ސިފައިންނާއި ފުލުހުންގެ މުސާރަ ދެގުނަ ބޮޑުކޮށްދިނުމަށް ޑރ މުއިއްޒު ވައުދުވެއްޖެ
ވެރިކަން ލިބިވަޑައިގެންފި ނަމަ ސިފައިންނާއި ފުލުހުންގެ މުސާރަ ދެގުނަ ބޮޑުކޮށްދެއްވުމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވައުދުވެވަޑައިގެންފި އެވެ.
އެމަނިކުފާނު މިފަދައިން ވިދާޅުވެފައި ވަނީ ޕްރޮގްރެސިވް ކޮންގްރެސް ކޯލިޝަނުން ބޭއްވި "މަވެސް ޕީޕީއެމް" ޖަލްސާގައި ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ ސިފައިންނާއި ފުލުހުންނަށް މި ސަރުކާރުން ވަރަށް ބޮޑަށް އިހުމާލުވެފައިވާ ކަމަށެވެ. އެހެން ނަމަވެސް ގައުމެއްގެ މިނިވަންކަމާއި އިސްތިގުލާލު ހިމާޔަތްކޮށް، ގައުމުގެ އަމަން އަމާންކަން ނެގެހެއްޓުމަށްޓަކައި އެންމެ މުހިންމު ދައުރެއް އަދާކުރާ ބަޔަކީ ސިފައިންނާއި ފުލުހުންކަން ޑރ މުއިއްޒު ފާހަގަކުރެއްވި އެވެ.
އެމަނިކުފާނު ވިދާޅުވީ އެއްވެސް މުއައްސަސާއެއްގެ މުސާރަ ބޮޑުކުރައްވާނެކަމަށް ރިޔާސީ އިންތިޚާބުގެ ކެމްޕޭނުގައި ވައުދުވެވަޑައިގެން މީ ފުރަތަމަ ފަހަރުކަމަށެވެ. އަދި ސިފައިންނާއި ފުލުހުންގެ މުސާރަ ބޮޑުކުރާ ވާހަކަ ދެއްކެވީ، އެ މުއައްސަސާއަށް ޚިދުމަޔްކުރައްވާ ފަރާތްތަކުގެ މުހިންމުކަމާއި، އެ އޮފިސަރުންގެ ކޮނޑުގައި އެޅިފައިވާ މަސްއޫލިއްޔަތުގެ މުހިންމު ކަމުން ކަމަށެވެ.
އެހެންކަމުން މުސާރަތައް ބޮޑުކުރާއިރު އެންމެ އިސްކަމެއް ދެއްވާނީ ސިފައިންނާއި ފުލުހުންގެ މުސާރަ ބޮޑުކުރުމަށް ކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކުފާނު ވިދާޅުވީ މުސާރަތައް އެއްހަމަ ކުރުމަކީ އެމަނިކުފާނު ކުރައްވާނެ ކަމެއް ކަމަށެވެ. އަދި ސިޔާސީ މަޤާމުތައް ފިޔަވައި އެހެން އެއްވެސް ވަޒީފާއަކުން އެއްވެސް ރައްޔިތަކު ވަކިނުކުރައްވާނެ ކަމަށާއި، އަދި މިހާރު ދެމުންދާ މުސާރައިން އެންމެ ރުފިޔާއެއްވެސް އުނި ނުކުރައްވާނެ ކަމުގެ ޔަގީންކަން ޑރ މުއިއްޒު ވަނީ ދެއްވާފަ އެވެ.
މުސާރައިގެ އިތުރުން ވެސް ސިފައިންނާއި ފުލުހުންގެ ފްލެޓުތަކަށް މިހާރު ދިމާވެފައިވާ މައްސަލަތައް ޙައްލުކޮށްދެއްވާނެ ކަމުގެ ޔަގީންކަން ވެސް ޑރ މުއިއްޒު ވަނީ ދެއްވާފަ އެވެ. އެގޮތުން ސިފައިންނާއި ފުލުހުންގެ ފްލެޓުތަކަށް އަގު ދެއްކުން އެއް އަހަރު ލަސްކޮށްދެއްވާ، އަދި ބަހާލައިގެން ފައިސާ ދެއްކޭނެ ލުއި ފަސޭހަ އިންތިޒާމެއް ހަމަޖައްސާދެއްވާނެ ކަމަށް ޑރ މުއިއްޒު ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
