ކަންނެލި ފެކްޓްރީގެ މަސައްކަތް 18 މަސްދުވަހުން ނިމޭނެ؛ އެއާއެކު ވަޢުދާއެއްގޮތަށް މަސްގަނެވޭނެ: ޝިޔާމް
ލިޔުންތެރިޔާ
ޚަދީޖާ އަރުފާ
ހުޅުމާލޭގައި ގާއިމްކުރަން ނިންމާފައިވާ ކަންނެލި މަސްފެކްޓްރީ ކުރިއަށް އޮތް 18 މަސްތެރޭ ނިންމާލެވޭނެ ކަމަށް ފިޝަރީޒް މިނިސްޓަރު އަހްމަދު ޝިޔާމް މިއަދު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މަޢުރޫފް ޒާކިރު ވަނީ ހުޅުމާލޭގައި ސަރުކާރުން އަޅާ ފްކެޓްރީ ނިމޭނެ އިރަކާއި، ރައީސް މުޢިއްޒުގެ ވަޢުދުފުޅާ އެއްގޮތަށް 80ރ އާއި 100ރ އަށް ކަންނެލި ގަންނަން ފެށޭނީ ކޮން އިރަކުތޯ ސުވާލުކުރައްވާފައެވެ.
އެ ސުވާލަށް ޖަވާބު ދެއްވަމުން ޝިޔާމް ވިދާޅުވީ، ހުޅުމާލޭގައި 100 މެޓްރިކް ޓަނުގެ ކަންނެލި ބަންދު ކުރެވޭ ފެކްޓްރީއެއް ގާއިމް ކުރުމަށް މިދިޔަ ހަފްތާގައި ބަޔަކާ ހަވާލުކޮށްފައިވާ ކަމަށެވެ.
"އިރާދަކުރެއްވިއްޔާ އަޅުގަނޑުމެން މި ބަލަނީ، ކަންނެލި މަސްވެރިންނަށް ހައްލު ހޯދައިދިނުމަށްޓަކައި ގާއިމް ކުރެވޭ ފެކްޓްރީގެ އެ ބައި ކުރިއަށް އޮތް 18 މަސްދުވަސް ތެރޭ މުޅި މަސައްކަތް އެއްކޮށް ނިންމާލެވޭނެ ކަމަށް،" އޭނާ ވިދާޅުވި އެވެ.
ޝިޔާމް ވިދާޅުވި ގޮތުގައި، އެ ފެކްޓްރީ ގާއިމް ކުރުމަކީ ކަންނެލި މަސްވެރިން އެންމެ ބޮޑަށް ސަރުކާރުގައި އެދޭ ކަންތައްތަކުގެ ތެރެއިން އެންމެ މުހިންމު ކަން ކަމަށާ އެ މަސައްކަތާ ރައީސް މުހައްމަދު މުއިއްޒުގެ ރިޔާސީ ވަޢުދަކާވެސް ގުޅިފައިވާކަން އޭނާ ފާހަގަ ކުރެއްވި އެވެ.
މިފްކޯއިން މިދިޔަ އަހަރު ކަންނެލި މަސްވެރިކަމަށް ވަދެއްޖެ. ނަމަވެސް އަދި މިފްކޯއިން މި ގަންނަމުންދަނީ 10 ކިލޯ އިން މައްޗާއި 15 ކިލޯއިން މަތީގެ ކަންނެލި. އަދި މިފްކޯގެ އައިސްޕްލާންޓްތައް ގާއިމްކުރެވިފައިހުރި ރަށްރަށުން މި ދަންނަވާހެން އެބަ ގަނޭ. އިރާދަކުރެއްވިއްޔާ ކަންނެލި މަސްވެރިންނަށް ރައީސުލްޖުމްހޫރިއްޔާ ވެފައިވާ ވަޢުދު އަޅުގަނޑުމެން ހާސިލް ކުރާނީ މި ޕެކިން ފެސިލިޓީގެ ޒަރީޢާއިން. އިއްޒަތްތެރި މެންބަރަށް އަޅުގަނޑުމެން އެ ޔަގީންކަން އަރުވަން.
ވަޒީރު ޝިޔާމް
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
