10 އަހަރުވުމުން ޕެންޝަން ފަންޑުން ފައިސާ ނެގޭނެ ގޮތަށް ގާނޫނަށް ބަދަލު ގެންނަން ހުށަހަޅާނަން: މުއިއްޒު

މަސައްކަތުގެ ދާއިރާގައި 10 އަހަރުވުމުން ޕެންޝަން ފަންޑުން ފައިސާ ނަގައިގެން އެކި މަސައްކަތްތައް ކުރެވޭ ގޮތަށް ގާނޫނަށް ބަދަލު ގެނައުމަށް ހުށަހަޅުއްވާނެ ކަމަށް އިދިކޮޅުގެ ރިޔާސީ ކެނޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ ކެންޕެއިނަށް އދ. މަހިބަދޫއަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަފުޅުދައްކަވަމުން މުއިއްޒު ވިދާޅުވީ، ޕެންޝަން ފަންޑަކީ ހުރިހާ ރައްޔިތުންނަށް ވެސް ވަރަށް ބޮޑަށް ގުޅިފައިވާ ކަމެއް ކަމަށެވެ. އަދި އެ ފަންޑަށް މިހާރުވެސް 20 ބިލިއަން ރުފިޔާ ޖަމާވެފައިވާ ކަން ފާހަގަކުރައްވައި މުޢިއްޒު ވިދާޅުވީ އެއީ މަސައްކަތްކުރާ އެންމެންގެ ފައިސާ ކަމަށެވެ.

އެހެން ނަމަވެސް އެ ފައިސާއިން، އެ ފައިސާގެ ހައްގު ވެރިންނަން މާ ބޮޑު އެހީތެރިކަމެއް ނުލިބޭ ކަމަށް މުއިއްޒު ވިދާޅުވި އެވެ.

އަޅުގަނޑުމެން 7 އިންސައްތަ ލައިގެން އަދި މަސައްކަތްކުރާ ފަރާތުން 7 އިންސައްތަލައިގެން ޖަމާކޮށްފައިވާ ފައިސާ. މިހާރު އެބަހުރި 20 ބިލިއަން ރުފިޔާ. އަހަރަކު 100 މިލިއަން ރުފިޔާގެ ޕްރޮފިޓް އަބަދުވެސް ޖަމާވަމުން އެބަދޭ. ވަަރަށް ބޮޑު ފަންޑެއް. އެހެން ނަމަވެސް އެ ފަންޑުގެ ގާނޫނު ހެދިފައި އޮންނަ ގޮތުން މާ ބޮޑު ފައިދާއެއް ނުވޭ. މިހާރު ކޮންމެވެސް ވަރަކަށް އެޕާޓްމަންޓް ގަތުމަށް ކޮންމެވެސް ވަރެއްގެ ފުރުސަތެއް އޮވޭ. އަދި ފަރުލު ހައްޖު އަދާކުރުމަށް ކޮންމެވެސް ވަރެއްގެ ފުރުސަތެއް އޮވޭ. އެހެން ނަމަވެސް 65 އަހަރު ވަންދެން. ބައެއް ފަހަރު 55 އަހަރުގައި ރިޓަޔާ ކުރާއިރު އެކަށީގެންވާވަރަށް ހުރެޖިއްޔާ އެ ލިބޭ އެއްޗެއް ލިބޭ. އެހެންވީމަ އެންމެ ބޮޑު އެހީތެރިކަމެއް ފަންޑުން ނުލިބެ." މުއިއްޒު ވިދާޅުވިއެވެ.

މުއިއްޒު ވިދާޅުވީ 30-40 އަހަރު މަސައްކަތް ކޮށްގެން ޕެންޝަން ފަންޑަށް ފައިސާ ޖަމާވަމުންދިޔަ ނަމަވެސް އެ ފައިސާއިން ލިބެންޖެހޭ ހިތްހަމަޖެހުމެއް ނުލިބޭ ކަމަށެވެ.

އެހެންކަމުން އެފަދަ ކަންކަމަށް ލުއި ބަދަލެއް ގެންނާނެ ގާނޫނެއް އަންނަން ޖެހޭ ކަމަށާ، އެ ފަންޑު ދަމަހައްޓައި ފަންޑަށް އިތުރު ފައިސާ ވަންނާނެ ގޮތް ހޯދަންޖެހޭ ކަން މުޢިއްޒު ފާހަގަކުރެއްވި އެވެ. އެގޮތުން، އެމަނިކުފާނުގެ ވެރިކަމެއްގައި ޕެންޝަން ފަންޑަށް އިތުރު އިންވެސްޓް މަންޓްތަކަށް ފުރުސަތު ދެއްވާނެ ކަމަށާ، ޕްރައިވެޓް ސެކްޓާގައާއި ޓޫރިޒަމް ސެކްޓާގަ އެ ފަންޑު ފުޅާކުރައްވައި، އިންވެސްޓް މަންޓް އިތުރުކޮށް ފަންޑު އިތުރަށް ބޮޑުކުރައްވާނެ ކަމަށް މުޢިއްޒު ވިދާޅުވިއެެވެ.

"އެހެންވީމާ ގާނޫނަށް ބަދަލު ގެނެސްގެން، އެއީ ރައްޔިތުންގެ މަޖިލީހުގެ އެހީއާއެކު ވާނެ ކަމެއް، ގާނޫނަށް ބަދަލު ގެންނަނަށް ސަރުކާރުން ހުށަހަޅާނަން. ގާނޫނަށް ބަދަލު ގެނެސްގެން މި ފަންޑުން ގެދޮރު ބިނާކުރުމަށްޓަކާ ފައިސާ ނެގޭނެ ގޮތް ހަމަޖެއްސުމާއި ދަރިން ކިޔަވަން ބޭރަށް ފޮނުވަން ބޭނުންވާ މީހުންނަށް އެގޮތަށް އޭގެން ފައިދާ ކުރާނެ ގޮތަށް ހުށަހަޅާނަން. އަދި އަމިއްލަ ވިޔަފާރިއެއް ފެށުމަށްޓަކައި އިންވެސްޓްމެންޓެއްގެ ގޮތުގައި އެ މީހާ ޖަމާކުރި ފައިސާއިން ކޮންމެ ވެސް ވަރެއްގެ އަދަދެއް ނެގުމުގެ ފުރުސަތު ދިނުމަށް ހުށަހަޅާނަން."

ޑރ. މުހައްމަދު މުޢިއްޒު

މުއިއްޒު ވިދާޅުވީ، ޕެންޝަން ފަންޑުގެ ފައިސާ ނެގެން ވާނީވެސް 30-40 އަހަރު ވުމުން ނޫން، ކަމަށާ، 10 އަހަރު ވުމުން، އޭގައި ހުންނަ ނިސްބަތަކުން ނެގެން ޖެހޭނެ ކަަމަށެވެ. އެހެންކަމުން އެމަނިކުފާނުގެ ސަރުކާރެއްގައި މަދުވެގެން 10 އަހަރުވުމުން ޕެންޝަން ފަންޑުން ފައިސާ ނެގޭނެ ގޮތަށް ގާނޫނަށް ބަދަލު ގެނައުމަށް ހުށަހަޅުއްވާނެ ކަމަށެވެ.

އެކަން ގޮތަށް ވެގެން ދިއުމުން އެ ފައިސާގެ ފައިދާ، ތަންކޮޅެއް އަވަހަށް ރައްޔިތުންނަށް ކުރާނެ ކަމަށް މުޢިއްޒު ވިދާޅުވިއެވެ.