ޕެޕާ ސްޕްރޭއާއި މިރުހު ދުމަށް ކުރާ ޚަރަދުކުރުން ހުއްޓާލައިފިން: ރައީސް ޞާލިހު

މުޒާހަރާތައް ކޮންޓްރޯލުކުރުމަށް ފުލުހުން ޖަހާ ޕެޕާ ސްޕްރޭއާއި މިރުހުދުމަށް ސަރުކާރުގެ ބަޖެޓުން ޚަރަދުކުރުން މި ސަރުކާރުން ހުއްޓާލާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.

ރައީސް ޞާލިހު މިފަދައިން ވިދާޅުވެފައިވަނީ އެމަނިކުފާނު ރިޔާސީ ކެމްޕޭނަށް މ އަތޮޅަށް ކުރައްވާ ދަތުރުޅުގައި ނާލާފުއްޓަށް ވަޑައިގެން އެ ރަށުގައި އޮތް ޖަލްސާއެއްގައި ވާހަކަދައްކަވަމުން ނެވެ.

އެގޮތުން ރައީސް ޞާލިހު ވިދާޅުވީ މުޒާހަރާތައް ކޮންޓްރޯލުުކުރުމަށް ފުލުހުންގެ އަތަށް ދިނުމަށް މީގެ ކުރިން ޕެޕާ ސްޕްރޭއާއޮ މިރުހު ދުމަށް ދައުލަތުގެ ބަޖެޓުން ބޮޑެތި ޚަރަދުތަކެއް ކުރަމުން އައިސްފައިވާ ކަމަށެވެ.

އެހެން ނަމަވެސް މިހާރު އެކަންކަން އެގޮތަށް ކުރުން ހުއްޓާލާފައިވާނެ ކަމަށް ރައީސް ޞާލިހު ވަނީ ވިދާޅުވެފަ އެވެ.

"ދައުލަތުގެ ބަޖެޓުން މީގެކުރިން ގިނަ ޚަރަދުތަކެއް ކުރަން ޖެހިފައި އޮތް ޕެޕާ ސްޕްރޭ އަށާއި، މިރުސް ދުމަށް. އެހެން ނަމަވެސް މި ސަރުކާރުގައި އެކަން ބަދަލުކޮށްފިން"

ރައީސް ޞާލިހު

އެމަނިކުފާނު އެ ވިދާޅުވީ މުޒާހަރާތައް ކޮންޓްރޯލުކުރުމަށް މިހާރު އާންމު ރައްޔިތުންގެ ގަޔަށް ޕެޕާ ޕްރޭޖެހުމާއި މިރުހދުން ޖެހުންފަދަ ކަންކަން ކުރުން ހުއްޓުވާފައިވާކަމަށެވެ.

އެގޮތުން ފުލުހުންގެ ޚިދުމަތަށް ވެސް ކުރިއާއި ޚިލާފަށް ބޮޑެތި ހެޔޮ ބަދަލުތަކެއް ގެނެސްދެވިފައިވާކަމަށް ރައީސް ޞާލިހު ވަނީ ވިދާޅުވެފަ އެވެ.

އެމަނިކުފާނު އެފަދައިން ވިދާޅުވި ނަމަވެސް އިދިކޮޅުން ކުރާ މުޒާހަރާތަކުގައި ފުލުހުން މިހާރު ވެސް ގެންދަނީ ހާލަތާއި ނުބައްދަލު ބާރުގެ ބޭނުން ކުރަމުންނެވެ. އަދި މުޒާހަރާތައް ރޫޅާލުމަށް މީހުންގެ ގަޔަށް ގިނަ އަދަދަދަކަށް ޕެޕާ ސްޕްރޭ ޖަހާ މަންޒަރުތައް ވެސް ފެނިގެން ދެއެވެ.

އޭގެ އިތުރުން މުޒާހަރާތަކުގައި ހަރަކާތްތެރިވާ ނޫސްވެރިންނަށް އަމާޒުކޮށްގެން ވެސް ފުލުހުން ޕެޕާ ސްޕްރޭ ޖަހާތީ އެކަން ކަމާއި ގުޅުންހުރި އިދާރާތަކަށް ވެސް ވަނީ ހުށައަޅާފަ އެވެ. އަދި އިންސާނީ ހައްގުތައް ކަށަވަރުކޮށްދިނުމަށް މަސައްކަތް ކުރާ ޖަމުއިއްޔާ ޖަމާއަތްތަކުން ވެސް ވަނީ އެތައް ފަހަރެއްގެ މަތިން އެފަދަ ކަންކަން ހުއްޓުވުމަށް ސަރުކާރަށް ގޮވާލާފަ އެވެ.