މިނިވަން ވިޔަފާރީގެ ފުރުސަތުތައް އިތުރަށް ހުޅުވައިލުމަށް ހަރުދަނާ އުސޫލުތަކުން ކުރާ ކޮންމެ ކަމަކަށް ތަރުހީބުދޭނަން: އެމްޑީޕީ

ރާއްޖޭގައި މިނިވަން ވިޔަފާރީގެ ފުރުސަތުތައް ފުޅާކުރުމަށް ހަރުދަނާ އުސޫލުތަކުގެ ތެރެއިން ކުރާ ކޮންމެ ކަމަކަށް ތަރުހީބުދޭ ކަމަށް އިދިކޮޅު އެމްޑީޕީން ބުނެފިއެވެ.

އެމްޑީޕީން ނެރުނު ނޫސް ބަޔާނެއްގައި ބުނެފައިވަނީ، ދިވެހިރާއްޖޭގެ ތަރައްގީގައި ބޭރުގެ އިންވެސްޓަރުންގެ ދައުރު ބޮޑު ކަމަށާއި އެ ޕާޓީން އަބަދުވެސް ބޭރުގެ އިންވެސްޓަރުންނަށް މަރުހަބާ ކިޔާ ކަމަށެވެ. އަދި ރާއްޖޭގެ އިގްތިސާދު ހަރުދަނާކޮށް، ޕްރައިވެޓް ސެކްޓަރު ފުޅާކުރުމަށް ކުރެވޭ މަސައްކަތްތަކަށް އަބަދުވެސް ތާއީދުކުރާ ކަމަށް އެ ބަޔާނުގައިވެއެވެ.

އެހެން ނަމަވެސް، ރައްޔިތުންނަށް ބޯހިޔާވަހިކަން ހޯދައިދިނުމުގެ ނަމުގައި ދައުލަތުން ބޮޑެތި ޚަރަދުތަކެއް ކޮށްގެން ހިއްކާ ފުށިދިއްގަރުފަޅުގެ ބޮޑު ބައެއް އަބޫދާބީގެ އީގަލް ހިލްސް ކުންފުންޏަށް ދިނުމުގައި ސަރުކާރުން އަމަލުކުރަމުންދާ ގޮތާމެދު ސުވާލު އުފެދޭ ކަމަށް އެމްޑީޕީން ފާހަގަކުރެއެވެ. ޚާއްސަކޮށް، އެ ކުންފުނިން ރަސްމީކޮށް ހާމަކޮށްފައިވާ މައުލޫމާތާއި ސަރުކާރުން ހާމަކުރާ ވާހަކަތަކާ ދިމާނުވާ ކަންތައްތަކެއް ހުރި އިރު، މި އެއްބަސްވުމުގެ ފުރިހަމަ ތަފްސީލު ހާމަކުރުމަށް ސަރުކާރުން ފަސްޖެހެމުންދިއުމަކީ ނުރައްކާތެރި ކަމެއްގެ ގޮތުގައި އެ ޕާޓީން ސިފަކޮށްފައިވެއެވެ.

މިކަމާ ގުޅިގެން އެމްޑީޕީން ވަނީ، އީގަލް ހިލްސް ކުންފުންޏާއެކު ވެފައިވާ އެއްބަސްވުމުގެ ދަށުން ދެ ފަރާތުން އަދާކުރަންޖެހޭ މަސްއޫލިއްޔަތުތަކާއި، މާލީ އިލްތިޒާމުތަކާއި، ދީފައިވާ މާލީ ލުއިތަކުގެ އިތުރުން އެއްބަސްވުމުގެ މުއްދަތު ހިމެނޭހެން އެންމެހައި ތަފްސީލުތައް ރައްޔިތުންނަށް ވަގުތުން ހާމަކުރުމަށް ސަރުކާރަށް ގޮވާލާފައެވެ.

މީގެ އިތުރުން، މި މަޝްރޫއުގެ ދަށުން ދިވެހިރާއްޖޭގެ ބިން ބިދޭސީންނަށް މިލްކުވާނެ އެއްވެސް އުސޫލެއް ނުވަތަ މުސްތަގުބަލުގައި ބިމުގެ ދާއިމީ މިލްކުވެރިކަމެއް ބިދޭސީންނަށް ލިބިދާނެ ފަދަ އެއްވެސް މާއްދާއެއް އެއްބަސްވުމުގައި ހިމެނިފައިވޭތޯ ސާފުކޮށްދިނުމަށް ވެސް އެމްޑީޕީން އެދިފައިވެއެވެ.

ދިވެހިރާއްޖޭގެ ބިން ބިދޭސީންނަށް މިލްކުވާ ގޮތަށް އެއްވެސް ސިޔާސަތެއް އެކަށައެޅުމުގެ އިހުތިޔާރު ސަރުކާރަށް ލިބިގެން ނުވާނެ ކަމަށް ބަޔާންކޮށް އެމްޑީޕީން ބުނީ، ދައުލަތުގެ އެންމެހައި ބާރުތައް ފެށިގެން އަންނަނީ އަދި ދެމިއޮންނަނީ ރައްޔިތުންގެ ކިބައިގައި ކަމަށް ގާނޫނުއަސާސީގެ 4 ވަނަ މާއްދާގައި ބަޔާންކޮށްފައިވާ ކަމަށެވެ. އެހެންކަމުން، މިފަދަ ބޮޑު ނިންމުމެއް ނިންމަންވާނީ ރައްޔިތުންގެ ހިޔާލު ހޯދުމުގެ އާންމު ވޯޓަކުން ކަމަށާއި، ރައްޔިތުންގެ ރުހުމެއް ނެތި މިފަދަ މުއާމަލާތްތައް ނުހިންގުމަށް އެ ޕާޓީން ވަނީ ސަރުކާރަށް ގޮވާލާފައެވެ.