ރައީސް ޞާލިހު، ކޮންމެ ރަށަކަށް ވެސް ދެތިން ފަހަރު ވަޑައިގެންފައިވޭ: މާރިޔާ

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދިވެހިރާއްޖޭގެ ކޮންމެ ރަށަކަށްވެސް ދެތިން ފަހަރު ވަޑައިގެންފައިވާ ކަމަށް ވިދާޅުވެ، އެމަނިކުފާނުގެ ކެންޕެއިން ތަރުޖަމާނު އަދި ޑިފެންސް މިނިސްޓަރު މާރިޔާ އަހުމަދު ދީދީ އިތުރުފުޅު ހައްދަވައިފިއެވެ.

ރައީސް ޞާލިހު ގެ ތަރުޖަމާނުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، މާރިޔާ ވަނީ އިދިކޮޅު ކެންޑިޑޭޓުންނަށް، ޚާއްސަކޮށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުއަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން، މާރިޔާގެ ވާހަކަ ބޮޑަށް އަމާޒުކުރައްވާފައިވަނީ ޑރ. މުޢިއްޒު ރަށްރަށަށް ވަޑައިގެން ވެވަޑައިގަންނަވަމުންދާ ވަޢުދު ތަކާއި، ކުދި ރަށްރަށުގެ އިތުރުން ބޮޑެތި ރަށްރަށަށްވެސް ކަންކަން ކޮށްދެއްވާނެ ކަމަށް ވެވަޑައިގަންނަވަމުންދާ ވަޢުދު ތަކަށް މާރިޔާ ވަނީ ވަރަށް ބޮޑަށް ފާޑުވިދާޅުވެފައެވެ.

އަދި މުޢިއްޒު ވަޢުދުވެވަޑައިގަންނަވުމުންދަނީ ރައްޔިތުން ބޭނުންވާ ކަންކަން ބެއްލެވުމެއްވެސް ނެތިކަމަށާ އެހެން ނަމަވެސް އެމްޑީޕީން ކެންޕެއިން ކުރަނީ ރައްޔިތުންނާއި ވަރަށް ގާތުން ކަމަށް އޭނާ ވިދާޅުވި އެވެ.

އަޅުގަނޑުމެން މި ކެންޕެއިން މި ގެންދަނީ އަބަދުވެސް އެމްޑީޕީ ގެންދާގޮތަށް. ރައްޔިތުންނާ ވާހަކަދައްކައި، ރައްޔިތުންގެ ޚިޔާލު ހޯއްދަވައި، ރައްޔިތުން ބޭނުންވާ ކަންކަން ކޮށް، ރައްޔިތުންގެ ތެރެއިން ނުކުންނަ މެނިފެސްޓޯ ހިފައިގެން.

މާރިޔާ އަހުމަދު ދީދީ

މިއާއެކު މާރިޔާ ވަނީ ރައީސް ޞާލިހަކީ ރާއްޖޭގެ ހުރިހާ ރަށަކަށްވެސް ދެތިން ފަހަރު ވަޑައިގެންފައިވާ ބޭފުޅެއް ކަމަށް ވިދާޅުވެ އިތުރުފުޅު ހައްދަވަމުން، ޑރ މުޢިއްޒު އަކީ ޕީއެންސީ އަދި ދިވެހިރާއްޖޭގެ ދީނީ ޖަމިއްޔާއެއް ކަމަށްވާ، ޖަމިއްޔަތުއް ސަލަފް ގެ ކެންޑިޑޭޓެއް ކަމަށް ވިދާޅުވެފައެވެ.

ރައީސް ޞާލިހު، ހަމަގައިމުވެސް ކޮންމެ ރަށަކަށްވެސް، އެންމެ މަދުވެގެން ދެތިންފަހަރު ވަޑައިގެންފައިވޭ. އެކަމަކު މޫދު ކަނޑު އެކަހަލަ ކަންކަމަށްވެސް ވަރަށް ނުފަރިތަ ބޭފުޅެއް، ޕީއެންސީ/ސަލަފުގެ ކެންޑިޑޭޓަކީ.

މާރިޔާ އަހުމަދު ދީދީ

ރައީސް ޞާލިހު ރާއްޖޭގެ ހުރިހާ ރަށަކަށް ދެތިން ފަހަރު ވަޑައިގެންފައިވާ ކަމަށް މާރިޔާ ވިދާޅުވާއިރު، އެމަނިކުފާނުގެ މި ދައުރު ނިމިގެންދާއިރު، އެންމެ ފަހަރަކުވެސް ވަޑައިނުގަންނަވާ އާބާދީ ބޮޑެތި ރަށްތައްވެސް އަދި ކުދި ރަށްތައްވެސް ހުރިކަން ފާހަގަކޮށްލަންޖެހެއެވެ.