އަމިއްލަ ދަނޑުގައި ވުލްވްސް އަތުން ހަނިގޮތަކަށް ޔުނައިޓެޑް މޮޅުވެއްޖެ!

އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ވުލްވްސް އާއި ދެކޮޅަށް މެންޗެސްޓާ ޔުނައިޓެޑް ކުޅުނު މެޗުން ހަނިގޮތަކަށް އެޓީމު މޮޅުވެއްޖެ އެވެ. މި މެޗު އެޓީމުން ކާމިޔާބުކުރީ 1-0 ގެ ނަތީޖާއަކުން ނެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މެންޗެސްޓާ ޔުނައިޓެޑުން މެޗު ޑޮމިނޭޓުކުރި ނަމަވެސް، މިހާފުގައި ދެ ޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

އެގޮތުން ޔުނައިޓެޑުގެ ރަޝްފޯޑް އާއި އެންތަނީގެ އިތުރުން ޑިފެންޑަރު ވަރާންއަށް ލިބުނު ހުސް ފުރުސަތުތަކުގެ ބޭނުން ނުކުރެވުނު އިރު، މިހާފުގައި ވުލްވްސްގެ ބްރެޒިލް ފޯވާޑް މެތިއުސް އަދި ޕަބްލޯ ސަރާބިއާ އަށް ލިބުނު ހުސް ފުރުސަތުގައި ބޭނުން ނުކުރެވި، ފުރަތަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ޔުނައިޓެޑުން މެޗު ޑޮމިނޭޓުކުރި ނަމަވެސް ކައުންޓާ އެޓޭކުތަކުގައި ވުލްވްސް އިން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ދެވަނަ ހާފު ފެށިގެން ހަތަރުވަނަ މިނެޓުގައި މެތިއުސް ފޮނުވާލި ހަމަލާ އަމާޒުވީ ގޯލްގެ އަރިމަތީ ދަނޑިއަށެވެ. އަދި ދެވަނަ ހާފުގެ 53 ވަނަ މިނެޓުގައި ޔުނައިޓެޑުގެ ބްރެޒިލް ފޯވާޑް އެންތަނީ އަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ ވުލްވްސްގެ ކީއްޕަރު ވަނީ ހުޝިޔާރުކަމާއެކު ދިފާއުކޮށްފައެވެ އެވެ.

މިމެޗުގައި ޔުނައިޓެޑުން ކާމިޔާބުކުރި ހަމައެކަނި ލަނޑު ދެވަނަ ހާފުގެ 76 ވަނަ މިނެޓުގައި ކާމިޔާބުކޮށްދިނީ އެޓީމުގެ ޑިފެންޑަރު ރަފައެލް ވަރާން އެވެ. މިއީ އެޓީމުގެ އިގިރޭސި ޑިފެންޑަރު ވެންބިސާކާ އަރިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މެޗުގެ ފަހު ދިހަ މިނެޓްގެ ތެރޭގައި ވުލްވްސްގެ ޕޯޗުގަލް ފޯވާޑް ފަބިއޯ ސިލްވާ އަށް ވަރަށް ހުސް ތިން ފުރުސަތު ލިބި ބޭނުން ނުކުރެވުނުއިރު، މެޗުގެ އިތުރު ވަގުތުގެ ތެރޭގައި ޔުނައިޓުގެ ޕެނަލްޓީ އޭރިއާ ތެެރެއިން އެޓީމުގެ ކީއްޕަރު އޮނާނާ ބޯޅަ ހޯދަން އުޅުމުގެ ތެރޭގައި ވުލްވްސްގެ ކުޅުންތެރިޔަކަށް ފައުލުކުރިކަށް ބުނެ އެޓީމުގެ ކުޅުންތެރިންނާއި އޮފިޝަލުން ވަނީ ވަރަށް ބޮޑަށް ހިތްހަމަ ނުޖެހުން ފާޅުކޮށްފައެވެ. ނަމަވެސް ރެފްރީ ނިންމީ އެއީ ފައުލްއެއް ނޫންކަމަށެވެ.

މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން މެންޗެސްޓާ ޔުނައިޓެޑް ކުރީގައި އޮވެގެންނެވެ. ލީގުގައި މި މަހުގެ 19 ވަނަ ދުވަހު ޔުނައިޓް ނުކުންނާނީ ރަށުން ބޭރުގައި ޓޮޓެންހަމް އާއި ދެކޮޅަށެވެ. އަދި ހަމަ އެދުވަހު ވުލްވްސް ނުކުންނާނީ ބްރައިޓަން އާއި ދެކޮޅަށެވެ.