ވައުދުވެވަޑައިގެންފަ އެވެ.

"ގިރާ ސަރަހައްދު ހިމާޔަތްކުރުމުގެ ފުރަތަމަ ފޭސް ނިމިއްޖެ. ދެން ހުރީ އިތުރަށް ބޭނުންވާ ބައެއް މަސައްކަތްތައް. އިރާދަކުރެއްވިއްޔާ ކުރިއަށް އޮތް ދައުރުގައި ތިޔަ ބޭފުޅުން އެދިވަޑައިގަންނަވާ ގޮތަށް އިތުރު ތޮށި އެ ސަރަހައްދުގައި ޖަހާ މުޅިރަށް އިރާދަކުރެއްވިއްޔާ އަޅުގަނޑު ހިމާޔަތްކޮށްދޭނަން"

ރައީސް ޞާލިހު

ރައީސް ޞާލިހު އިތުރަށް ވިދާޅުވީ ކޮޅުފުށީގައި 100 ހައުސިން ޔުނިޓު އެޅުމުގެ މަސައްކަތް މި ސަރުކާރުން ވާނީ ފަށާފައި ކަމަށެވެ. އަދި ކުރިއަށް އޮތް ދައުރުގެ ތެރޭގައި އޭގެ ތެރެއަށް އިތުރު 50 ހައުސިން ޔުނިޓު އިތުރުކޮށްދެއްވާނެ ކަމަށް ރައީސް ވަނީ ވައުދުވެވަޑައިގެންފަ އެވެ.

"މިރަށުގައި އަޅުގަނޑުމެން ބޯހިޔާވަހިކަމަށްޓަކައި 100 ހައުސިން ޔުނިޓުގެ މަސައްކަތް އަމަލީގޮތުން އަޅުގަނޑުމެން ފެށިން. އެކަން އިރާދަކުރެއްވިއްޔާ ކުރިއަށް އެދަނީ. ކުރިއަށް މި އޮތް ދައުރުގެ ތެރޭގައި އޭގެ ތެރެއަށް އިތުރު 50 ހައުސިން ޔުނިޓު އިތުރުކޮށް ރައްޔިތުން އެ ބޭނުންވާ ވަރަށް އަޅުގަނޑުމެން ބޯހިޔާވަހިކަން ފޯރުކޮށްދޭނަން"

ރައީސް ޞާލިހު

ރައީސް ޞާލިހު ވިދާޅުވީ އެމަނިކުފާނުގެ މި ދައުރުގައި ކޮޅުފުށީގައި ފެނާއި ނަރުދަމާގެ ނިޒާމު ގާއިމްކޮށްދެވިފައި ވާ ކަމަށެވެ. އަދި ކުރިއަށް އޮތް ދައުރުގައި މަގުހަދާ ރަށްތަކުގެ ތެރޭގައި ކޮޅުފުށި ހިމެނިގެންދާނެކަމުގެ ޔަގީންކަން ދެއްވާކަމަށެވެ.

"އިރާދަކުރެއްވިއްޔާ ކުރިއަށް އޮތް ދައުރުގެ ތެރޭގައި މަގުތައް ހަދާ ރަށްތަކުގެ ތެރޭގައި ކޮޅުފުށި ހިމެނި މިރަށުގެ މަގުތައް އަޅުގަނޑުމެން ޒަމާނީ ފެންވަރަކަށް ހަދާދޭނަން"

ރައީސް ޞާލިހު

ރައީސް ޞާލިހު ކޮޅުފުއްޓަށް ވަޑައިގެން ވަނީ ކޮޅުފުށީ ސުކޫލުގައި އިމާރާތްކުރާ 8 ކްލާސްރޫމާއި މަލްޓިޕާޕަސް ހޯލުގެ އިމާރާތް ރަސްމީކޮށް ހުޅުވާދެއްވާފަ އެވެ. އަދި މި ސަރުކާރުން ވަނީ ކޮޅުފުށީގައި ފެނުގެ ނިޒާމު ގާއިމްކޮށްދީފަ އެވެ. ރައީސްގެ މި ދަތުރުފުޅުގައި ވަނީ އެކަން ވެސް ރަސްމީކޮށް ފައްޓަވާދެއްވާފަ އެވެ.