މަސްތުވާތަކެތީގެ މައްސަލައެއްގައި ހައްޔަރުކުރި މީހަކު ފިޓު ޖެހިގެން އެޑްމިޓްކުރުމުން، ޣައިރު ހާޒިރުގައި ބަންދުކޮށްފި

މަސްތުވާތަކެތި ބޭނުންކޮށް، ގެންގުޅެ، ވިޔަފާރިކޮށް އަދި ޓްރެފިކްކުރި ކަމުގެ ތުހުމަތުގައި ފުލުހުން ހައްޔަރުކުރި މީހަކު، ބަންދުގައި ހުއްޓާ ފިޓު ޖެހިގެން ހޮސްޕިޓަލުގައި އެޑްމިޓްކުރުމާ ގުޅިގެން، އޭނާގެ ޣައިރު ހާޒިރުގައި ބަންދަށް 15 ދުވަސް ޖަހައިފިއެވެ.

މި މައްސަލައިގައި ކޯޓު އަމުރެއްގެ ދަށުން ބަންދުގެ މުއްދަތު އިތުރުކޮށްފައިވަނީ އުމުރުން 39 އަހަރުގެ ޒުވާނެކެވެ.

ކޯޓު އަމުރުގައި ބުނެފައިވާ ގޮތުގައި، ޒުވާނާގެ ބަންދާމެދު ގޮތެއް ނިންމުމަށް ފުލުހުންގެ ފަރާތުން ކޯޓަށް ހުށަހެޅީ އޭނާ ފުލުހުންގެ ބެލުމުގެ ދަށުގައި ހުއްޓައި ފިޓު ޖެހުމާ ގުޅިގެން އޭޑީކޭ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާތީއެވެ. މިކަން ސާފުކޮށްދިނުމުގެ ގޮތުން ހޮސްޕިޓަލުން ދޫކޮށްފައިވާ ލިޔުންތައް ވެސް ފުލުހުން ވަނީ ކޯޓަށް ހުށަހަޅާފައެވެ.

މައްސަލަ ބެއްލެވި ގާޟީ އަޙްމަދު ޝާފިޢު ވަނީ، ޒުވާނާ ހައްޔަރުކޮށްފައިވަނީ ގާނޫނީ އިޖުރާއަތްތަކާ އެއްގޮތަށް ކަމަށް ކަނޑައަޅުއްވާފައެވެ. އަދި އޭނާގެ މައްޗަށް ކުރެވޭ ތުހުމަތަށް ބާރުދޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށާއި، އޭގެ ތެރޭގައި އިންޓެލިޖެންސް ރިޕޯޓާއި، ސީނަށް ދިޔަ ފުލުހެއްގެ ހެކިބަހުގެ ބަޔާނުގެ އިތުރުން ހައްޔަރާއި ބަންދުގެ ރެކޯޑުތައް ހިމެނޭ ކަމަށް އަމުރުގައިވެއެވެ.

އޭނާ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީ، އޭނާ ކަސްޓޯޑިއަލް ޖަލެއްގައި 15 ދުވަހުގެ މުއްދަތަށް ބަންދުކުރުމަށް ވަނީ އަމުރުކޮށްފައެވެ.

މީގެއިތުރުން، ޒުވާނާގެ ޣައިރު ހާޒިރުގައި މި ނިންމުން ނިންމާފައިވީ ނަމަވެސް، ފަނޑިޔާރެއްގެ ކުރިމައްޗަށް އޭނާ ގެނެވޭނެ ފަދަ ސިއްހީ ހާލަތަކަށް އާދެވޭ ވަގުތުން ފެށިގެން 24 ގަޑިއިރުގެ ތެރޭގައި އަލުން ފަނޑިޔާރެއްގެ ކުރިމައްޗަށް ހާޒިރުކޮށް، ބަންދާމެދު ގޮތެއް ނިންމަންވާނެ ކަމަށް ވެސް ކޯޓު އަމުރުގައި ފުލުހުންނަށް ވަނީ އަންގާފައެވެ.