ބަނގުރޫޓުވަނީއޭ މުސާރަ ނުދެވޭނެއޭ ގޮވި، މުސާރަ ނުދެވި އެބޮތް ތޯ: ހިސާން

ކޯވިޑް-19 އާއި ގުޅިގެން ރާއްޖޭގެ އިޤްތިޞާދު ހީނަރުވި ދުވަސްވަރު އާންމުންގެ މެދުގައި ބިރުވެރިކަން އުފައްދާ، ސަރުކާރާއި މެދު ނަފްރަތު އުފެއްދުމަށް ވާދަވެރިން ރާއްޖެ ބަނގުރޫޓުވެ މުސާރަ ނުދެވޭނެކަމަށް ބުނަމުން ދިޔަ ނަމަވެސް އެ ޙާލަތަށް ރާއްޖެ ވެއްޓުނުތޯ ރައްޔިތުން ސުވާލު އުފައްދަން ޖެހޭކަމަށް މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން ވިދާޅުވެއްޖެ އެވެ.

ހިސާން މިފަދައިން ވިދާޅުވެފައިވަނީ މ. މުލަކުގައި ބޭއްވި ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން ނެވެ.

ހިސާން ވިދާޅުވީ ކޯވިޑްގެ އެންމެ ދަތި ދުވަސްވަރުގައި ރާއްޖެއަށް އަންނަ ފަތުރުވެރިން މަދުވުމާއި ގުޅިގެން އިގްތިސާދީ ގޮތުން ރާއްޖެއަށް ވެސް ހީނަރުކަން އައިސްފައިވާ ކަމަށެވެ.

އަދި އެ ހާލަތުގައި ސަރުކާރުން އިގްތިޞާދު ނެގެހެއްޓުމަށް އަޅަމުންދިޔަ ފިޔަވަޅުތަކަށް ވާދަވެރިން ބޮޑެތި ފާޑުކިޔުންތަކެއް އުފައްދާ ރާއްޖެ ބަނޑަށް ޖެހިދާނެކަމަށް ބުނެ ތަފާތު ވާހަކަތައް ދައްކަވަމުން ދިޔަ ކަމަށެވެ.

އެހެން ނަމަވެސް ވާދަވެރިންގެ ފާޑުކިޔުންތަކާއި އެއްގޮތަށް ރާއްޖޭގެ އިޤްތިޞާަދު ދަށްވެފައި ނުވާކަމަށާއި، މުވައްޒަފުންނަށް މުސާރަ ދެމުން ތަރައްގީގެ ޕްރޮޖްކެޓުތައް ވެސް ހުއްޓުމެއްނެތި ކުރިއަށް ގެންގޮސްފައިވާކަން ހިސާނު ފާހަގަކުރެއްވި އެވެ.

"އިމްޕޯޓަށް ބަރޯސާވެ، ޓުއަރިޒަމަށް ބަރޯސާވެ، އޮތް މި ރާއްޖެ އެ އަނދަވަޅަށް ވެއްޓިގެން ނުދިޔައީ ކީއްވެތޯ އަޅުގަނޑުމެން މިއަދު ސުވާލުކޮށްލަން އެބަ ޖެހޭ. ބަނގުރޫޓު ވަނީއޭ، ގައުމު ދަރާ ވިކެނީއޭ. ކާޑު ހުރީ ދެމަސް ދުވަހަށް ވާ ވަރަށޭ، ޑޮލަރެއް ނެތޭ. ރައްޔިތުން ބަނޑަށް ޖެހޭނެއޭ. މުވައްޒަފުންނަކަށް ސަރުކާރަކަށް މުސާރައެއް ނުދެވޭނެއޭ. މި ނޫން އަޑެއް އަޅުގަނޑުމެންގެ އެތެރެއިންނާއި، ބޭރުން އަޅުގަނޑުމެންނަކަށް އެދުވަހަކު ނީވޭ. މީގެން އެއްވެސް ކަމެއް ވީތޯ؟"

ހިސާން ހުސެއިން

އެކަންކަން ފާހަގަކުރައްވާ ހިސާނު ވިދާޅުވީ ކޯވިޑް-19 މެނޭޖުކޮށް ރާއްޖޭގެ އިޤްތިޞާދު ނަގާ ކޮޅަށް ޖެއްސެވުމުގައި ރައީސް ޞާލިހު އަމަލުކޮށްފައިވާ ގޮތަށް ތައުރީފު ޙައްޤު ކަމަށެވެ.

އަދި އެމަނިކުފާނުގެ އެ މަސައްކަތްޕުޅަށް ޝުކުރު އަދާކުރުމުގެ ގޮތުން ވެސް މިއަހަރުގެ ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބުގައި ރައްޔިތުން ރައީސް ޞާލިހަށް ވޯޓުދެއްވާ އެމަނިކުފާނު ދެވަނަ ދައުރަކަށް އިންތިޚާބު ކުރައްވާނެ ކަމަށެވެ.