ބްރިޖް އަދި ހައިވޭ ފުލުހުންގެ އޮޕަރޭޝަނެއް

ބްރިޖް އަދި ހައިވޭ ފުލުހުންގެ ހާއްސަ އޮޕަރޭޝަނެއް ސިނަމާލެ ބްރިޖް އަދި ހައިވޭގައި ފަށައިފިއެވެ.

ފުލުހުން ބުނީ ސިނަމާލެ ބްރިޖާއި ހައިވޭ ބޭނުންކުރާ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް މެދުކެނޑުމެއްނެތި ޓްރެފިކް ބެލެހެއްޓުމުގެ މަސައްކަތް ކުރިއަށްގެންދާކަމަށެވެ.

އެގޮތުން ސިނަމާލެ ބްރިޖް އަދި ހައިވޭގައި އުޅަނދު ދުއްވާ ފަރާތްތައް މޮނިޓަރ ކުރުމުގެ ގޮތުން ފުލުހުން އޮޕަރޭޝަނެއް ފެށިއިރު، މި ހަރަކާތުގެ ތެރެއިން މިއަދު ބްރިޖާއި ހައިވޭގެ އެކި ސަރަހައްދުތަކުގައި އުޅަނދުތައް ހުއްޓުވައި ބަލައި ފާސްކުރަމުން ގެންގޮސްފައިވާކަމަށް ފުލުހުން ބުންޏެވެ. މީގެ އިިތުރުން ދުވެލި މިންކުރާ އާލާތްތައް (ސްޕީޑް ގަން) ބޭނުންކޮށްގެން އުޅަނދުތަކުގެ ދުވެލި ބެލުމުގެ މަސައްކަތްވެސް ވަނީ ކުރިއަށްގެންގޮސްފައެވެ.

ފުލުހުން މިއަދު ބުނީ މި އޮޕަރޭޝަންތަކަކީ މަގުމަތީގެ ގަވާއިދުތަކަށް ބޯލެނބުމަށް ބާރުއެޅުމަށާއި، ކަނޑައެޅިފައިވާ ދުވެއްޔަށްވުރެ ބާރަށް ދުއްވުން ހުއްޓުވައި، މަގުމަތީގެ ރައްކާތެރިކަން އިތުރުކުރުމަށްޓަކައި ކޮންމެ ދުވަހެއްގެ ތަފާތު ވަގުތުތަކުގައި ކުރިއަށްގެންދާ ހަރަކާތްތަކެއް ކަމަށެވެ.

އެހެންކަމުން، ފުލުހުން ވަނީ މަގުމަތީގެ ގަވާއިދުތަކަށް ފުރިހަމައަށް ބޯލެނބުމަށާއި، ކަނޑައެޅިފައިވާ ދުވެލީގެ މިންގަނޑުތަކަށް ސަމާލުކަން ދިނުމަށް އެދިފައެވެ. މީގެ އިތުރުން އެންމެންގެ ސަލާމަތަށްޓަކައި ޒިންމާދާރުކަމާއެކު ހުރިހާ ފަރާތްތަކަކުންވެސް އުޅަނދު ދުއްވުމަށް ސަމާލުކަން ދިނުމަށް ފުލުހުން ވަނީ އިލްތިމާސްކޮށްފައެވެ.

ސިނަމާލެ ބްރިޖް އަދި ހައިވޭއަކީ މުޅި ރާއްޖެއަށް ބެލިނަމަވެސް އެއްދިމާލަކުން އެންމެގިނައިން އެކްސިޑެންޓްތައް ހިނގާ ސަރަހައްދެވެ. މިގޮތުން ގިނަ އެކްސިޑެންޓްތައް ހިނގަނީ ކަނޑައެޅިފައިވާ މިންގަނޑުތަކަށްވުރެ ބާރަށް ދުއްވައިގެން ނުވަތަ އުޅަނދު ދުއްވުމުގެ އިންތަކުން ބޭރުވުމުންކަމަށް ފުލުހުންގެ ތަހްގީގްތަކުން ދައްކައެވެ.