އަމާންކަން ގެނެސްދެއްވާނެ ކަމަށް ކުރެއްވެވި ވަޢުދު ރައީސް ފުއްދަވައިފި: ހިސާން

އަމާންކަން ގެނެސްދެއްވާނެ ކަމަށް ވިދާޅުވެ ރައީސް އިބްރާހިމް މުޙައްމަދު ޞާލިޙް ވެވަޑައިގެންނެވި ވަޢުދު ފުއްދަވައި ދެއްވައިފިކަމަށް ތުޅާދޫ ދާއިރާގެ މެމްބަރު ޙިސާން ހުސެއިން ވިދާޅުވެއްޖެއެވެ.

ޙިސާން މިހެން ވިދާޅުވީ މ މުލަކުގައި ބޭއްވި އެމްޑީޕީ ކޯލިޝަންގެ ކެމްޕޭނު ޖަލްސާގައި ވާހަކަފުޅު ދައްކަވަމުންނެވެ.

ޙިސާން ވިދާޅުވީ މީގެ ފަސްއަހަރުކުރިން މިދުވަހު އޭނާ ހުންނެވީ ފުލުހުން ހައްޔަރުކޮށްފައިތިބި ބައެއްގެ މައުލޫމާތު ނުލިބިގެން އިހްތިޖާޖުގައި ކަމަށެވެ. ރައްޔިތުން ތިއްބެވީ ޕެޕަރ ސްޕްރޭގެ ދިލަތަކާއި ކުރިމަތިލައްވަން މަގުމަތީގައި ކަމަށާއި، ސިޔާސީ ޕާޓީތަކުގެ ވެރިން ތިއްބެވީ ޖަލުތަކުގައި ކަމަށެވެ. އަދި ރައީސުލް ޖުމްހޫރިއްޔާ އިންނެވީ ކުޑަ ގޮޅީގައި ކަމަށެވެ.

މީގެ އިތުރުން ސިޔާސީ ހައްޔަރީގެ އާއިލާތައް ތިބީ ބިރުވެރިކަމެއްގެ ތެރޭގައި ކަމަށާއި، ވިޔަފާރިތައް އޮތީ ހުއްޓިފައިކަމަށާއި މުޅި ޤައުމުއޮތީ ހަލަބޮލިކަންމަތީގައި ކަމަށް އެކަމަނާ ވިދާޅުވިއެވެ.

"އަޅުގަނޑުމެން ހަމަޖެހިގެން އެންމެ ދުވަހަކުވެސް ދިރިނޫޅެން އެފަސްއަހަރަކު، ހަޤީޤަތައް ދަންނަވާނަމަ ދަންނަވަންޖެހޭނީ އެދުވަހު އަޅުގަނޑުން ދިރިއުޅުނީކީ ނޫނޭ، ދިރިތެޅުނިއްޔޭ"

ޙިސާން ހުސެއިން

އޭނަގެ ވާހަކައިގައި އިތުރަށް ވިދާޅުވީ މިހާރު ސިޔާސީ ގޮތުން އެމީހަކު ބޭނުން ސިޔާސީ ޕާޓީއެއްގައި އެމީހެއްގެ ވިސްނުމައިގެން މިނިވަންކަމާއި އެކު ހަރަކާތްތެރިވުމުގެ ފުރުސަތު އެބައޮތް ކަމަށެވެ. އަދި އެމީހެއްގެ ސިޔާސީ ވިސްނުމުގެ ސަބަބުން ޖިސްމަށާއި މުދަލަށް ގެއްލުން ނުވާނެކަމުގެ ޔަޤީންކަން އެބައޮތް ކަމަށާއި ސަރުކާރުން ދަތިނުކުރުވާނެ ކަމުގެ ޔަޤީން ކަން އެބައޮތް ކަމަށެވެ.

ހިސާން ވިދާޅުވީ އެދުވަހު އެމްޑީޕީއާއި ގުޅިފައިއޮތް ސިޔާސީ ޕާޓީތަކުން ވީ ވައުދަކީ ސިޔާސީ ވިސްނުމުގެ ސަބަބުން ޖިސްމަށާއި މުދަލަށް ގެއްލުން ނުވާނެ ކަމުގެ ވައުދުކަމަށާއި ރައީސް ޞާލިޙް އެވައުދު ފުއްދަވައިދެއްވައިފިކަމަށެވެ.

ރައީސް ޔާމީންގެ ކޮންޓްރޯލް އޮންނަ ސަރުކާރަކަށް މިރާއްޖެ އަށް ސިޔާސީ ހަމަޖެހުން ގެނެސްދެވޭނެ ކަމަށް މިއަދު ގަބޫލު ކުރަންވީ ކީއްވެގެންތޯ ހިސާންގެ ވާހަކައިގައި ސުވާލު ކުރެއްވެވިއެވެ. އަދި އެދަތި އުނދަގޫ އަލުން ތަހައްމަލު ކުރަންވީ ކަމަށް ބަޔަކު އެ ބުނާ ވާހަކައަކީ ދެކޮޅު ޖެހޭނެ އެއްވެސް ހުއްޖަތެއް އޮތް ވާހަކައެއް ނޫން ކަމަށްވެސް ހިސާން ވިދާޅުވިއެވެ.

ރިޔާސީ ކެމްޕޭނުގައި މ އަށާއި ވ އަށް ކުރައްވަމުންދާ ދަތުރުފުޅުގައި މުލަކުގައި ބޭއްވި މިޖަލްސާގައި އެމްޑީޕީ ކޯލިޝަން  ޕާޓީ ތަކުގެ އިސް ބޭފުޅުންނާއި ސަރުކާރުގެ އިސްވެރިން ވަނީ ބައިވެރިވެވަޑައިގެންފައެވެ.