ކޮވިޑުގެ ވެކްސިން ދިނުން ހަރުދަނާކުރަން ރާއްޖެއަށް 10 މިލިއަން ޑޮލަރުގެ ހިލޭ އެހީ ދެނީ!

ކޮވިޑް-19 އިން ރައްކާތެރިވުމަށް ވެކްސިން ދިނުން ރާއްޖޭގައި ހަރުދަނާކުރުމަށް އޭޝިއަން ޑިވެލޮޕްމަންޓް ބޭންކް (އޭޑީބީ) އިން 10 މިލިއަން ޑޮލަރު (155.1 މިލިއަން ރުފިޔާ)ގެ ހިލޭ އެހީ ރާއްޖެއަށް ދޭން މިއަދު ފާސްކޮށްފި އެވެ.

އޭޑީބީން މިއަދު ނެރުނު ބަޔާނެއްގައި ބުނީ، ދިވެހިރާއްޖޭއިން 2021 ވަނަ އަހަރު ކުރިއަށް ގެންގޮސްފައިވާ ކޮވިޑް-19 ގެ ވެކްސިން ކެންޕެއިންގެ ސަބަބުން ބޮޑު ކާމިޔާބީއެއް ލިބިފައިވާ ކަމަށެވެ. އަދި އެ ބޭންކުން މި ދޭ ހިލޭ އެހީގެ މައިގަނޑު މަގުސަދަކީ، ކޮވިޑް-19 ގެ ބޫސްޓަރ ޑޯޒް ދިނުމާއި، ކުޑަ ކުދިންނަށް އެ ވެކްސިން ދިނުމަށް ކުރަމުންދާ މަސައްކަތްތަކަށް އިތުރު އެހީތެރިކަން ފޯރުކޮށްދިނުން ކަމަށެވެ.

އަދި މި އެހީގެ ދަށުން ވެކްސިން ރައްކާކުރުމަށް މިހާރު މާލޭގައި ހަދާފައި ހުރި ވަގުތީ ފެސިލީޓީގެ ބަދަލުގައި، ހުޅުމާލޭގައި ސެންޓްރަލް ކޯލްޑް ސްޓޯރޭޖް ފެސިލިޓީއެއް ގާއިމްކުރެވިގެންދާނެ ކަމަށްވެސް އޭޑީބީ އިން ބުނެއެވެ.

އެގޮތުން ގާއިމް ކުރެވޭ ފެސިލިޓީގައި ބޭނުން ކުރާނީ އިއާދަކުރަނިވި ހަކަތަ ކަމަށާއި، އަދި އެތަން ފަރުމާކޮށްފައި ހުންނާނީ މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތަކުގެ އަސަރު ކުޑަވާނެ ގޮތަށް ކަމަށްވެސް އެ ބަޔާނުގައި ބުނެފައިވެއެވެ.

އަދި އެތަނުގައި ވެކްސިން އާއި މެޑިކަލް ސާމާނާއި ލެބޯޓްރީއަށް ބޭނުންވާ ސާމާނު އެކަށީގެންވާ ގޮތެއްގައި ރައްކާކުރުމަށް އެކަށީގެންވާ ޖާގަ ހުންނާނެ ކަމަށާ، ކޯލްޑް ޗެއިން އިކުއިޕްމަންޓް މަރާމާތުކޮށް ބެލެހެއްޓުމަށް ވަކި ތަނެއް ހުންނަ އިރު، ވެކްސިން ޖެހުމަށް ފަހު އުކާލާ ސިރިންޖާއި އެހެނިހެން ތަކެތި ރައްކާތެރިކަމާ އެކު މެނޭޖުކުރާނެ ތަނެއްވެސް ހުންނާނެ ކަމަށް ބުނެފައިވެއެވެ. އަދި މީގެ އިތުރުން އެތަނުގައި ރާއްޖޭގެ ވެކްސިން ޑޭޓާބޭސްގެ ބެކަޕް ސާވޭއެއް ހުންނާނެ ކަމަށް އޭޑީބީ އިން ބުނެއެވެ.

ރާއްޖޭގެ އެކި ކަންކޮޅުތަކުގައި ވެކްސިނާއި ބޭސް ފޯރުކޮށްދިނުމުގެ ކަންކަން ހަރުދަނާ ކުރުމަށް މި މަޝްރޫއުގެ ދަށުން ފޯރުކޮށްދޭނެ ތަކެތީގެ ތެރޭގައި ހިމެނެނީ:

- ޖުމްލަ ހަތް ލޯންޗު

- ރާއްޖޭގެ ހަ ސަރަހައްދަށް، ކޮންމެ ހިސާބަކަށް ލޯންޗެއް

މާލެ ސަރަހައްދަށް އެއް ލޯންޗު

- ދެ ރެފްރިޖަރޭޓެޑް ލޮރީ (މާލެ ސަރަހައްދަށް)

- ދެ ވޭން (މާލެ ސަރަހައްދަށް)

މީގެ އިތުރުން، އޭޑީބީގެ މި އެހީގައި ރާއްޖޭގެ ހުރިހާ ސިއްހީ މަރުކަޒުތަކަކުން ޑޭޓާ އެއްކުރަން ގައުމީ ސެންޓަރެއް ހަދަން ބޭނުންވާ ވަސީލަތްތައް ފޯރުކޮށްދީ، ޑޭޓާ އެއްކުރުމުގައި ހަރަކާތްތެރިވާ މުވައްޒަފުންނަށް ބޭނުންވާނެ މޮބައިލް ޑިވައިސްތައް ދޭނެ ކަަމަށް އެ ބަޔާނުގައި ވެއެވެ.

އަދި ހަމަ އެހެންމެ، ވެކްސިންގެ މައުލޫމާތު ރައްކާކުރާ ނިޒާމު ޑިޖިޓަލައިޒް ކުރުމަށް ބާރު އަޅައި، ކޮވިޑާއި އެ ނޫން ވެސް ބަލިތަކާ ދެކޮޅަށް ވެކްސިން ދިނުމަށް މީހުން ތަމްރީނު ކުރާނެކަމަށްވެސް އޭޑީބީން ބުނެފައިވެއެވެ.