ކުދި ރަށްތައް ތަރައްގީނުވެ އޮތީ ވެރިން ސިޔާސީ ވިސްނުން އިސްކުރާތީ: ރައީސް ޞާލިހު

މިހާ ހިސާބަށް އައިރު ކުދި ރަށްތައް ތަރައްގީނުވެ އޮތީ ކުރީ ސަރުކާރުތަކުގައި ވެރިކަން ކުރެއްވި ފަރާތްތައް ސިޔާސީ ވިސްނުން އިސްކުރައްވާތީކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.

ރައީސް ޞާލިހު މިފަދައިން ވިދާޅުވެފައިވަނީ އެމަނިކުފާނު މ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅު ނާލާފުށީގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

އެގޮތުން އެމަނިކުފާނު ވިދާޅުވީ މީގެ ކުރިން ވެރިކަން ކުރެއްވި ބޭފުޅުން، ވެރިކަމާއި ހަވާލުވެވަޑައިގަންނަވަނީ ވެސް އެ ފަސް އަހަރު ނިންމާ ދެވަނަ ދައުރެއް ހޯދުމުގެ ވިސްނުމުގައި ކަމަށެވެ. އަދި ވެރިކަން ކުރައްވާއިރު ޓާގެޓު ކުރައްވަނީ ގިނައިން ވޯޓު ލިބޭނެ އާދާބީތައް ދެނެގަނެ އެ ތަންތަނަށް ޚިދުމަތް ކުރުމަށް ކުރުމަށް ކަމަށެވެ.

ނަތީޖާއެއްގެ ގޮތުން ކުދި ރަށްތަކަށް ކުރީގެ ސަރުކާރުގައި އޮތީ ވަރަށް ބޮޑަށް އިހުމާލުވެފައިކަން ރައީސް ޞާލިހު ފާހަގަކުރެއްވި އެވެ.

"ކުދި ރަށްރަށަށް ތަރައްގީ ނައިސް މި އޮތީ، އޭރަކު ހުންނެވި ވެރިއެއްގެ ސިޔާސީ ވިސްނުން އިސްކުރާތީ. އަބަދުވެސް ފެންނަނީ ކުރިއަށް އޮތް ފަސް އަހަރުގެ ތެރޭގައި ބާއްވާ އިންތިޚާބު. އެހެންވީމާ އަމާޒު ހިފަނީ ވޯޓުލިބޭ ތަންތަނަށް. ގިނައިން ވޯޓު ފޮށި ބަހައްޓާ ތަންތަނަށް"

ރައީސް ޞާލިހު

ކުދި ކުދި އާބާދީތަކުގައި ދިރިއުޅޭ މީހުންނަކީ ސިޔާސީ ބައެއް ލީޑަރުންގެ ނަޒަރުގައި އެމީހުންނަށް އިންތިޚާބުތަކުގައި މާބޮޑު މަންފާއެއް ކުރާނެ ބައެއް ނޫންކަމަށް ރައީސް ޞާލިހު ވިދާޅުވި އެވެ.

އެ ވާހަކައާއި ގުޅުވާ ރައީސް ޞާލިހު ވިދާޅުވީ އެމަނިކުފާނުގެ ވިސްނުންފުޅު އެކަމުގައި ވަރަށް ތަފާތު ކަމަށެވެ.

އެގޮތުން އެމަނިކުފާނާއި، މިހާރު ކޯލިޝަން ހަދައިގެން ތިއްބެވި ބޭފުޅުން ވެސް ޤަބޫލުކުރައްވަނީ ރާއްޖޭގެ ހުރިހާ ރައްޔިތުންނަށް ވެސް ތަފާތު ކުރުމެއް ނެތި އަސާސީ ޚިދުމަތްތައް ފޯރުކޮށްދެވެން ޖެހޭނެކަން ކަމަށް ރައީސް ޞާލިހު ފާހަގަކުރެއްވި އެވެ.

އެއާއެކު ރައީސް ޞާލިހު ވިދާޅުވީ ރާއްޖެ ދެކެން ބޭނުންވާ އަމާންކަމާއި ފާގަތިކަން ހޯދައިދެވޭނީ ކުދިރަށްތަކާއި ބޮޑެތި ރަށްތަކުގެ މެދުގައި ސަރުކާރުތަކުން ގެންގުޅޭ ތަފާތުކުރުންތައް ނައްތާލާއިގެން ކަމަށެވެ.