ދުބާއީގެ އެޕާޓްމެންޓް ބްލޮކެއްގައި އަލިފާނުގެ ހާދިސާއެއް ހިނގައި 16 މީހަކު މަރުވެއްޖެ
ދުބާއީގެ އެޕާޓްމެންޓް ބްލޮކެއްގައި އަލިފާނުގެ ހާދިސާއެއް ހިނގައި 16 މީހަކު މަރުވެއްޖެއެވެ.
ދުބާއީގެ ސިވިލް ޑިފެންސް އިން ބުނެފައިވަނީ ދުބާއީގެ މީހުން ދިރިއުޅޭ އިމާރާތެއްގައި ބޮޑު އަލިފާން ގަނޑެއް ރޯވެ 16 މީހަކު މަރުވެ 9 މީހަކަށް އެކިވަރުގެ އަނިޔާތައް ލިބިފައިވާކަމަށެވެ.
ދުބާއީގެ މީޑީއާ އޮފީހުން ނެރެފައިވާ ބަޔާނުގައި ބުނެފައިވަނީ އަލް ރަސް އޭރިއާގައި ހުރި މި އިމާރާތުގައި އަލިފާން ރޯވެފައިވަނީ އެ އިމާރާތުގެ ސަލާމަތީ ފިޔަވަޅުތައް ހަމަނުކޮށް ހުރުމުން ކަމަށެވެ.
"ކަމާއި ބެހޭ އިދާރާތަކުން މި ހާދިސާ ހިނގި ތަފްސީލީ ސަބަބު ހޯދުމަށް ކުރަންޖެހޭ އިތުރު ތަހްޤީޤުތައް ދަނީ ކުރަމުން" މީޑިއާ އޮފީހުގެ ބަޔާނުގައި ވެއެވެ.
12:35 ގައި ހާދިސާގެ ރިޕޯޓު ލިބުމާއި އެކު ފަޔަރ ފައިޓަރުން ހާދިސާ ހިނގި ސަރަހައްދަށް ގޮސް އިމާރާތުގައި ތިބި މީހުން ނެރުމާއި މީހުން ސަލާމަތް ކުރުމުގެ މަސައްކަތް 6 މިނިޓު އިރު ތެރޭގައި ފަށައި ފައިވާ ކަމަށް ޢަރަބް ނިއުސް ގައި ބުނެފައިވެއެވެ.
އަލިފާނުގެ ހާދިސާގައި ފުރަތަމަ ރޯވީ އެ ޢިމާރާތުގެ 4 ވަނަ ފަންގިފިލާގައި ހުރި އެޕާޓްމެންޓެއްގައި ކަމަށާއި، ގިނަ ބަޔަކު މަރުވާން ދިމާވީ އަލިފާންގަނޑު ފެތުރިގެން ދިޔަމިންވަރު އަވަސް ކަމުން ކަމަށް މީޑިއާ ރިޕޯޓް ތަކުން ބުނެއެވެ.
ދުބާއީގެ އަލް ރަސް ސަރަހައްދަކީ ބައިބޯ ކާރޫބާރޫ ބޮޑު ސަރަހައްދެކެވެ. ގިނަ ޢަދަދަކަށް މީހުން ދިރިއުޅޭ ގެތަކާއި ރަން ވިއްކާ މާރުކޭޓާއި ތަފާތު ބާވަތްތަކުގެ ހަވާދު ވިއްކާ މާރުކޭޓު އެސަރަހްދުގައި އޮވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
