"ކެންޕެއިން ކުރިއަށް ގެންދާނީ ގާސިމްގެ ދިރިއުޅުމުގަ ކަންކަން މިހާތަނަށް ކުރިޔަށް ގެންދެވި ގޮތަށް"

‏ޖުމްހޫރީ ޕާޓީ (ޖޭޕީ)ގެ ރިޔާސީ ކެންޕެއިން ކުރިއަށް ގެންދަވާނީ، އެ ޕާޓީގެ ލީޑަރ، ގާސިމް އިބްރާހިމް ގެ ދިރިއުޅުމުގެ ކަންކަން ކުރިއަށް ގެންދެވި ގޮތަށް، ކަމަށް، އެމަނިކުފާނުގެ ސްޕެޝަލް އެޑްވައިޒަރު އަދި ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ރޭ ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހިމް އާއި އެމަނިކުފާނުގެ ރަނިންމޭޓް އަމީން އިބްރާހިމްގެ އިތުރުން ޕާޓީގެ އިސް ލީޑަރުން ހިމެނޭހެން، ދަރުމަވެރިންނާއި، ކުޅުންތެރިންނާއި، އޮފިޝަލުންނާއި، ކްލަބު ޖަމިއްޔާތަކާއި، އެސޯސިއޭޝަންތަކާއި، ސަޕޯޓަރުންނަށް ހާއްސަކޮށްގެން ޖޭޕީން ވަނީ ހޮޓެލް ޖެންގައި ޚާއްސަ ހަފްލާއެއް ކުރިއަށް ގެންގޮސްފައެވެ.

މިހަފްލާގައި ވާހަކަ ދައްކަވަމުން އަލީ ވަހީދު ވިދާޅުވީ، ރާއްޖޭގަ ހުރިހާ ދާއިރާއަކުން ބެލި ނަމަވެސް، އެ ދާއިރާ ތަކަށް ގާސިމް އިބްރާހިމް ކޮށްދެއްވާފައިވާ ޚިދުމަތްތަކާއި އެއްވަރަށް އެހެން އެއްވެސް މީހަކު ޚިދުމަތްކޮށްދެއްވާފައި ނުވާނެ ކަމަށެވެ.

އަދި އެންމެ 15000 ރުފިޔާގެ ލޯނަކާއި އެކު ފެއްޓެވި މަސައްކަތުން ރާއްޖޭގެ އެންމެ ފުންނާބުއުސް ވިޔަފާރިވެރިޔާ އަށް ގާސިމް ވެގެން ދިޔައީ، އެމަނިކުފާނުގެ ވިސްނުމުގެ ހުރި ތަނަވަސް ކަމުން ކަމަށް އަލީ ވަހީދު ވިދާޅުވިއެވެ.

"ޖަރުމަނުގައި އަޅުގަނޑާއި އެކު ހުރި ދެ ހަފްތާ. ރޭގަނޑު ނިދި ކުރައްވަނީ އެގާރަ، ބާރަ، އެކެއް ޖަހާއިރު، ފަތިސް ނަމާދަށް ހޭލައްވާ. އަޅުގަނޑު ގާސިމް ކައިރިން އެހިން ގާސިމް ކީއްކުރަންހޭ ތިހާ ބުރަކޮށް ތި އުޅުއްވަނީ. ވިދާޅުވީ، ތިމަންނަ ނިދާނީ ތިމަންނަ މާދަމާ ބޭނުން ކަންކަން ހާސިލް ކޮށްފައޭ."

ގާސިމްގެ ޚާއްސަ އެޑްވައިޒަރ އަލީ ވަހީދު

މީގެ އިތުރުން ޖޭޕީގެ ކެންޕެއިންވެސް ކުރިއަށް ގެންދަވާނީ ގާސިމްގެ ދިރިއުޅުމުގެ ކަންކަން ކުރިއަށް ގެންދެވި ފަދައިންކަން ފާހަގަކުރައްވަމުން ޢަލީ ވިދާޅުވީ، ޖޭޕީގެ މިފަހަރު ކެމްޕޭނުގައި އެންމެ ގިނަ ދިދަ ދަނޑި ދަމައި، އެންމެ ގިނަ ފޮތި ދަމާން ބޭނުން ނުވާ ކަމަށެވެ.

"ކުރަން މިއުޅޭ ކަމަކީ، މީހާއަށް، ރައްޔިތުންނަށް، ނިޒާމަށް ބަދަލެއް ގެނައުން. ކުލަގަދަކޮށްގެން އެއްބަޔަކު އަނެއްބަޔަކު ޒުވާބު ހިންގައިގެން މިގައުމަށް ލިބޭނެ ކުރިއެރުމެއް ނެތްކަން ފާއިތުވި 15 އަހަރު ދުވަހުގެ މަލްޓި ޕާޓީ ޕޮލިޓިކްސްއިން އެނގިއްޖެ."

"އެހެންވީމާ ގާސިމް އިބްރާހީމް މިފަހަރު މި އިންތިހާބުގަ އެމަނިކުފާނުގެ މުޅި އިންތިހާބީ ކަންކަން ކުރިޔަށްގެންދަވާނީ ދިރިއުޅުމުގަ ކަންކަން މިހާތަނަށް ކުރިޔަށް ގެންދެވި ގޮތަށް. އެއީ ދުވަހަކުވެސް މީހަކަށް އަނިޔާއެއް ދީ ނުވަތަ ދުވަހަކުވެސް މީހަކަށް ދަޖަލުކޮށް އެގޮތަކަށް އެއްވެސް މައިދާނެއްގައި އުޅުއްވި ބޭފުޅެއް ނޫން. އަބަދުވެސް ބެއްލެވީ ދިވެހި ރައްޔިތުންނަށް ބޭނުންވާ ކަންކަން ކޮށްދެވޭތޯ."

ގާސިމްގެ ޚާއްސަ އެޑްވައިޒަރ އަލީ ވަހީދު

ރޭގެ ހަފްލާގައި ބައިވެރިވި ހުރިހާ ދާއިރާތަކުގައި ހިމެނޭ ފަރާތްތަކަށް ޚާއްސަކޮށްގެން ޖުމްހޫރީ ޕާޓީގެ މެނިފެސްޓޯގައި ހިމެނޭ ކަންކަމުގެ ތަފްސީލް ޢަލީ ވަހީދުވަނީ ދެއްވާފައެވެ. އަދި އެކަންކަމާއި ގުޅިގެން ދާއިރާގެ ފަންނީ މާހިރުން ދެކޭ ގޮތާއި، އެމީހުންގެ ޚިޔާލެއް އޮތް ނަމަ، އެކަންކަން ވެސް ވަނީ ހޯއްދަވާފައެވެ.