ޑިޖިޓަލް ލައިސަންސްއަށް ބޭނުންކުރާނީ "ސިމްސް" ޕޯޓަލް، "އީ ޕޯޓަލް" އެއް ނޫން
ލައިސަންސްއަށް އެދުމުގައި ދަތިތަކެއް އުޅޭކަމަށް ބުނެ އާންމުން އެތައް ޝަކުވާތަކެއް ކުރަމުން ދަނިކޮށް، އެކަން އެގޮތަށް ދިމާވަނީ ނުބައި ޕޯޓަލް އަކުން ވަދެވޭތީ ކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު "ވޮއިސް" އަށް ވިދާޅުވީ ޑިޖިޓަލް ލައިސަންސްއަށް ބޭނުންކުރާނީ "ސިމްސް" ޕޯޓަލް، ކަމަށާއި "އީ ޕޯޓަލް" ނޫން ކަމަށެވެ. އަދި އީ ޕޯޓަލް އެއީ ޓްރާންސްޕޯޓުގެ އެހެން ހިދުމަތްތަކަށް އެދުމަށް ބޭނުންކުރާ ޕޯޓަކް ކަމަށް އަލީ ވިދާޅުވިއެވެ.
އަލީ ވިދާޅުވީ އީ ޕޯޓަލް މެދުވެރިކޮށް މީގެ ކުރިން އަދި މިހާރުވެސް ޓްރާންސްޕޯޓުގެ ގިނަ ހިދުމަތްތައް ލިބިގެން ދާނެ ކަމަށެވެ. ޑިޖިޓަލް ޕެކޭޖުގެ ތެރެއިން ފުރަތަމަ ތައާރަފް ވެގެން ދިޔައީ ޑިޖިޓަލް ލައިސަންސް ކަމަށާއި، ކުރިއަށް އޮތް ތާނގައި ޓްރާންސްޕޯޓުގެ ހުރިހާ ހިދުމަތްތަކެއް އެއް ފުރާޅެއްގެ ދަށުން "ސިމްސް" ޕޯޓަލްގެ ދަށުން ފޯރުކޮށްދެވޭނެ ކަމަށެވެ.
ސިމްސް ޕޯޓަލްގެ ހިދުމަތް ތައާރަފް ކޮށްފައި ވަނީ މިއަހަރުގެ ފެބްރުއަރީ މަހުގެ ކުރީކޮޅުގައެވެ.
އެއްގަމުގައި ދުއްވާ އިންޖީނުލީ އުޅަނދުފަހަރު ދުއްވުމުގެ ލައިސަންސް ރައްކާތެރިކަމާއި ފަސޭހަކަމާއެކު ރައްޔިތުންނަށް ހޯދައި ދިނުމުގެ މަގު ފަހިކުރުމަށްޓަކައި ތައާރަފު ކޮށްފައިވާ "ސިމްސް" ޕޯޓަލް އަކީ ކޮންމެ މީހަކަށްވެސް އެ މީހެއްގެ އީ ފާސް އެކައުންޓް ބޭނުންކޮށްގެން ފަސޭހަކަމާއެކު ޚިދުމަތް ހޯދޭގޮތަށް ފަރުމާކޮށް ފައިވާ ޚިދުމަތެކެވެ.
ކުރިން ލައިސަންސް ޚިދުމަތް ދެމުންގެންދިޔައިރު ބައެއް ފަރާތްތަކުން ޑުރައިވިންގ ޓެސްޓުގައި ބައެއް މައްސަލަތައްދިމާވެ، ލައިސަންސް ލިބުމުގައި ދަތިތަކެއް ދިމާވަމުންގޮސްފައި ވުމާއެކު އީފާސް މެދުވެރިކޮށް އޮތެންޓިކޭޓަރގެ އެހީގައި ލައިސަންސްގެ ޚިދުމަތް ލިބިގަތުމުގެ ސަބަބުން އެ ޚިދުމަތަކީ ސައްހަ ހިދުމަތެއްކަން ޔަގީންކުރެވެއެވެ.
އީފާސް ބޭނުންކުރުމުގެ ސަބަބުން ކުރިން އެޕްލިކޭޝަންއާއެކު ހުށަހަޅުއްވާންޖެހޭ އައި.ޑީ ކާޑުގައި ހިމެނޭ މަޢުލޫމާތުތައް ހުށަހަޅަން ނުޖެހުމާއި އަދި ކޮންމެ ބޭފުޅަކަށްވެސް އެ ބޭފުޅެއްގެ އަމިއްލަ އީފާސްއިން ޚިދުމަތަށް ފަސޭހަކަމާއެކު އެދެވި އެ އެޕްލިކޭޝަންގެ ކަންކަން ކުރިޔަށް ދާގޮތް ވަގުތުން ބަލާލެވުމާއި ހުށަހަޅާ އެޕްލިކޭޝަންއަކީ ސައްހަ ތެދު މަޢުލޫމާތު ހިމެނޭ އެޕްލިކޭޝަނެއްކަން ދެނެގަނެވޭ ގޮތް ސިމްސް ޕޯޓަލްގައި ތަރުތީބުކޮށްފައެވެ.
މި ޚިދުމަތަކީ މިހާރު ރައްޔިތުން ބަލައިގަނެފައިވާ ފަސޭހަ އަދި ރައްކާތެރި ޚިދުމަތަކަށް ވުމާއި މި ޚިދުމަތުގެ ތެރެއިން ކޮންމެ ބޭފުޅަކަށްވެސް ޑިޖިޓަލް ލައިސަންސް ލިބޭނެގޮތަށް ވަނީ ކަންކަން ހަމަޖެހިފައެވެ. އަދި އަމިއްލަ އީފާސް އެކައުންޓުން ސިމްސް ޕޯޓަލްއިން މި ޚިދުމަތް ހޯދުމުން ޑިޖިޓަލް ލައިސަންސް ކޮންމެ އިރެއްގައިވެސް ބަލާލެވޭނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
