ކެމްބޯޑިޔާއިން ދަނޑުވެރިކަމުގެ ބާވަތްތައް އެތެރެ ކުރަން މަޝްވަރާކޮށްފި

ކެމްބޯޑިޔާގެ ބޮޑުވަޒީރު ރާއްޖެއަށް ކުރައްވާ ރަސްމީ ދަތުރުފުޅުގައި، ކެމްބޯޑިޔާއިން ދަނޑުވެރިކަމުގެ ބާވަތްތައް ރާއްޖެ އެތެރެ ކުރަން މަޝްވަރާކޮށްފައި ވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ދަޢުވަތަކަށް ރަސްމީ ދަތުރުފުޅެއްގައި ކެމްބޯޑިއާގެ ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެންއަށް ރާއްޖެ ވަޑައިގަތީ މިއަދު ހެނދުނުގެ ވަގުތެއްގައެވެ.

ކެމްބޯޑިޔާގެ ބޮޑުވަޒީރާއި ރައީސް ޞާލިހު ވަނީ ދެ ގައުމުގެ ދެމެދުގައި ގުޅުން ބަދަހި ކުރެވޭނެ ގޮތްތަކާމެދު މަޝްވަރާ ކޮށްފައެވެ..

އެގޮތުން، އިގްތިސޯދީ ދާއިރާއިން އެއްބާރުލުން ދިނުމުގެ ތެރެއިން، ކެމްބޯޑިޔާއާ ރާއްޖެއާ ދެމެދު ވިޔަފާރީގެ ގުޅުން އިތުރަށް ބަދަހި ކުރުމުގެ ޝައުގުވެރިކަން މިއަދުގެ މަޝްވަރާތަކުގައި ފާހަގަ ކޮށްފައިވާނެ ކަމަށް ރައީސް ޞާލިހު ވިދާޅުވިއެވެ.

"ކެމްބޯޑިޔާއަކީ ގިނަ އަދަދަކަސް ހަނޑޫ އުފައްދާ ގައުމެއްގެ އިތުރުން ދުނިޔޭގެ ފެންވަރުގެ ހަނޑުލާ ދަނޑުވެރިކަމުގެ ބާވަތްތައް ގިނަ އަދަދަކަށް އެކްސްޕޯޓު ކުރާ ގައުމެއް. އެހެންކަމުން، ކެމްބޯޑިޔާގެ ހަނޑުލުގެ ބާޒާރުން ދިވެހިރާއްޖެއަށް އިތުރު ފުރުސަތުތައް ހޯދުމާ ބެހޭގޮތުން އަޅުގަނޑުމެން މަޝްވަރާ ކުރިން،" ރައީސް ވިދާޅުވިއެވެ.

އޭގެ އިތުރުން، ޒުވާރިއާއި މިރުހާ، ދަނޑިއަލުއްވާއި ކެޝޫނަޓް ފަދަ ދަނޑުވެރިކަމުގެ ބާވަތްތަކާ މޭވާގެ ބާވަތްތައް ރާއްޖެއަށް އެތެރެ ކުރުމަށް ހުރި ފުރުސަތުތަކާ ގުޅޭގޮުންވެސް މަޝްވަރާކުރެއްވި ކަމަށް ރައީސް ވިދާޅުވިއެވެ.

މީގެ އިތުރުން ރައީސް ވިދާޅުވީ، ރާއްޖެއަކީ ބޭރުން އެތެރެކުރާ މުދަލަށް ބަރޯސާވާ ގައުމެއް ކަމުން، ފޭރާމުގެ ބާވަތްތަކާ ދަތުރުފަތުރާ ގުޅުންހުރި މުދަލާ، ލަކުޑީގެ ބާވަތްތައް ރާއްޖެއަށް އެތެރެ ކުރުމާ ގުޅޭގޮތުންވެސް މަޝްވަރާކުރައްވާފައި ވާނެ ކަމަށެވެ.

"ތަފާތު ބާވަތްތަކަށް އަޅުގަނޑުމެންގެ އިމްޕޯޓު ސިންދަފާތު ކުރުމުން ލިބޭނެ ހަމައެކަނި ފައިދާއަކީ، ރާއްޖޭގައި ވިއްކާ އަސާސީ ކާބޯތަކެއްޗާ ކާޑުގެ ބާވަވްތަކުގެ އަގު ދަށަށް ދިއުމެއް ނޫން. އޭގެ އިތުރުން، އަޅުގަނޑުމެންގެ ކާނާގެ ރައްކާތެރިކަން އިތުރުވެ، ކާބޯތަކެތި ބޭނުން ކުރާ ފަރާތްތަކަށްވެސް އިތުރު އިހްތިޔާރުތައް ލިބިގެންދާނެ،" ރައީސުލްޖުމްހޫރިއްޔާ ވިދާޅުވިއެވެ.