މަރު ކޮމިޝަންގެ މިސްބާޙުގެ މައްޗަށް ދައުވާ ކުރަން ރައީސް ޔާމީން ނިންމަވައިފި

މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރުމަށް ރައީސް އިބްރާހިމް މުހައްމަދު ޞާލިހް އުފެއްދެވި މަރު ކޮމިޝަންގެ މެންބަރު މިސްބާހް އައްބާސް އާ ދެކޮޅަށް އަބުރުގެ ދައުވާ ކުރުމަށް ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމް ނިންމަވައިފިއެވެ.

ރިޟްވާން ރަހީނުކޮށް މަރައިލި މައްސަލައިގައި މަރު ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި މިސްބާހް ވަނީ ރިޟްވާނު މަރައިލުމުގައި އެންމެ އިސްކޮށް ހަރަކާތްތެރިވި މީހުންނާއި ރައީސް ޔާމީންގެ ސަރުކާރުގެ އިސް ބޭފުޅުންނާ ވަރަށް ގާތް ގުޅުމެއް އޮންނަކަމަށް ތަޙްޤީޤަށް ފާހަގަކުރެވިފައިވާ ކަމަށެވެ.

”މި މައްސަލައިގައި ތުުހުމަތުކުރެވޭ ތ.އޮމަދޫ ނަރުގިސްވިލާ މުޙައްމަދު މުނާޒް ސީރިއާއަށް ފުރުމުގެ ކުރިން އޭރުގެ ރައީސުލްޖުމްހޫރިއްޔާއާ ބައްދަލުކޮށް އޭނާގެ ބައިވެރިވުން ނުހިމެނޭ ގޮތަށް ރިޟްވާން ގަދަކަމުން ކާރަށް ލައިގެން ގޮސް މަރައިލުމުގައި ބައިވެރިވި މީހުންނާއި އެކަން ކުރި ގޮތް ކިޔައިދިންކަމަށް މަޢުލޫމާތު ލިބިފައިވޭ. އަދި އޭނާ ސީރިއާއަށް ފުރައިގެން ގޮސްފައިވަނީ އޭރުގެ ރައީސުލްޖުމްހޫރިއްޔާގެ އެހީތެރިކަމާއެކުކަން ވެސް ތަޙްޤީޤަށް އެނގިފައިވޭ. މި މަޢުލޫމާތު ކޮމިޝަނާ ހިއްސާކުރި ފަރާތަކީ މުނާޒްއާ ވަރަށް ގާތް އަދި މުނާޒް ސީރިއާގަ ހުރެގެން އެ މީހުންނާ ބައިވެރިވެ ހަނގުރާމަ ކުރުމަށް ސީރިއާއަށް ދާން ރެކްރޫޓްކުރަން އުޅުނު ފަރާތެެއްކަން ފާހަގަކުރެވޭ.“ މިސްބާޙު ވިދާޅުވިއެވެ.

މިކަމާއި ގުޅިގެން ރައީސް ޔާމީންގެ ވަކީލުންގެ ފަރާތުން ނެރުނު ބަޔާނެއްގައި ބުނީ، އެފަދައިން ވިދާޅުވެ، މިޞްބާޙް ޢައްބާސް ދެއްކި ވާހަކަތަކަކީ، މީހަކު އެހެން މީހަކު ގާތު ބުނިކަމަށް އެމީހާ ދެއްކި ކަމަށް ބުނެ ބުނިބުންޏަށް ދައްކާފައިވާ އެއްވެސް އަޞްލެއް ނެތް ޔޯލަ ވާހަކަތަކެއް ކަން ޚުދު މިޞްބާޙް ޢައްބާސްގެ ވާހަކައިން ވެސް އެނގޭ ކަމަށެވެ.

އަދި ރައީސް ޔާމީން އަކީ ކުރިއަށް އޮތް 2023 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުން ވާދަކުރާ ރިޔާސީ ކެންޑިޑޭޓްކަމަށްވާއިރު، އެމަަަނިކުފާނާއި ގުޅޭގޮތުން މިފަދަ އަޞްލެއް ނެތް ވާހަކަތަކެއް ބުނިބުންޏަށް ދެއްކުމަކީ ވަކި ފަރާތަކަށް ސިޔާސީ މަންފާ ހޯދައިދިނުމުގެ ގޮތުން އެމަނިކުފާނުގެ އަބުރު ކަތިލައި، ރައްޔިތުންގެ މެދުގައި އެމަނިކުފާނަށް އޮތް މަޤުބޫލުކަން ކުޑަކުރުމަށްޓަކައި ދުރާލާ ރާވައިގެން މިޞްބާޙް ޢައްބާސް ހިންގާފައިވާ ވަރަށް ދަށްފަންތީގެ ސިޔާސީ ސްޓަންޓެއްކަމަށް ދެކޭކަމަށްވެސް ރައީސް ޔާމީން ގެ ވަކީލުންގެ ޓީމުން ބުނެފައިވެއެވެ.

"އަދި، އަޅުގަނޑުމެންގެ މުވައްކިލުގެ އަބުރު ނަގާލުމަށްޓަކައި މިޞްބާޙް ޢައްބާސް ކަނޑައެޅިގެން ޙަޤީޤަތާ ޚިލާފު ދޮތު ވާހަކަތަކެއް ދައްކާފައިވާތީ، އަޅުގަނޑުމެންގެ މުވައްކިލުގެ އަބުރު ނަގައިލުމުގެ ދަޢުވާ މިޞްބާޙް ޢައްބާސްއާ ދެކޮޅަށް ކުރުމަށްޓަކައި، މައްސަލައިގެ ދަޢުވާ ފޯމު މިހާރު ތައްޔާރުކުރަމުންދާ ވާހަކަ އާއި، އަދި މިކަމުގައި އަޅަންޖެހޭ ޤާނޫނީ އެންމެހައި ފިޔަވަޅެއް ލަސްކުރުމެއް ނެތި އަޅަމުންދާނެ ވާހަކަ ދަންނަވަމެވެ." ރައީސް ޔާމީންގެ ވަކީލުންގެ ޓީމުން ނެރުނު ބަޔާނުގައި ވެއެވެ.