އިހްސާސް ކުރެވޭ ހޫނުމިން މަތިވެ، ހޫނުން ރައްކާތެރިވުމަށް ފިޔަވަޅު އެޅުމަށް އެޗްޕީއޭއިން އިލްތިމާސްކޮށްފި

ރާއްޖޭގެ އެކި ސަރަޙައްދުތަކުގައި އިހްސާސް ކުރެވޭ ހޫނުމިން އިންތިހާއަށް މަތިވަމުންދާތީ، ހޫނުގެ ސަބަބުން ސިއްޙަތަށް ލިބިދާނެ ގެއްލުންތަކުން ރައްކާތެރިވުމަށް ޚާއްޞަ ފިޔަވަޅުތަކެއް އެޅުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.

މޫސުމީ ރެކޯޑުތަކަށް ބަލާއިރު މި ދުވަސްވަރު އިހްސާސް ކުރެވޭ ހޫނުމިން އެންމެ މައްޗަށް ގޮސްފައިވަނީ ވެރިރަށް ކ. މާލެ އަދި ހދ. ހަނިމާދޫގައެވެ. އެގޮތުން މާލޭގައި އިހްސާސް ކުރެވޭ ހޫނުމިން 38.6 ޑިގްރީ ސެލްސިއަސް އަށް އަރާފައިވާއިރު، ހަނިމާދޫގައި އިހްސާސް ކުރެވޭ ހޫނުމިން ވަނީ 38 ޑިގްރީ ސެލްސިއަސް އަށް އަރާފައެވެ.

އެޗްޕީއޭ އިން އާންމުކޮށްފައިވާ މައުލޫމާތުގައިވާ ގޮތުން، ގަދަ ހޫނުގެ ސަބަބުން ކުރު މުއްދަތުގައި ސިއްޙަތަށް އެކި ކަހަލަ އުނދަގޫތައް ކުރިމަތިވެދާނެއެވެ. އޭގެ ތެރޭގައި ލޯ ދުޅަވެ ދިލަނެގުން، މާބޮޑަށް ވަރުބަލިވެ ގައިން ވަރުދޫވުން، ޑީހައިޑްރޭޓްވުން (ހަށިގަނޑުން ފެން މަދުވުން)، މަސްތަކުގައި ވާންވެ ރިއްސުން، ބޮލުގައި ރިއްސުމާއި އެނބުރުން އެރުން އަދި ހޫނުވުމުގެ ސަބަބުން ހަމުގައި ބިހިނެގުން ހިމެނެއެވެ.

މީގެ އިތުރުން، ހޫނުގަދަވުމުގެ ސަބަބުން ސިއްޙަތަށް ނުރައްކާތެރި ހާލަތްތައް ކުރިމަތިވެދާނެ ކަމަށް އެ އެޖެންސީން ބުނެއެވެ. އެގޮތުން ހީޓް އެގްޒޯސްޝަން، ހީޓް ސްޓްރޯކް، ހޭނެތުން ނުވަތަ ވާނުވާ ނޭނގޭ ހާލަތަށް ދިއުމުގެ އިތުރުން ހިތާއި ފުއްޕާމޭ އަދި ކިޑްނީގެ ބަލިތައް ތަހައްމަލު ކުރަމުންދާ ފަރާތްތަކުގެ ހާލަތު އިތުރަށް ގޯސްވުން ހިމެނެއެވެ. މިފަދަ ހާލަތެއް މެދުވެރިވެއްޖެނަމަ ލަސްނުކޮށް ކުއްލި ފަރުވާ ހޯދުމަށް ވަނީ އިރުޝާދު ދީފައެވެ.

ހީޓް ސްޓްރޯކް ޖެހުމުގެ އަލާމާތްތައް

ވާނުވާ ނޭނގުން ނުވަތަ ހޭނެތުން

ހަށިގަނޑުގެ ފިނިހޫނުމިން 40 ޑިގްރީ ސެލްސިއަސް އަށް ވުރެ މައްޗަށް ދިއުން

ހަންގަނޑު ރަތްވެ، ހޫނުވުން (ހަންގަނޑު ހިކިފައި ނުވަތަ ދަލުން ތެމިފައި ހުރުން)

ވިންދު އަވަސްވުން

ހީޓް އެގްޒޯސްޝަންގެ އަލާމާތެއް ފެނިއްޖެނަމަ އަޅަންޖެހޭ ފިޔަވަޅުތައް

އަވަހަށް ހިޔާވާ ތަނަކަށް ބަދަލުވުން.

ލައިގެން ހުރި އަންނައުނު ދޫކޮށްލުން.

ހަށިގަނޑުގައި ފިނިފެން އުނގުޅައި ފިނިކުރުން.

ހޭހުރިނަމަ ބޯން ފެން ދިނުން. (ހާލަތު ގޯސްވާނަމަ އަވަހަށް ޑޮކްޓަރީ ފަރުވާ ހޯދުން)

ހީޓް ސްޓްރޯކެއް ޖެހިއްޖެނަމަ އަޅަންޖެހޭ ކުއްލި ފިޔަވަޅުތައް

ލަސްނުކޮށް އެމަޖެންސީ ޚިދުމަތްތަކަށް ގުޅައި އެހީތެރިކަން ހޯދުން.

ވަގުތުން އެމީހަކު ހިޔާ ދިމާލަކަށް ނުވަތަ އޭސީ ކޮށްފައިވާ ތަނަކަށް ގެންދިއުން.

ހަށިގަނޑު ފިނިކުރުމަށްޓަކައި އިތުރު އަންނައުނުތައް ބޭލުން ނުވަތަ ދޫކުރުން.

ތެތް، ފިނި ފޮތިގަނޑެއް ނުވަތަ ތުވާއްޔެއް ހަށިގަނޑުގައި އެޅުން.

އަނގައިގެ މަގުން އެއްވެސް އެއްޗެއް ބޯން ނުދިނުން.

ބަލިމީހާގެ ހާލަތަށް ވަރަށް ބޮޑަށް ސަމާލުވެ، ހާލަތު ރަނގަޅުވޭތޯ ނުވަތަ ގޯސްވޭތޯ ބެލުން.

މި ދުވަސްވަރު އަވީގައި ގިނަވަގުތު ނޫޅުމަށާއި، ގިނައިން ފެން ބުއިމަށާއި، ހޫނުން ރައްކާތެރިވުމަށް ސިއްޙީ އިދާރާތަކުން ދޭ އިރުޝާދުތަކަށް ފުރިހަމައަށް އަމަލުކުރުމަށް އެޗްޕީއޭއިން ވަނީ ހަނދާންކޮށްދީފައެވެ.