އަސާސީ ކަންކަމަކީ ވައުދުގެ ގޮތުގައި ކޮށްދެންޖެހޭ ކަންކަމެއް ނޫން: ޑރ މުއިއްޒު

ރަށްރަށަށް ބޭނުންވާ އަސާސީ ޚިދުމަތްތައް ގާއިމްކޮށްދިނުމަކީ ހަގީގަތުގައި ރިޔާސީ ވައުދުގެ ގޮތުގައި ކޮށްދެންޖެހޭ ކަންކަމެއް ނޫން ކަމުގައި އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ދެވަނަބުރުގެ ކެމްޕެއިންގައި މިއަދު ހއ، ހދ އަދި ށ އަތޮޅަށް މިއަދު ފެށި ކެމްޕެއިން ދަތުރުގައި ހއ މުރައިދުއަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި ޑރ މުއިއްޒު ވިދާޅުވީ، ރަށްރަށުގެ ސިއްހީ ނިޒާމާއި ކުނި މެނޭޖް ކުރުމާއި ރަށްގިރުމުގެ މައްސަލަ ހައްލުކުރުމުގެ އިތުރުން ތައުލީމީ ނިޒާމު ހަރުދަނާކުރުމަށް ބޭނުންވާ ވަސީލަތްތައް ގާއިމް ކޮށްދިނުމަކީ ރައްޔިތުންނަށް ބޭނުންވާ އަސާސީ ހިދުމަތްތައް ކަމަށާއި އެކަންކަން ކޮށްދިނުމަކީ ސަރުކާރުން ކޮންމެހެން ކޮށްދެންޖެހޭ ކަންކަން ކަމަށެވެ.

އެހެންނަމަވެސް މިއަދު ފެންނަ މަންޒަރަކީ އެފަދަ ކަންކަމަކީ ރިޔާސީ ވައުދުގެ ތެރެއިން ކޮށްދެންޖެހޭ ކަންކަމަށް ވެފައިވުން ކަމަށާއި އެހެން ދިމާވަނީ މިހާރުގެ ސަރުކާރަށް ރަށްރަށަށް ބޭނުންވާ އެފަދަ ޚިދުމަތްތައް ގާއިމްކޮށްދެވިފައި ނުވުމުން ކަމަށް ޑރ މުއިއްޒު ވަނީ ވިދާޅުވެފައެވެ.

މިހެން ވާން މި ޖެހެނީ މިކަންކަމުގައި މިހާރުގެ ސަރުކާރުގެ އިހުމާލު ބޮޑުވީމަ

ޑރ މުހައްމަދު މުއިއްޒު

ޑރ މުއިއްޒުގެ ވާހަކަފުޅުގައި ވަނީ އެމަނިކުފާނުގެ ސަރުކާރެއްގައި މުރައިދޫއަށް ކޮށްދެއްވާނެ ގިނަ ކަންކަމެއްގެ ވައުދުތަކެއް ވެ ވަޑައިގެންފައެވެ.

އޭގެ ތެރޭގައި:

- ޒަމާނީ ފެންވަރުގެ ސިއްހީ މަރުކަޒަކަށް މުރައިދޫ ސިއްހީ މަރުކަޒު ހެދުން

- އަސާސީ ޓެސްޓްތައް ކުރެވޭނެ ލެބޯޓަރީއެއް ގާއިމްކުރުން

- ސްކޫލަށް އިތުރުކުރެވިފައިވާ ބަޔާއި މައި ސްކޫލާއި ގުޅުވާލައި ސްކޫލުގެ ޖާގަ އިތުރުކުރުން

- އޭޓީއެމް އެއް ގާއިމްކުރުން

- އިންޑޯ ފެސިލިޓީސް ހިމެނޭގޮތަށް ޒުވާނުންގެ މަރުކަޒެއް ގާއިމްކުރުން

- ކުނި މެނޭޖުކުރުމުގެ މައްސަލަތައް ހައްލުކުރުން

- ރަށުގެ މައި މަގުތައް ޒަމާނީ ފެންވަރަށް ތަރައްގީކުރުން

ރިޔާސީ އިންތިހާބުގެ ކެމްޕެއިންގައި މިއަދު ހއ ހދ އަދި ށ އަތޮޅަށް ޑރ މުއިއްޒުއާއި ކެމްޕެއިން ޓީމުން ފެއްޓެވި ދަތުރުގައި މުރައިދޫއިން ވިއްސާރައިގައި ގިނަ އަދަދެއްގެ ސަޕޯޓަރުން ނިކުމެ ވަނީ މުއިއްޒުއަށް ހޫނު މަރުހަބާއެއް ކިޔައިފިއެވެ.