ދިގުލައިގެންދާ އާރަށު މައްސަލައިގެ އިސްތިއުނާފު އަޑުއެހުމެއް ބުދަ ދުވަހު ބާއްވަނީ!

ވާދަވެރި ސިޔާސީ ލީޑަރު ރައީސް ޢަބްދުالله ޔާމީނުގެ މައްޗަށް ވ.އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ މިދިޔަ ޑިސެމްބަރު މަހުގެ 25ގައި އިއްވި ހުކުމުގެ އިސްތިއުނާފު މައްސަލައިގެ އަޑުއެހުމެއް އަންނަ ބުދަ ދުވަހަށް ތާވަލުކޮށްފި އެވެ.

ރައީސް ޔާމީނުގެ މައްޗަށް ކުރިމިނަލް ކޯޓުން ކުރި ހުކުމް، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައި ވަނީ މިއަހަރުގެ ފެބުރުއަރީ މަހުގައެވެ. އެހެން ނަމަވެސް ޝަރީޢަތް ތާވަލުނުކުރެވި ގިނަ ދުވަސްތަކެއް ވުމަށްފަހު އެ މައްސަލައިގެ އަޑުއެހުންތައް ފެށީ ޖޫން މަހުގައެވެ.

ޖޫން މަހުގައި ފެށި އަޑުއެހުންތަކުގެ ތެރެއިން މައްސަލަ ނިންމުމަށް އަޑުއެހުމެއް ނުވަތަ ދެ އަޑުއެހުމަށް ވެފައިވަނިކޮށް މައްސަލަ ބައްލަވާ ފަނޑިޔާރުންގެ ތެރެއިން ފަނޑިޔާރަކު ޗުއްޓީ ނެންގެވުމާއި ގުޅިގެން އަޑުއެހުންތައް އޮތީ މެދުކެނޑިފަ އެވެ.

އަދި އެ މައްސަލައިގެ އަޑުއެހުންތައް ޖޫން މަހުގައި މެދުކެނޑުނު ގޮތަށް އެއްވެސް އަޑުއެހުމެއް ނުބޭއްވި އޮތުމަށްފަހު، އަންނަ ބުދަ ދުވަހުގެ މެންދުރުމަހު 14:00 އަށް ވަނީ ހައިކޯޓުގައި އަޑުއެހުމެއް ތާވަލުކޮށްފަ އެވެ. މި މައްސަލައިގައި ރައީސް ޔާމިނުގެ ފަރާތްޕުޅުން ވަނީ ހުރިހާ އިސްތިއުނާފީ ނުކުތާތަކެއް ހުށައަޅާ، ދައުލަތުން ޖަވާބުވެސް ދީފައެވެ.

ދެން އޮންނާނީ މައްސަލައިގައި ދެ ފަރާތުން ފާހަގަކުރަން ހުރި އިތުރު ކަންކަން ފާހަގަކުރުމަށް ފަހު މައްސަލައިގެ ހުކުމް ހުކުމެވެ.

އާރަށު މައްސަލައިގެ އިސްތިއުނާފު ދިގުލައިގެން ގޮސް، ރައީސް ޔާމީނަށް އިންތިޚާބުގައި ޕީޕީއެމްގެ ޓިކެޓުގައި ވާދަކުރެއްވުމުގެ ދޮރުވެސް ބަންދުވެގެން ދިޔައެވެ. އިލެކްޝަނުން އެމަނިކުފާނުގެ ކެންޑިޑެސީ ބަލައިނުގަތުމުން ސުޕްރީމް ކޯޓަށް ހުށަހެޅުއްވި މައްސަލާގައި ކޯޓުން ނިންމީ އިލެކްޝަނުން އެމަނިކުފާނުގެ ކެންޑިޑެސީ ބަލައިނުގަތީ ރަނގަޅަށް ކަމަށެވެ.

އެފަހުން ރައީސް ޔާމީނުގެ ފަރާތްޕުޅުން ވަނީ އެމަނިކުފާނުގެ މައްޗަށް އާރަށު މުއާމަލާތާއި ގުޅިގެން އިއްވާފައިވާ ޖަލު ހުކުމާއި ޖޫރިމަނާގެ އަދަބު ފަސްކޮށްދިނުމަށް އެދިވަޑައިގެންފަ އެވެ. އެ މައްސަލައިގައި ހައިކޯޓުން ވަނީ ޖޫރިމަނާގެ އަދަބު ފަސްކުރުމުގެ އަމުރެއް ނެރެދެއްވާފަ އެވެ. އެހެން ނަމަވެސް ޖަލު ހުކުމް ފަސްކުރުމަށް އެ ކޯޓުން އަމުރެއް ނެރެދެއްވާފަ އެއް ނުވެއެވެ.

އާރަށު މައްސަލައިގެ އަޑުއެހުމެއް ބުދަ ދުވަހު ބާއްވަން ތާވަލުކޮށްފައިވާއިރު، އެ މުއާމަލާތާއި ގުޅިގެން އެމަނިކުފާނުގެ މައްޗަށް ކޮށްފައިވަނީ ނުހައްގު ހުކުމެއް ކަމަށާއި، ހައިކޯޓުން އެމަނިކުފާނު މިނިވަންވެ ވަޑައިގަންނަވާނެ ކަމުގެ ޔަގީންކަން އެމަނިކުފާނުގެ އިސް ގާނޫނީ ވަކީލު ޑރ މުޙައްމަދު ޖަމީލު އަހުމަދު ވަނީ ދެއްވާފަ އެވެ.