އަދުރޭގެ ހިސާބު: ޑރ މުއިއްޒު އިންތިޚާބު ކާމިޔާބު ކުރައްވާނީ 60% ވޯޓު ހޯއްދަވައިގެން!

މި އަހަރުގެ ރިޔާސީ އިންތިޚާބު ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ކާމިޔާބު ކުރައްވާނީ 60% ވޯޓު ހޯއްދަވައިގެން ކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

އަބްދުއްރަހީމް މިފަދައިން ވިދާޅުވެފައި ވަނީ މަހިބަދޫގައި ބޭއްވި ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.

އެ ޖަލްސާގައި ވާހަކަދައްކަވަމުން އަބްދުއްރަހީމް ވަނީ އިބްރާހިމް މުޙައްމަދު ޞާލިހުގެ ވެރިކަން ބަދަލުކުރަން ޖެހޭ ގިނަ ސަބަބުތަކަށް އަލިއަޅުވާލައްވާފަ އެވެ.

އެގޮތުން އެންމެ ފުރަތަމަ ވެސް އަބްދުއްރަހީމް ވިދާޅުވީ ރައީސް ޞާލިހުގެ ވެރިކަމުގައި ދިވެހިރާއްޖޭގެ މިނިވަންކަމާއި އިސްތިގުލާލަށް ބުރޫ އަރާގޮތަށް ކަންތައްތައް ކުރަމުންދާ ކަމަށެވެ. ރައީސް ޞާލިހު މިއަދު ވެރިކަން ކުރައްވަމުން ދަނީ އަވައްޓެރި އިންޑިއާއިން އަންގާ ގޮތަށް ކަމަށާއި، އެކަމުގެ ސަބަބުން ދިވެހީންގެ ގައުމު ހިންގުމުގެ ފުރިހަމަ ބާރު ދިވެހީންގެ އަތުން ގެއްލިފައިވާކަމަށް އަބްދުއްރަހީމް ވިދާޅުވި އެވެ.

އޭގެ އިތުރުން ރައީސް ޞާލިހު ވައްކަމާއި ކޮރަޕްޝަނަށް ދެއްވާނެކަމަށް ވިދާޅުވި "ޒީރޯ ޓޮލަރެންސް" ޕޮލިސީ ތަންފީޒުކުރެއްވުމަށް ފެއިލްވެވަޑައިގަތުމާއި، ސަރުކާރުގެ ތެރެއިން ހިންގާފައިވާ ކޮރަޕްޝަންގެ މައްސަލަތައް ވެސް ބެލިފައި ނުވާއިރު، އިންޑިއާއިން ރިކޯޑު އަދަދަކަށް ލޯނު ނަގައި، ރައްޔިތުން ހަގީގީ ދަރަނި ދަންތުރައިގައި ޖައްސާފައި އޮތުމަކީ ވެސް މި ވެރިކަން ނިންމަން ޖެހޭ ސަބަބުތަކުގެ ގޮތުގައި އަބްދުއްރަހީމް ފާހަގަކުރެއްވި އެވެ.

އޭގެ އިތުރުން އެމްއެމްޕީއާރުސީގެ ޚިޔާނާތް ބެލުމުގެ ނަމުގައި ރައީސް ޔާމިނުގެ މައްސަލަތައް ފުލުފުލުގައި ބަލަމުންދާއިރު، އެ ޚިޔާނާތުގައި ބައިވެރިވި މީހުންކަމަށް ސަރުކާރުން ނެގޭ ލިސްޓުތަކުގައި ވެސް އުނި އިތުރުތައް ގެނެސްފައި ވުމާއި، ރައީސް ޞާލިހުގެ ގާތް މީހުންނަށް ތަފާތުކުރުމާއި، އަދުލުގެ ނިޒާމު ގެއްލުވާލުން ފަދަ އެތައް ކަމެއްގެ ސަބަބުން ދިވެހީންގެ ނާމާން ހަލަބޮލި ތަނަކަށް ބަދަލުވެފައި އޮތުމަކީވެސް މި ވެރިކަން ބަދަލުކުރަން ޖެހޭ ސަބަބެއްކަމަށް އަބްދުއްރަހީމް ވިދާޅުވި އެވެ.

އެއާއެކު އަބްދުއްރަހީމް ވިދާޅުވީ ރިޔާސީ އިންތިޚާބުގެ ފުރަތަމަ ބުރުގައި ރައްޔިތުން މި ސަރުކާރަށް ނޫނެކޭ ބުނެފައިވާކަން ނަތީޖާއިން ދައްކާދީފައިވާ ކަމަށެވެ. އަދި ރިޔާސީ އިންތިޚާބުގެ ދެވަނަ ބުރު 30 ސެޕްޓެމްބަރުގައި ބާއްވާއިރު، އެ ދުވަހު ރައްޔިތުން ލާ ވޯޓުން ތަފާތު ބޮޑުކޮށް މި ސަރުކާރު ބަލިކުރާނެކަމަށް އަބްދުއްރަހީމް ވިދާޅުވި އެވެ.

އަބްދުއްރަހީމް ވަނީ އޭނާއަށް އަންދާޒާކުރެވޭ ނަތީޖާ ވެސް އެ ޖަލްސާގެ ތެރެއިން އިއުލާނުކުރައްވާފަ އެވެ.

"އަދަދެއް ދަންނަވާލާނަން. މި އިންތިޚާބު އިރާދަކުރެއްވިއްޔާ ސެޕްޓެމްބަރު މަހުގެ 30 ވަނަ ދުވަހު އަޅުގަނޑުމެން ކާމިޔާބު ކުރާނީ 60% ހޯދައިގެން"

ޕީއެންސީގެ ރައީސް އަބްދުއްރަހީމް އަބްދުالله

ރިޔާސީ އިންތިޚާބުގެ ފުރަތަމަ ބުރުގައި ސަރުކާރު ހިންގާ މައި ޕާޓީ އެމްޑީޕީގެ މައްޗަށް ޑރ މުހައްމަދު މުއިއްޒު ކުރި ހޯއްދެވީ، އެއްބުރުން އިންތިޚާބު ކާމިޔާބުކުރައްވާނެ ކަމަށާއި، އެންމެ ދަށް ވެގެން 57% ވޯޓު އެ ބުރުގައި ހޯއްދަވާނެކަމުގެ ޔަގީންކަން އެމަނިކުފާނު ދެއްވާފައި ވަނިކޮށެވެ.

އެހެން ނަމަވެސް ރައީސް ޞާލިހަށް އެ ނަތީޖާ ނުނެރެވޭނެކަމަށް އަބްދުއްރަހީމް ވިދާޅުވި އެވެ. އަދި ރިޔާސީ އިންތިޚާބުގެ ފުރަތަމަ ބުރުން ރައީސް ޞާލިހަށް 40% ނުހޮއްދެވޭނެކަމަށް ވެސް އަބްދުއްރަހީމް ވިދާޅުވި އެވެ. އެ ބުރުގައި ރައީސް ޞާލިހަށް ލިބިވަޑައިގަތީ 39% އެވެ. އަދި ޑރ މުއިއްޒަށް ލިބިވަޑައިގަތީ 46% އެވެ.

ރިޔާސީ އިންތިޚާބުގެ ދެވަނަ ބުރުގެ ކެމްޕޭނު ފޯރިއާއި އެކު ކުރިއަށްދާއިރު، ދިވެހީންގެ ރާއްޖެ ހޯދުމަށް ބިރު ފަހަނައަޅާ ދިވެހީން ނިކުމެ ޑރ މުއިއްޒު އިންތިޚާބު ކުރައްވާނެކަމުގެ ފުރިހަމަ ޔަގީންކަން އޮތްކަމަށް އަބްދުއްރަހީމް ވަނީ ވިދާޅުވެފަ އެވެ. އަދި މިއީ ގައުމީ ފިކުރު އިސްކޮށް ވޯޓުދެއްވާ އިންތިޚާބަކަށް ހެއްދެވުމަށް ވެސް އަބްދުއްރަހީމް ވަނީ އިލްތިމާސް ކުރައްވާފަ އެވެ.