ރައީސް ޞާލިޙް މަޑުއްވަރިއަށް ވަޑައިގެންފި

ރައީސް އިބްރާހިމް މުޙައްމަދު ޞާލިޙް ރިޔާސީ އިންތިޚާބުގެ ކެމްޕޭނަށް މ އަތޮޅަށާއި ވ އަތޮޅަށް ކުރައްވަމުން ގެންދަވާ ދަތުރުފުޅުގައި މ މަޑުވަރިއަށް ވަޑައިގެންފިއެވެ.

ރިޔާސީ ކެމްޕޭނަށް މިކުރައްވާ ދަތުރުފުޅުގައި މަޑުއްވަރީގެ ރައްޔިތުންނާއި ބައްދަލުކުރައްވާނެއެވެ. އަދި އެރަށު ބަނދަރުގައި ރައްޔިތުންނާއި އެކު ބާއްވަވާ ޖަލްސާއެއް އޮންނާނެއެވެ.

ރައީސް މ އަށާއި ވ އަށް މިކުރައްވާ ދަތުރުފުޅުގައި އިއްޔެ ވަނީ މ ކޮޅުފުށި ނާލާފުށި، މުލި، އަދި މުލަކަށް ވަޑައިގެންފައެވެ.

އެރަށް ރަށަށް ވަޑައިގެން އެރަށްރަށުގެ ރައްޔިތުންނާއި ބައްދަލުކުރައްވައި ކުރިއަށް އޮތް ދައުރުގައި ކޮންމެ ރަށެއްގައި ކުރައްވަން ކަނޑައަޅުއްވައިފައިވާ ކަންކަން ވަނީ ވިދާޅުވެދެއްވައިފައެވެ.

މީގެ އިތުރުން އެރަށްރަށުގައި ނިމިފައިހުރި ތަރައްޤީގެ މަޝްރޫޢޫތައް ވަނީ އިފްތިތާޙް ކޮށްދެއްވަވާފައެވެ.

އެގޮތުން ކޮޅުފުށީ ފެނުގެ ނިޒާމް އިފްތިތާޙް ކޮށްދެއްވައިފައެވެ. އަދި  އެރަށު ގޮނޑުދޮށް ހިމާޔަތްކުރުމުގެ މަސައްކަތް ނިމުންވެސް ވަނީ ފާހަގަ ކުރައްވައިފައެވެ.

މީގެ އިތުރުން މ. އަތޮޅު މަދަރުސާގެ މަލްޓި ޕާޕޯސް ހޯލާއި އާ އަށް ކްލާސް ރޫމްގެ އިމާރާތް ހުޅުއްވައިދެއްވައިފައިވެއެވެ.

ނާލާފުއްޓަށް ވަޑައިގެން އެރަށު ފެނަކަ އިންޖީނުގެ ހުޅުވައިދެއްވައިފައިވެއެވެ. މުއްޔަށް ވަޑައިގެން އެރަށު ގައި ގާއިމް ކޮށްފައިވާ ފެނުގެ ނިޒާމްގެ ޢަމަލީ މަސައްކަތުގެ ނިމުން ފާހަގަ ކޮށްދެއްވައިފައިވެސް ވެއެވެ. އަދި މުލަކަށް ވަޑައިގެން އެރަށު ހެލްތް ސެންޓަރުގެ އެކްސްޓެންޝަން ހުޅުވައިދެއްވައިފައިވެއެވެ.

މ އަށް ކުރައްވާ ދަތުރުފުޅުގެ ތެރެއިން މިއަދު އެންމެ ފުރަތަމަ ވަޑައިގެންނެވީ މ ވޭވަކަށެވެ. އެއަށް ފަހު ރަތްމަންދޫ އަށް ވަޑައިގެންފައިވެއެވެ.

މ. އަތޮޅު ކެމްޕޭން ދަތުރުފުޅު ނިންމަވާލެއްވުމަށް ފަހު ރިޔާސީ އިންތިޚާބުގެ ކެމްޕޭންގައި ރައީސް ޞާލިހު ދެން ވަޑައިގަންނަވާނީ ވ. އަތޮޅަށެވެ.

ވ. އަތޮޅަށް ރައީސް ކުރައްވާ ދަތުރުފުޅުގައި ވ. ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދޫއަށް ވަޑައިގަތުމަށް ވަނީ ހަމަޖެހިފަ އެވެ.

ރައީސް އިންތިޚާބުގެ ކެމްޕޭންގައި ރައީސް ޞާލިޙް މިދިޔަ ހަފްތާގައި ވަނީ ށ. އަދި ކ. އަތޮޅުގެ ބައެއް ރަށްރަށަށް ވަޑައިގެންފަ އެވެ.