މުޒާހަރާކުރަމުން ދިޔަ އެމްޑީޕީ ސަޕޯޓަރުންނާއި ސަލާންކޮށް މުއިއްޒު ނަމޫނާ ދައްކައިފި!

ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ތިލަދުންމައްޗަށް ކުރައްވާ ރިޔާސީ ކެމްޕޭނު ދަތުރުފުޅުގައި ހއ ކެލާއަށް ވަޑައިގެންނެވި އިރު، އެމަނިކުފާނުގެ އިސްތިގުބާލުގައި ތިބި މީހުންނާއި ތަންކޮޅެއް ދުރުގައި ހުއްޓިގެން ތިބެ އެމްޑީޕީގެ ސަޕޯޓަރުން ގެންދިޔައީ އެމަނިކުފާނާއި ދެކޮޅަށް މުޒާހަރާކުރަމުން ނެވެ.

އެމްޑީޕީގެ ސަޕޯޓަރުން ގޮވަމުން ގެންދިޔައީ އެމީހުން ގާތަށް ވަޑައިގެން ބައްދަލުކުރައްވަން މުއިއްޒަށް ކެރިވަޑައިނުގަންނަވާނެ ވާހަކައެވެ. އަދި އެމީހުންގެ އަޑުއެހުމުގެ ބަދަލުގައި ކާރުކޮޅަށް އަރާވަޑައިގެން މުއިއްޒު އެތަނުން ވަޑައިގަންނަވާނީ ކަމަށެވެ.

އެހެން ނަމަވެސް، އެމީހުން މުޒާހަރާކުރަމުން ދަނިކޮށް، ފެނުނީ ޑރ މުއިއްޒުގެ އިސްތިގުބާލުގައި ތިބި މީހުންނާއި ސަލާމްކުރުމަށްފަހު ވޭނަށް އަރާވަޑައިގަތުމަށް ވަޑައިގެން، ވަކި ހިސާބަކުން އަނބުރާލައްވާ ހިންގަވާފައި އެމްޑީޕީގެ ސަޕޯޓަރުން ތިބި ހިސާބަށް ވަޑައިގެންނެވި ތަނެވެ. އަދި އެވަގުތުގައި އެތަނުގައި އެމްޑީޕީގެ ދިދަތައް ހިފައިގެން ތިބެ މުއިއްޒާއި ދެކޮޅަށް މުޒާހަރާކުރަމުން ދިޔަ އެންމެނާއި ވަކިވަކުން ސަލާމްކުރެއްވި އެވެ.

އެމީހުން ޑރ މުއިއްޒަށް ވޯޓު ނުދޭނެކަމަށާއި، މުއިއްޒާއި ދެކޮޅުކަމަށް ފާޅުގައި ބުނަމުން ގެންދަނިކޮށް ވެސް ޑރ މުއިއްޒު ހިނިތުންވުމާއެކު އެމީހުންނާއި ސަލާންކުރައްވަމުން ގެންދިޔައެވެ. އަދި ޑރ މުއިއްޒު އެމްޑީޕީގެ މެމްބަރުންނާއި ސަލާމްކުރައްވަމުން ގެންދެވިއިރު، އެތަނުގައި ތިބި ޕީޕީއެމް ސަޕޯޓަރުން ގެންދިޔައީ އެމަނިކުފާނަށް ތަރުހީބު ދީ "ސާބަސް" ދެމުންނެވެ.

އެމްޑީޕީގެ މެމްބަރުންނާއި ސަލާމްކުރެއްވުމަށްފަހު ޑރ މުއިއްޒު ވޭނަށް އަރާވަޑައިގަތުމަށް ވެސް ދިޔައީ ހިންގަންވާފައެވެ.

ޑރ މުއިއްޒާއި ދެކޮޅަށް މުޒާހަރާކުރި ފަރާތްތަކާއި ދޭތެރޭގައި އެމަނިކުފާނު ކަންތައް ކުރެއްވި ގޮތާއި، އަދި އެމީހުންނާއި ބައްދަލުކުރައްވާ ސަލާމްކުރެއްވުމުގައި އަމަލުކުރެއްވި ގޮތަށް އިދިކޮޅު ކޯލިޝަން މިވަގުތު ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވަނީ ތައުރީފު ކުރައްވާފަ އެވެ.

"އަޅުގަނޑުމެން މި އުޅެނީ ދިވެހީންގެ ރާއްޖެއެއް ބިނާކުރަން. އަޅުގަނޑުމެންގެ ޝިއާރަކީ ދިވެހީންގެ ރާއްޖެ. އެހެންވީމަ ދިވެހީންގެ ރާއްޖެއެއް ދިވެހީންނަށް ހޯދައިދޭން އުޅުއްވާ ކެންޑިޑޭޓަކު ޖެހޭނެ ހުރިހާ ފިކުރެއްގެ ހުރިހާ އެންމެންނާ ވެސް ވާހަކަ ދެއްކެން، ސަލާން ކުރެވެން،"

ޕީއެންސީގެ ރައީސް އަބްދުއްރަހީމް

ސިޔާސީ ލީޑަރުން ރަށްތަކަށް ވަޑައިގަތުމުން، އެ ލީޑަރުންނާއި ދެކޮޅަށް މުޒާހަރާކުރުމަކީ އަބަދުވެސް ކުރާ ކަމެކެވެ. އެގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރަށްތަކަށް ވަޑައިގަންނަވާއިރު ވެސް ރައްޔިތުން ނިކުމެ ޝުއޫރު ފާޅުކުރުމަށް މަސައްކަތް ކުރެއެވެ.

އެހެން ނަމަވެސް އެމީހުންނާއި ބައްދަލުކޮށް، އެމީހުންގެ ޝުއޫރުތައް އަޑުއަހާ އެމީހުންނާއި ސަލާންކުރުމަށް ވަޑައިގަންނަވާތަނެއް ނުފެއެވެ. އޭގެ ބަދަލުގައި ފެނިގެން ދަނީ އެސްއޯ ފުލުހުން ރަށްތަކަށް އަރުވާ މުޒާހަރާކުރާ މީހުން ވަކި ސަރަހައްދުތަކެއްގައި ބަންދުކޮށް، ރަށުގެ އެކި ސަރަހައްދުތައް ކޯޑޮކްކޮށް ޓޭޕުދަމާ ރައީސް ޞާލިހުގެ ފައިންޕުޅު ނުފެންނަހާ ދުރަށް މުޒާހަރާކުރާ މީހުން ޖައްސަމުންދާ މަންޒަރެވެ.

އެކަމުގެ ސަބަބުން ރަށްތަކުގެ މަޝްރަހު ހޫނުވެ، ގިނަ ބަޔަކަށް އަނިޔާވެ، އަދި މުޒާހަރާގެ ތެރެއިން ބައެއް މީހުން ހައްޔަރުކުރާ ހިސާބަށް ވެސް ކަންކަން ގޮސްފައި އެބަހުއްޓެވެ.

އެހެން ނަމަވެސް ޑރ މުއިއްޒުގެ ފަރާތުން ފެނިގެން ދިޔައީ ތަފާތު މަންޒަރެކެވެ. އެއީ ސިޔާސީ ލީޑަރުން ދައްކަންޖެހޭ މިސާލެއްކަމަށް ބުނެ ސޯޝަލް މީޑިއާގައި ވެސް ގިނަ ބަޔަކު ދަނީ ޑރ މުއިއްޒު އެކަން ކުރެއްވި ގޮތަށް ތައުރީފުކުރަމުންނެވެ.